1 Korinetia

3 E TEIANEI, kare akera i tika iaku, e aku au taeake, kia karanga atu ia kotou mei te aronga e akono i ta te Vaerua, mei te aronga ra e akono i ta te kopapa, e mei te tamariki mea riki ra i roto i te Mesia nei.

2 Kua angai oki au ia kotou i te u, kare i te kai pakari; kare oki i tika ia kotou i reira; kare katoa e tika ia kotou i teianei.

3 Tei ta te kopapa rai oki kotou i teianei; te vai ra oki te vareae, e te taumāro, e te pae ke, i roto ia kotou na, kare aina tei ta te kopapa rai kotou, e mei to te tangata nei rai to kotou aerenga?

4 Te karanga na oki tetai, No Paulo au; e tetai, No Apolo au; kare aina tei ta te kopapa rai kotou?

5 Koai a Paulo, e koai oki a Apolo, mari ra e orometua i akarongo ei kotou, ko ta te Atu ïa i oronga mai ia maua katoa nei?

6 Naku oki i tanu, na Apolo i tamauu ki te vai; na te Atua ra i akatupu.

7 E teianei, kare a te tanu, kare oki a te tamauu ki te vai; ko te Atua ra ko tei akatupu.

8 Te tanu, e te tamauu vai ra, okotai ra ïa: e rave tetai e tetai i tana uaorai tutaki e tau i tana uaorai angaanga.

9 E oa rave angaanga oki matou no te Atua: e koro kotou na te Atua; e are kotou no te Atua.

10 No te meitaki a te Atua i orongaia mai iaku nei, kua akamou au i te pange mei te taunga pakari i te akatu are ra, e te patu ra tetai ki rungao. E akono meitaki te tangata ravarai i te tu o tana e patu ki rungao ra.

11 Kare atu oki e pange ke e tika i te tangata ravarai kia akamou, mari ra ko tei akamouia ra, koia oki te Mesia ra ko Iesu.

12 E teianei, kia patu tetai tangata i te auro, te ario, te toka memeitaki, te rakau, te ngangaere, te teita, ki rungao i taua pange ra;

13 E akakiteia ta te tangata ravarai ra angaanga: na taua rā ra oki e akakite, e akatakaia ïa oki e te ai; e na te ai e timata i te tu o ta te tangata ravarai ra angaanga.

14 Kia toe ra te tetai ra angaanga, tana i patu ki rungao i taua pange ra, e rauka iaia te tutaki.

15 Kia ka ra ta tetai tangata angaanga, e ngere tona: koia uaorai ra te ka akaoraia ïa; mei te mea ra e, i na roto i te ai.

16 Kare kotou i kite e, ko te nao kotou o te Atua, e te noo ra te Vaerua o te Atua ki roto ia kotou na?

17 E kia akaviivii tetai tangata i te nao o te Atua ra, e mate aia i te Atua; e tapu oki te nao o te Atua, e taua nao ra, ko kotou ïa. 18 Auraka rava e tangata e tapikipiki iaia uaorai: te manako ra tetai tangata i roto ia kotou na e, e tangata pakari aia i teianei ao, kia riro aia ei neneva, kia pakari aia.

19 Te pakari oki o teianei ao, e mea neneva ïa i te Atua; kua oti oki i te tataia e, “Te taii nei aia i te aronga pakari i to ratou uaorai pakari.”

20 Tera oki tetai, “Kua kite a Iehova i te au manako o te aronga pakari e, e mea puapinga kore ïa.”

21 E teianei, auraka rava tetai e akatietie i te tangata: no kotou oki te au mea ravarai nei.

22 Ko Paulo, e ko Apolo, e ko Kepha, e teianei ao, e te ora, e te mate, e te au mea e vai nei, e te au mea a muri atu; no kotou anake rai;

23 E no te Mesia kotou; e no te Atua oki te Mesia.