1 Korinetia

4 E TEIANEI, kia manako te tangata ia matou nei e, e tavini anake no te Mesia, e e akaaere no te tuatua ngaro a te Atua ra.

2 E mea umuumuia oki i te akaaere nei, ei tangata akono tikai aia.

3 E mea ngiti poepoe rava iaku ta kotou eumiumi anga iaku nei, e i te eumiumi katoa o te tangata nei; e kare katoa au i eumiumi iaku uaorai.

4 Kare oki au nei i kite i taku nei ara; kare ra au e tika i te reira: ko te akara matatio mai iaku nei, ko te Atu ïa.

5 E teianei, auraka e akaapa atea ua; kia tae maira te Atu, nana e tuku i te atea i te au mea poiri uunaia nei, e e akakite oki i te au eumiumianga o te ngakau nei; rauka iora i te tangata ravarai te akameitaki no ko mai i te Atua ra i reira.

6 I akaarite na au, e te au taeake, i taua au tuatua nei kiaku uaorai, e kia Apolo, no kotou; kia kite kotou ia maua, e auraka kia rai to kotou manako i te tangata nei i tei tataia ra, kia kore rava tetai o kotou e akatietie iaia uaorai ki tetai kia mea ngiti atu tetai.

7 Naai oki koe e akatu ke? e eaa taau kare te mea i rauka ia etai ke ra? e i rauka taau ia etai ke ra, eaa koe i akatietie ei, mei te mea e, kare taau te mea rauka mai na etai ke?

8 Kua ki kotou i tenana; te maata na to kotou meitaki i tenana; e au akenei to kotou mei te ui ariki ra, kare ra matou: te inangaro nei rai au, ei au rai to kotou, e ei au katoa to matou ma kotou na.

9 Te manako nei au kua akataka te Atua ia matou i te au aposetolo nei ei openga, mei te aronga i akonoia no te mate ra: kua akariroia oki matou ei akaraanga na to te ao, na te au angela, e na te tangata.

10 Kua riro matou ei neneva no te Mesia nei, e aronga pakari ra kotou i te Mesia; te paruparu nei matou, te maroiroi na ra kotou; te teitei na kotou, te akaviiviiia nei ra matou.

11 Te pongi nei matou, e te kaki vai, e te putaua, e te pāpāia nei, e kare rava e nooanga mou, e tae rava akenei ki teianei ora.

12 Te rave angaanga nei matou, na to matou uaorai rima i rave: kia akakinoia mai, kua akaora atu matou; kia takinga-kinoia mai, kua akakoromaki matou;

13 Kia akakinoia ra, kua ako atu matou; kua akariroia matou mei te teita o te ao nei, mei te para o te au mea ravarai nei, e tae roa akenei ki teianei rā.

14 Kare au i tata i teianei au tuatua kia akama kotou, te ako atu nei ra au ia kotou i taku au tamariki akaperepere.

15 Raungauru ua atu rai i te tausani anga o to kotou orometua i te Mesia nei, kare e rainga to kotou metua: naku oki kotou i anau ei pipi na te Mesia ra na Iesu, i te evangelia nei.

16 E teianei te ako aroa atu nei au ia kotou e, ei aru mai kotou iaku nei.

17 I tono atu ei au i taku tamaiti akaperepere e te pikikaa kore i te Atu nei, ia Timoteo, kia kotou na, nana e akakite atu ia kotou i toku au aerenga i te Mesia nei, taku apii anga ite au ngai katoa, i te au ekalesia katoa.

18 Te akatietie na tetai papaki mei te mea e, kare au e tae atu ia kotou na.

19 E aere atura au kia kotou kare e roa, kia tika i te Atu, e e akara au i te mana o taua aronga akatietie ra, eiaa i te tuatua.

20 Kare oki tei te tuatua te basileia o te Atua, tei te mana ra.

21 Eaa ra to kotou na inangaro? e aere atu ainei au ia kotou ma te pāpā, e ma te aroa aina, e ma te ngakau maru?