Ieremia

17 KUA tataia te ara a Iuda i te peni auri, i te keokeo daimani, kua kotikotiia ïa ki runga i te papa o to ratou ngakau, e ki runga katoa i te au tara o ta kotou au atarau;

2 E te maara ua nei rai ta ratou au tamariki i ta ratou au atarau, e to ratou au Asetoreta ra, i rotopu i te au rakau ruperupe, i runga i te au tuaivi teitei ra.

3 E toku maunga e, to apinga i roto i te kainga e, to au apinga uipa katoa, ko taku ïa e oronga atu ei apinga noni; e to au ngai teitei e ara ai ra, i toou au kotinga katoa.

4 E ko koe uaorai, e akaruke ei koe i taau tuanga, taku i oronga atu naau; e e akariro au ia koe ei tavini na toou au enemi, i te enua kitea koreia e koe na: no te mea kua ka te ai aia kotou i toku nei riri, e kare ua atu e mutu te ka anga.

5 Te na ko mairā Iehova, Kia taumaaia te tangata e irinaki ki te tangata ra, ko tei akariro i te tangata ei rima nona, e tei akaruke tona ngakau ia Iehova.

6 E riro aia mei te rakau mate ua, i te ngai motutaa ra, kare i kite i te meitaki me tae mai; ka noo ua ra aia i te ngai veravera o te medebara, i te enua taitai, tei kore i nooia ra.

7 E ao to te tangata e irinaki kia Iehova, e ko Iehova tona manako anga.

8 E riro oki aia mei te rakau i tanumia i te pae vai ra, ko tei akatoro i tona au aka na te pae kauvai, kare i kite i te veravera me tae mai; ka vai kerekere ua mairai tona rau; e kare e mae i te mataiti ua kore ra, e kare oki e tukumoe i te uua mai.

9 E pikikaa maata to te ngakau i te au mea katoa nei, e kua kino takiri: koai te kite?

10 Ko au ko Iehova, tei kimi matatio i te ngakau, tei timata i te manako; kia oronga atu au ki te tangata katoa ra i tei tau i tona ra au aerenga, tei tau i te ua o tana e rave ra.

11 Mei te manu e parai ki runga i te ua, e kare tana i anau ra, koia te tangata i rauka te apinga, e kare ra ma te tika: i rotopu i tona au rā e akaruke ei aia i taua au mea ra, e i tona openga ra, e riro ïa ei neneva.

12 E terono kakā i akateiteiia mei muatangana mairai, to tatou ïa ngai-tapu.

13 Te irinaki anga o Iseraela, ko Iehova ïa: ko te aronga katoa e akaruke ia koe ra, e akama ïa, e te akaruke iaku ra, e tataia ki runga i te enua nei, no te mea kua akaruke ratou ia Iehova, i te tumu o te vai ora.

14 Rapakau mai koe iaku, e Iehova, e ka meitaki ïa au; e akaora mai koe iaku, e ka ora ïa au: ko koe oki tei akapaapaaia e au nei.

15 I na, te tuatua maira ratou nei iaku, Teiea te tuatua na Iehova? tukua mai ïa i tenana.

16 Kare oki au i akakave ke iaku uaorai i te angai anga i murio ia koe ra: kare rai au i inangaro i te rā e mate ei ra, kua kite oki koe: to roto oki i toku nei vaa, tei mua tika ïa i to aroaro.

17 Auraka koe e riro ei mea mataku iaku: ko toku akapuanga oki koe i te rā e kino ei ra.

18 Kia taakamaia te aronga takinga-kino mai iaku ra, auraka ra au kia taakamaia: kia akamatakuia ratou, auraka ra au kia akamatakuia: e tuku mai koe ki runga ia ratou taua rā kino ra, e kia pou rava ratou i te mate pokirua ra.

19 Kua na ko mairā Iehova iaku; Ka aere ki te ngutupa o te au tamariki o te au tangata nei, tu uaʼi, i tei tomokia mai e te ui ariki o Iuda, kia aere mai ki roto ra, tei tomokia atu e ratou kia aere ki vao ra, e i te au ngutupa katoa i Ierusalema:

20 E karanga atu koe kia ratou, E akarongo mai kotou i te tuatua a Iehova, e te au ariki o Iuda e, e to Iuda katoa ra, e kotou katoa to Ierusalema, tei na teianei au ngutupa te tomo:

21 Te na ko mairā Iehova; E matakite ia kotou, auraka ei apainga e apaiia i te rā sabati, auraka e apaiia mai na roto i te au ngutupa i Ierusalema nei:

22 Auraka oki ei apainga e apaiia mai no roto i to kotou au are i te rā sabati; auraka oki kotou e rave i te au angaanga katoa ra, kia tapu ra te rā sabati ia kotou, taku oki i akaue atu ki to kotou au metua ra:

23 Kare ra ratou i akarongo, kare oki i ariu mai i to ratou taringa, akaketaketa iora ra ratou i to ratou kaki, kia kore e akarongo, e kia kore e āriki i te ako.

24 E riro oki, kia akarongo marie maira kotou iaku, te tuatua mairā Iehova, e kia kore e apai mai i te apainga na roto i te au ngutupa o teianei oire i te rā sabati, kia tapu ra ia kotou te rā sabati, e kare roa e angaanga i raveia i reira:

25 E au ariki, e te ui mataiapo, te ka tomo mai na te au ngutupa o teianei oire i reira, i te noo anga ki runga i te terono o Davida, i te oro anga na runga i te au kariota, e na runga i te au oroenua ko ratou, e te aronga nunui katoa, te au tangata no Iuda, e tei noo i Ierusalema; e e vai rai oki teianei oire e tuatau ua atu.

26 E tae mai oki te tangata no roto i te au oire o Iuda, e no te pae i vaitatao i Ierusalema, e no te enua o Beniamina, e no te ngai atea, e no te au maunga, e no apatonga i te apai anga mai i te au atinga karakaratio, e te au atinga kakara, e te apai anga mai i te atinga akameitaki, ki te are o Iehova.

27 Kia kore ra kotou e akarongo mai iaku ra, e kia akatapu i te rā sabati, auraka e apai i te apainga, kia tomo ei i te au ngutupa i Ierusalema i te rā sabati; ei reira au e tutungi ei i te ai i tona au ngutupa, e pou oki te au are ariki i Ierusalema i te reira, e kare oki e tamateia.