Salamo

62 TE tatari nei toku vaerua i te Atua anake: nona mai oki toku ora.

2 Koia anake ra toku papa e toku ora; toku akapuanga, kare au e ngaueue rava.

3 Mei te aa te roa o to kotou akakoro anga i te kino i te tangata, kotou ravarai i te akaungaungātiti roa anga iaia, mei te patu kopupu ua ra, e te koro i ngaueue ra?

4 Oti ra ua ta ratou i kimi, ko te titiri iaia ki raro i tona ngai teitei: te anoano ra ratou i te pikikaa; te akameitaki nei to ratou vaa, te tao ra i roto. Sela.

5 E taku vaerua, ko te Atua anake taau e tatari: tei iaia oki toku manako anga.

6 Koia anake ra toku papa e toku ora: toku akapuanga, kare au e ngaueue.

7 No ko i te Atua ra toku ora e toku kakā; ko toku ïa punanga e ketaketaʼi, toku akapuanga, ko te Atua ïa.

8 E irinaki iaia, e te au tangata e, i te au tuatau katoa! e riringi i to kotou ngakau ki mua iaia! ko te Atua anake ra to tatou akapuanga. Sela.

9 E mea puapinga kore anake te au tangata rikiriki akaaka, e te au tangata teitei ra, e pikikaa ïa; kia tuku kapipiti katoaia ki roto i te aite akateiaa ra, e māmā maata to ratou i to te puapinga kore.

10 Auraka e irinaki ki te takinga-kino, auraka oki e parau i tei noniia ra: te maata ra te apinga ra, auraka e akamou te ngakau ki reira.

11 Okotai akenei a te Atua tuatua anga; ka rua akenei oku akarongo anga e, no te Atua te mana!

12 Tei ia koe katoa, e te Atu, te aroa; e tutaki maira oki koe i te tangata kia tau i tana i rave ra.