Iona

4 KINOKINO roa akerā Iona, e maata atura tona riri.

2 Kua pure atura aia kia Iehova, na ko atura, E tenana, e Iehova, kare ainei teia taku i karanga ra, iaku i noo ki toku uaorai enua? i oro ei oki au ki Taresisa i muatangana ra; kua kite ana oki au e, e Atua aroa ua koe e te tangi, e te akakoromaki, e te takinga-meitaki maata, e e tataraara koe i te kino.

3 E teianei, e Iehova, teia taku e pati kia koe, ka rave mai koe iaku kia mate, e mea meitaki oki iaku te mate i te ora.

4 E kua tuatua mairā Iehova kiaia; Kua tika ainei toou riri?

5 Kua aere oki a Iona ki vao i taua oire ra, e kua noo iora ki te pae oire ki te itinga o te rā ra, e kua anga iora aia i tetai are piritanga nona i reira, e kua noo iora aia i raro ake i roto i te marumaru ra, kia kite aia e ka akapeeaia taua oire ra.

6 Kua akatupu iora te Atua ra ko Iehova i tetai kikiona, akatupuia iora na runga ia Iona, ei marumaru i runga i tona upoko, kia ora aia i tona tumatetenga; rekareka rava akerā Iona i taua kikiona ra.

7 Kua akono ra te Atua i tetai anue, i te popongi ake apopo, momotu iora taua kikiona ra, e mae atura.

8 E kia iti akera te rā ki runga, kua akono iora te Atua i tetai matangi vera e maoake, e itiia iora te mimiti o Iona e te rā, e kua rere a mate iora aia, e kua pati iora aia e kia mate aia: kua karanga oki aia, E mea meitaki iaku te mate i te ora.

9 Kua tuatua maira te Atua kia Iona. E tika ainei toou riri i te kikiona nei? Kua karanga atura aia, E tika rai toku riri e mate ua atu.

10 Kua tuatua mairā Iehova, Kua tangi koe i te kikiona, tei kore i angaangaia e koe, e kare oki koe i akatupu; ko tei tupu mai i te po okotai, e kua mate rai i te po okotai:

11 E auraka ainei au nei e tangi ia Nineve, i tera ra oire maata, e ono taku tausani anga i te tangata kare i kite i to ratou rima katau e to ratou rima kaui, e te au puaka katoa oki e manganui?