2 Paraleipomeno

24 TEI te itu o to Ioasa mataiti i ariki ei aia, e a ngauru oki ona mataiti i te ariki anga i Ierusalema. Ko Zibia te ingoa o tona metua vaine no Bere-seba.

2 Kua rave aturā Ioasa i te mea tika i mua i te aroaro o Iehova, e ope rava akera te au rā o Iehoiada taunga ra.

3 Kua rave akerā Iehoiada i nga vaine nana toko rua; kua anau ana puke tamariki tamaroa e nga tamaine.

4 E i muri ake i te reira ko roto i te ngakau o Ioasa e tuā i te are o Iehova.

5 Kua akaputuputu maira aia i te kau taunga, e te au ngati Levi, e kua karanga atura kia ratou, E aere kotou ki te au oire o Iuda, e ori aere i te moni ia Iseraela katoa ra, ei tuā i te are o to kotou Atua, i tera mataiti, i tera mataiti; e akamaroiroi oki kotou i te rave kia oti vave. Kare ra te ngati Levi i akamaroiroi.

6 Kua karanga atura te ariki ki te taunga maata ra kia Iehoiada, e kua na ko atura kiaia, Eaa i kore ei koe i umuumu atu i te au ngati Levi, e apai mai i te apinga uipa na Iuda, e na Ierusalema, i akonoia e Mose e te tavini o Iehova, e na te uipaanga o Iseraela, no te Are kite ra?

7 Na te au tamariki oki a taua vaine akono kore ra a Atalia i vavaʼi i te are o te Atua: e kua apai oki ratou i te au mea ravarai i akatapuia no te are o Iehova na Baala.

8 E kia akaueia mai ratou e te ariki ra, kua tarai iora ratou i tetai pia, e kua tuku akera ki vao mai i te ngutupa o te are o Iehova.

9 Kua tutu aere iora ratou na roto ia Iuda e Ierusalema katoa, e apai mai i te apinga uipaia ra kia Iehova, i tei tukuia atu e te tavini o te Atua ra e Mose ki runga ia Iseraela i te medebara ra.

10 Kua mareka akera te aronga mamaata katoa e te tangata ravarai, e kua apai mai ki roto, e kua titiri i ta ratou i uipa maira ki roto i te pia e ope akera.

11 E i te tuatau i apaiia mai ei taua pia ra ki roto ki te aronga taoonga a te ariki ra i te rima o te ngati Levi, e kite akera ratou e moni maata, kua aere maira te tata tuatua a te ariki, e te tangata taoonga o te taunga maata ra, kua kiriti akera i te moni i taua pia ra, e kua rave e kua akaoki ki te vairanga ra. I pera ratou i tera rā, i tera rā, e uipa akera te moni e manganui.

12 Kua apai atura te ariki raua ko Iehoiada i te reira ki te aronga e rave i te angaanga i te peu i te are o Iehova ra; e kua tutaki atura i te taunga tarai toka, e te tarai rakau, ei tuā i te are o Iehova; e te aronga tupaki auri, e te veo, ei akaketaketa i te are o Iehova ra.

13 Kua maroiroi rai te aronga rave angaanga ra, e kua oti takiri taua angaanga ra i to ratou rima, riro atura te are o te Atua ia ratou ra te ketaketa takere rai te ketaketa.

14 E oti akera ia ratou ra, kua apai maira ratou i te toenga o te moni, ki mua i te aroaro o te ariki ra e ia Iehoiada; kua anga akera ratou i te reira ei āriki no te are o Iehova, ei āriki no te angaanga e te atinga karakaratio; e te au punu, e te au āriki auro e te ario ra. E kare akera ratou i tukumoe i te apai i te au atinga karakaratio i roto i te are o Iehova, i te au rā katoa o Iehoiada ra.

15 Ruaine atura rā Iehoiada, e kua ope ona au rā, i mate ei ra; kua tae aia ki te anere okotai, e toru ngauru mataiti, i mate ei ra.

16 Tanumia iora aia e ratou i te oire o Davida i roto i te au ariki ra, no te mea e meitaki tana i rave ia Iseraela i te Atua, e tona are.

17 E mate aturā Iehoiada, kua aere maira te aronga mamaata i Iuda ra, e kua tupou maira ki te ariki. E kua akarongo atura te ariki kia ratou.

18 Kua akaruke maira ratou i te are o te Atua o to ratou ai metua o Iehova, e kua araara i te au Asetoreta, e te au idolo; rokoia maira Iuda e Ierusalema e te riri i taua ara na ratou ra.

19 Kua tono mairai aia i te au peroveta kia ratou e akaoki mai ia ratou kia Iehova; e kua akakite pu atura ratou i ta ratou ara: kare ra ratou i tuku mai i te taringa.

20 Tei runga ua maira te Vaerua o te Atua ia Zekaria te tamaiti a Iehoiada taunga ra, te tu ua ra aia i rungao i te tangata, e kua tuatua maira kia ratou, Te na ko maira te Atua, Eaa kotou i tatipake ei i te au akauenga a Iehova, i kore ei i manuia ta kotou? no te mea kua akaruke kotou ia Iehova, kua akaruke katoa mai oki aia ia kotou.

21 Kua kotikoti kupenga akera ratou iaia, e kua peî iora iaia ki te toka, i te akauenga a te ariki, i roto i te paepae i te are o Iehova.

22 Kare akerai te ariki ra ko Ioasa i maara i te takinga-meitaki a tona metua a Iehoiada iaia, kua ta oki aia i tana tamaiti: ko tei tuatua mai oki i te matenga ra e, Na Iehova teia e akara mai, e e tutaki mai.

23 E ope akera te mataiti, kua aere maira te nuku o Arama ki runga e tamaki iaia: kua tae maira ratou ki Iuda e Ierusalema, pou rava akera te aronga mamaata katoa o te au tangata i te mate i roto i te au tangata ra, kua akau atura i ta ratou apinga tini ki te ariki o Damaseko.

24 E nuku iti rava oki to Arama i tae maira, e nuku maata rava ra ta Iehova i tuku ki to ratou rima, no te mea kua akaruke ratou i te Atua o to ratou ai metua ia Iehova. E kua akautunga atura ratou ia Ioasa;

25 Akaruke maira oki ratou iaia, kua maata rava tona au maki, kua kotikoti kupenga akera nga tavini nona e ta iaia, i te toto oki o nga tamariki a Iehoiada taunga ra, e kua ta rava atura ratou iaia ki runga i tona roi, e mate atura: kua tanu atura ratou iaia i roto i te oire o Davida, kare ra i tanu i te menema o te au ariki ra.

26 Teia oki nga tangata i kotikoti kupenga iaia ra: ko Zabada te tamaiti a te vaine Amona a Simeata; e ko Iehozabada te tamaiti a te vaine Moabi a Simirita.

27 Ko tana au tamariki, e te maata o te teiaa i tukuia ki runga iaia, e te patu akaou anga i te are o te Atua, i na, kua oti i te tataia i roto i te tuatua a te au ariki. Tupauia akera aia i te au e te tamaiti nana ra e Amazia.