Isaia
46 TE PIKO ra Bela ki raro; kua tupou a Nebo: kua akautaia to ratou au idolo ki runga i te puaka, e ki runga i te au manu o te enua nei; e tei apai aereia e kotou ra kua akautaia ki runga, ei apainga teiaa na te au puaka roiroi ra.
2 Kua tupou ratou, kua piko anake ki raro; kare atura e tika ia ratou kia akaora i ta ratou apainga ra, kua riro katoa ratou uaorai ei tuikaa.
3 E akarongo mai iaku, e te ngutuare o Iakoba; e kotou ravarai, e te toenga o te ngutuare o Iseraela; tei ikiiki aereia e au mei te kopu mairai; e tei apaiia mei te anau anga mairai:
4 E ruaine ua atu rai kotou, ko au nei rai au; e tae ua atu ki te inaina anga o to kotou upoko naku kotou e apai; naku i anga, e maranga kotou iaku; naku ra oki kotou e apai, e naku e akaora.
5 Koai ta kotou e akatau mai iaku, e kia aite iaku? e akaaite kotou iaku kiaai, kia aiteite maua?
6 Te riringi ua ra ratou i te auro no roto i te pute, e te akaaite nei ra ratou i te ario ki te aite tautau; te ou nei i te taunga auro, e kua anga iora aia i te reira ei atua: te tupou nei ratou ki raro, e kua akamori atura.
7 Kua taoka ratou iaia ki runga i te pakuivi; kua apai aere; kua akatu oki ratou iaia ki tona ngai, e kua tu ua maira aia; kare aia e akaruke i tona ra turanga: e kia kapiki ua atu tetai kiaia, kare ra aia e îō mai; kare e tika kia akaora iaia i tona ra tumatetenga.
8 Ka akamanako i te reira, e e akatangata oki: ka akataka ana i te manako, kotou e te aronga ara e!
9 E akamaara i tei muatangana ra au mea i tei taito ra; ko au oki te Atua, e kare atu; ko au te Atua, e kare atu e aite iaku nei:
10 I te akakite anga i te openga mei te muatangana mairai, e mei te au tuatau taito mairai i te au mea e kare i tupu ra: i te na ko anga e, Ko taku te tuatua te ka mou, e tei inangaroia e au ra, ko taku ïa e rave:
11 I te kapiki anga atu i te aeto mei te itinga o te rā mai, te tangata i akonoia e au ra, mei te enua mamao mai: kua tuatua oki au, e naku rai e akatupu; kua akakoro rai au, e naku ïa e rave.
12 E akarongo mai iaku, e te aronga ngakau ketaketa; ko tei atea ke i te tuatua-tika ra:
13 Te akavaitata nei au i te tuatua-tika naku ra; kare oki e mamao ke; e te ora naku, kare ïa e tavarevareia: e oronga oki au i te ora i Ziona, no Iseraela toku nei kakā.