Salamo

97 KO Iehova te ariki; kia rekareka te enua; e te au enua rikiriki e manganui ra, kia mareka ïa.

2 Te takakoia ra aia e te au tumurangi e te poiri: ko te tuatua-tika ra, e te tuatua-tau, ko te tumu ïa o tona terono.

3 Te aere ra te ai na mua iaia, e te ka ra tona au enemi e pini ua ake.

4 Kua mārama te enua i tona ra uira: kite akera te enua, rutetetete iora.

5 Kua taravai te au maunga mei te tapou i te aroaro o Iehova, i te aroaro o te Atu o te enua katoa ra.

6 Te akakite maira te au rangi i te tuatua-tika nana, e te kite ra te tangata ravarai i tona kakā.

7 Kia akama te aronga ravarai i akamori i te au atua akatikitikiia ra; ko tei nengonengo i to ratou uaorai au idolo: e akamori iaia, e te au atua katoa ra!

8 Kua rongo Ziona, e kua rekareka; e te pingapingareka nei te au tamaine o Iuda, i te tuatua-tau naau, e Iehova.

9 E teitei maata toou, e Iehova, i te pa enua katoa nei: tei runga rava koe i te au atua katoa ra.

10 Ko kotou, tei inangaro ia Iehova, kia rikarika i te kino ra; te tiaki ra aia i te vaerua o tona aronga tapu ra; te akaora ra aia ia ratou i te rima o te aronga kino ra.

11 Kua ruruia te mārama na te aronga tuatua-tika ra, e te rekareka na te aronga e tiratiratu te ngakau ra.

12 E rekareka kotou, e te aronga tuatua-tika, ia Iehova; e akapaapaa i tona tapu ei manakoanga.