Ebera

10 E TEIANEI, e ata anake te ture no te au mea memeitaki a muri atu, kare ra i taua au mea mou ra, i kore ei i meitaki rava te aronga i aere atu i te reira, i taua au atinga i apaiia i te au mataiti katoa kare i tivata ra.

2 Naringa oki i meitaki ra, kare ïa te reira e apai akaouia, no te mea kua mā anake te aronga i akamori ra, kare ïa e manakonako akaou i te ara.

3 Kareka i te reira au atinga, kua akatupu akaouia ïa te manako i te ara i te au mataiti ravarai.

4 Kare rava e tika i te toto puakatoro e te puaka-nio kia akakore i te ara.

5 No reira te Mesia i na ko ei, iaia i aere mai ki te ao nei, “Kare koe i inangaro i te tarangaara e te atinga ra, e kopapa ra taau ïa i akono noku:

6 Te atinga karakaratio, e te tarangaara ra, kare akenei koe i mareka i te reira.”

7 “Kua karanga atura au i reira, I na, e taku Atua, te aere nei au e akatika i toou anoano, (kua tataia te tuatua noku ra i roto i te pokaikai tuatua ra.”

8 Tana oki i tuatua ra e, “Kare koe i inangaro i te tarangaara e te atinga ra; te atinga karakaratio e te tarangaara ra, kare koe i mareka i te reira:” i ta te ture ra i apai;

9 Kua na ko akera aia i reira, “I na, e taku Atua, te aere nei au e akatika i toou anoano.” Kua akakore aia i tei muatangana ra, kia akatika aia i te rua.

10 No taua inangaro e tapu ei tatou nei i te apai anga okotai i te kopapa o Iesu Mesia.

11 E tika rai oki te au taunga ravarai i te tu ua anga i te au rā katoa i te akamori anga, e te apai putuputuanga i te au atinga okotai rai tu, ko te kore rava e tika kia matara te ara ra:

12 Kareka te Mesia, oti akera tana atinga okotai i te apai ei tarangaara, noo rava atura ïa i te rima katau o te Atua ra:

13 E teianei te tatari ra e kia akariroia tona au enemi ei takainga vaevae nona.

14 Kua meitaki rava oki e tuatau ua atu te aronga i akatapuia iaia, i te atinga okotai ra.

15 Ko ta te Vaerua Tapu katoa i akakite mai kia tatou nei: oti akera oki tana i tuatua i muatangana ra e,

16 Te na ko maira te Atu, “Teia te koreromotu taku e papau ia ratou i muri ake i taua tuatau ra, E tuku au i taku au ture ki roto i to ratou ngakau, e e tataia e au ki roto i to ratou manako,” kua na ko maira oki,

17 “E to ratou kino e ta ratou au ara, kare rava au e maara akaou atu.”

18 Kua akakore anakeia oki te reira, kare atu rai e apai anga tarangaara akaou.

19 E teianei, e te au taeake, kua rauka te tomo anga mataku kore ki roto i te ngai-tapu rava no te toto o Iesu ra,

20 Taua ara ou nei ïa e te ora, i akatapuia e ia no tatou, na roto i te paruru ra, koia oki tona kopapa;

21 E e taunga maata oki to tatou i roto i te are o te Atua ra:

22 E akavaitata tatou ma te ngakau pikikaa kore, ma te akarongo mou tikai, ma te akava-ngakau i pîpî-ia, kia kore te manako kino, e ma te kopapa oreiia i te vai mā.

23 Kia piri tikai to tatou mou ranga i ta tatou tuatua ma te ngaueue kore; (e tuatua-mou oki tana ta tei tuatua maira;)

24 E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra:

25 Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.

26 Kua rauka na ia tatou te kite i te tuatua-mou ka rave inangaro mou atu ei i te ara, kare ua atu e tarangaara toe,

27 Kareka e ngarangara anga rikarika i te tutaki, i te riri viviki maata rava mei te ai ra, e pou takiri atu ei te au enemi ra.

28 Ko tei kore i akono i te ture a Mose ra, mate atura ïa i nga kite toko rua, e toko toru, kare i aroaia atu:

29 Mei te aa atu oki te maata o te mate, i to kotou manako anga, e tau ei iaia, ko tei takatakai i te Tamaiti a te Atua ki raro ake i tona vaevae, ko tei karanga i te toto o te koreromotu i tapu ei aia ra e, e mea noa ïa, e kua akavaavaa i te Vaerua nona te aroa ua ra? Kua kite oki tatou i tei karanga e,

30 “Tei iaku te akaoko, e naku e tutaki atu, te tuatua mairā Iehova.” E te na ko mairai oki, “Na te Atu e akava i tona uaorai tangata.”

31 E mea mataku maata kia rokoia e te rima o te Atua ora ra.

32 Ka akamanako ana ra i tei muatangana ra tuatau, ka akamāramaiaʼi kotou na, i akakoromaki ei i te au tamaki mamae maata ra;

33 Ka akariroiaʼi tetai aronga ei matakitaki anga ra, ma te akakinoia e te au mate; e kapiti atu ei kotou na i te aronga i akaperaia maira.

34 Kua aroa mai oki kotou iaku i toku tapeka angaia ra, e kua āriki ua kotou i te noni anga i to kotou apinga ma te rekareka, kua kite oki kotou e apinga meitaki maata ua atu ta kotou e tika i te vai marie anga tei te ao.

35 E teianei, auraka e akaruke i to kotou maroiroi, e tutaki maata oki te oko i te reira.

36 Ko te akakoromaki ra te tau ia kotou e, kia oti ia kotou te rave i ta te Atua i anoano ra, kia rauka ia kotou te tutaki i tuatuaia maira.

37 Kia roa poto ake oki, e tae mai ei te ka tae mai, e kare rava e tavare.

38 E teianei, te aronga tuatua-tika i te akarongo ra, e ora ïa: kareka ko te unui tika ki muri ra, kare rava taku ngakau e mareka iaia.

39 Kare ra tatou i to te aronga i unui ki muri e mate atu; no te aronga ra i rauka te akarongo e ora atu ei te vaerua.