Ioane

21 E MURI akera, kua akakite akaou mairā Iesu iaia uaorai ki te au pipi i te roto i Tiberia ra, na ko aia i te akakite anga mai.

2 Te putuputu katoa rā Simona Petero, ma Toma, ko te karangaia ia Didimo ra, e ko Natanaela i Kana i Galilea ra, e nga tamariki a Zebedaio ra, e ko e toko rua oki puke pipi a Iesu ra.

3 Kua karanga aturā Simona Petero kia ratou, Te aere nei au e tautai. Kua tuatua maira ratou, Aere katoa tatou. Aere atura ratou i reira ra ki runga i te pai; kare ua a ratou mea ika i rauka i te reira po.

4 E popongi akera, te tu ua rā Iesu i te pae roto ra: kare ra te au pipi i kite e ko Iesu.

5 Kua tuatua mairā Iesu kia ratou, E te au tamariki ra, e manga ta kotou? Kua karanga atura ratou, Kare ua.

6 Kua tuatua maira aia kia ratou, Ka tuku i te kupenga ki te pae katau i te pai na, ka rauka ïa ta kotou. Kua tuku atura ratou, e kare ua atura e maranga ia ratou kia kika i te maata o te ika.

7 Kua karanga atura taua pipi akaperepereia e Iesu ra kia Petero, Ko te Atu. Akarongo akerā Petero e, ko te Atu tera, ka kakau iora i tona kakau i runga, ko tei vaio keia e ia ra, e rere atura ki raro i te tai.

8 Na runga maira tetai pae pipi i te boti, ma te kupenga e te ika i te kika anga mai, (kare i mamao ua ki uta, ka tau i te rua anere i te kubiti.)

9 E tae maira ratou ki uta, akara atura i te ai te ka ra, e te ika ki runga, e te manga oki.

10 Karanga aturā Iesu kia ratou, Ka rave mai na i tetai aronga i ta kotou ika i rauka ra.

11 Aere aturā Simona Petero ki runga i te boti, kika maira ite kupenga ki uta, kua ki i te ika mamaata, okotai anere e rima ngauru ma toru; kare ua ra i motu te kupenga i taua aronga ika mamaata ra.

12 Kua karanga aturā Iesu kia ratou, Ka aere mai ka kai. Kare ua ra tetai pipi i ui atu kiaia, Koai koe? i te mataku; kua kite oki ratou e, ko te Atu ïa.

13 Kua aere aturā Iesu, rave iora i te manga, kua tuku atura kia ratou ra, e te ika katoa oki.

14 Ko te tu toru teia o to Iesu akakite anga mai iaia ki te au pipi ra, i muri ake i tona tu akaou anga mai, mei te mate mai.

15 E pangia akera ratou, kua karanga aturā Iesu kia Simona Petero, E Simona a Iona e, te maata na toou anoano kiaku i teia? Kua tuatua maira aia, A, e te Atu; kua kite koe e, te anoano atu nei au ia koe. Kua karanga atura aia, Ka angai i taku au punua mamoe.

16 Kua karanga akaou atura aia kiaia, ko te tu rua ïa, E Simona a Iona e, te anoano na koe iaku? Kua tuatua maira aia kiaia, A, e te Atu, kua kite koe e, te anoano atu nei au ia koe. Kua karanga atura aia, Ka tiaki i taku au mamoe.

17 Kua karanga atura aia kiaia, ko te tu toru ïa, E Simona a Iona e, te anoano na koe iaku? Kua aue iorā Petero i te mea ka tu toru akera ona ui anga mai kiaia, Te anoano na koe iaku? E kua tuatua maira, E te Atu, kare ua e mea toe i te kitea e koe; kua kite koe e, te anoano atu nei au ia koe. Kua karanga aturā Iesu, Ka angai i taku au mamoe.

18 Tika, tika tikai taku e karanga atu kia koe, I toou ou anga, kua tatua koe ia koe uaorai, e kua aaere iora koe ki taau ngai i anoano ra: e kia ruaine koe, ka akatika koe i o rima, e na tetai ke koe e tākai, e apai atu ei ia koe i te ngai anoano koreia e koe ra.

19 Akapera atura aia i te akakite anga kiaia, i te tu o tona mate e akakakāiaʼi te Atua iaia. E oti akera taua tuatua ra, kua karanga atura aia kiaia ra, Ka aru mai iaku.

20 Kua ariu mairā Petero ki muri, kite maira i taua pipi akaperepere na Iesu i te aru anga mai, (ko tei irinaki ki runga i tona umauma i te kaingakai ra, ko tei tuatua ra, E te Atu, koai te tangata e pikikaa ia koe?)

21 Kua akara mairā Petero iaia, kua karanga atura kia Iesu, E te Atu, ka aaia teianei tangata?

22 Kua tuatua mairā Iesu kiaia, Kia anoano au i te vaoo iaia e kia tae mai au ra, eaa taau i reira? Ka aru mai koe iaku.

23 Riro atura taua tuatua ra i te au taeake ra e, kare taua pipi ra e mate: kare rā Iesu i karanga e, kare e mate: i na ko ra e, Kia anoano au i te vaoo iaia e kia tae mai au ra, eaa taau i reira?

24 Teia taua pipi ra e karanga atu i teianei au tuatua, e kua tata oki taua au tuatua nei: e kua kite oki matou e, e tuatua-mou tana i akakite ra.

25 E manganui atu rai ta Iesu peu i rave, naringa i ope katoa i te tataia, te manako nei au, kare e tika i to te ao katoa nei kia āriki mai i taua au buka ra, naringa i tataia. Amene.