Te Au Akava

8 KUA tuatua maira to Epheraima kiaia, Eaa koe i peraʼi ia matou, i kore ei koe i tiki mai ia matou, ia koe i aere e tamaki i to Midiana ra? Kua akamura rava maira ratou iaia.

2 Kua karanga atura ra aia kia ratou, Eaa taku puapinga i rave nei i ta kotou? kare aina te meitaki maata to te toenga vine a Epheraima i te vine akaū a Abiezera?

3 Kua tuku mai te Atua i nga ariki Midiana ia Oreba raua ko Zeeba ki to kotou rima; eaa oki taku puapinga iti i rauka i ta kotou na? Atiau iora to ratou riri iaia, kia karangaia atu e ia te reira tuatua.

4 Tae aturā Gideona ki Ioridana, e kua aere atura ki tetai pae, koia e te au tangata e toru anere iaia ra, kua potopoto rai te aʼo, te arumaki ua ra.

5 Kua karanga atura aia ki te au tangata no Sukota, Teia taku tuatua kia kotou, ka o mai ana etai puke areto na te au tangata e aru mai iaku nei; kua roiroi oki ratou, e te arumaki nei au i nga ariki Midiana, ia Zeba raua ko Zalamuna.

6 Kua tuatua maira te aronga mamaata o Sukota ra Tei to rima aina oki nga rima o Zeba raua ko Zalamuna i tenana, ka oronga atu ei matou i te kai ki te nuku noou ra?

7 Kua karanga aturā Gideona, I tenana, kia tukuia mai a Zeba e Zalamuna e Iehova ki toku rima nei, ka motumotu ei to kotou kopapa i te tataramoa, e te rakau taratara o te medebara nei, iaku.

8 E mei reira oki aere atura aia ki runga ki Penuela, e kua pera katoa atu aia i te tuatua anga kia ratou; e kua tuatua maira te au tangata o Penuela kiaia, mei ta te au tangata o Sukota i tuatua maira.

9 Kua karanga atura oki aia ki te au tangata no Penuela, na ko atura, Kia tae akaou mai au ma te au ra, ka ngaangaa roa teianei punanga iaku.

10 Tei Karakorā Zeba raua ko Zalamuna, e te au nuku katoa no raua ra, kua tae paa ki te okotai ngauru ma rima i te tausani, e toenga anake no te nuku katoa no to te itinga o te rā ra: okotai anere e rua ngauru i te tausani o te tangata i inga, ko tei unui i te koke ra. 11 E aere aturā Gideona na roto i te aronga i noo i te au puakapa ra, i na Noba e na Iogebea, i te pae i te itinga o te rā; taia iora taua nuku ra, te noo ponuiaau ua ra oki taua nuku ra.

12 E kia ati a Zeba e Zalamuna, kua aruaru atura aia ia raua, e rauka atura aua nga ariki o Midiana ra, ko Zeba raua ko Zalamuna; e eketumu atura taua nuku katoa ra.

13 Kua oki mairā Gideona te tamaiti a Ioasa mei te tamaki mai, mei te ngai teitei na Heresa mai.

14 E rauka iora tetai tangata ou no te au tangata i Sukota ra, e kua ui atura kiaia: e kua akakite maira aia kiaia i te tu o te aronga mamaata i Sukota ra, e te aronga pakari i reira, e itu ngauru e itu ara i te tangata. 15 Kua aere maira aia ki taua aronga tangata i Sukota ra, e kua tuatua maira, I na, ia Zeba e ia Zalamuna, i ta kotou i aviri mai iaku ra, ta kotou i tuatua maira e, Tei to rima aina oki nga rima o Zeba raua ko Zalamuna i tenana, ka oronga atu ei matou i te kai na to au tangata e roiroi na? 16 Kua rave iora aia i te aronga pakari no taua oire ra, e te tataramoa, e te rakau taratara o te medebara ra, e kua ako iora aia i to Sukota ki te reira.

17 E kua vavaʼi iora aia i te punanga i Penuela ki raro, e kua tamate rava i te au tangata no taua oire ra.

18 Kua karanga atura aia kia Zeba raua ko Zalamuna, Eaa te tu o nga tangata ta korua i ta i Tabora ra? Kua tuatua maira raua, Mei ia koe katoa ratou te tu, mei te tamariki a te ariki anake ïa.

19 Kua karanga atura aia, E taeake anake ïa noku, na toku metua vaine i anau; te ora rā Iehova, kare korua e mate iaku, naringa korua i akaora ia ratou.

20 Kua karanga atura aia ki tana tama mua ra kia Ietera, Ka tu, ka ta ia raua. Kare akerai taua tamaiti ra i unui i tana koke, te mataku ra oki aia, e tamaiti ou oki aia.

21 Kua tuatua mairā Zeba raua ko Zalamuna, Ko koe te tu mai, e ta ia maua; e tau oki to te tangata maroiroi ki tona pakari. E kua tu akerā Gideona, kua ta iora ia Zeba raua ko Zalamuna; e kua rave iora i te apinga akamanea i runga i te kaki o ta raua puke kamela.

22 Kua tuatua maira te au tangata no Iseraela i reira kia Gideona, Ei runga roao koe ia matou, ko koe e to tamaiti, e te tamaiti katoa a to tamaiti ra; kua akaora io nei oki koe ia matou i te rima o Midiana.

23 Kua karanga aturā Gideona kia ratou, Auraka au ei rungao ia kotou, e auraka katoa taku tamaiti ei tutara ki rungao ia kotou; ko Iehova te tutara ki rungao ia kotou. 24 E kua karanga aturā Gideona kia ratou, Okotai ua aku mea e pati atu ia kotou, kia oronga mai kotou ravarai e pini ua ake i te au poe i rauka ia kotou i te noni nei; e poe auro oki to ratou, e ngati Isemaela oki ratou. 25 Kua tuatua maira ratou, Ka oronga ua ïa matou i te reira. Kua oora iora ratou i tetai kakau, e kua tuku anake iora te tangata i te poe ki roto, tanao, tanao, i tei rauka iaia i te noni ra. 26 E te aiteanga o taua au poe auro tana i pati ra, okotai ïa tausani e itu anere i te sekela auro; ka taka ke atu ei te apinga akamanea, e te ei, e te kakau kutekute i runga i nga ariki o Midiana ra, e nga pirianganaoa i runga i te kaki o nga kamela a raua ra. 27 Kua anga iorā Gideona i tetai tiputa i taua auro ra, e kua tuku iora ki roto i tona uaorai oire i Ophera; tatipake atura Iseraela ravarai, aere atura i reira ki taua mea ra: riro atura taua mea ra ei ereere no Gideona, e tona ra ngutuare. 28 Vi rava akerā Midiana i mua i te aroaro o te tamariki a Iseraela ra, kare atura ratou i upokotu akaou: au iora te enua i te tuatau ia Gideona e a akera ngauru anga i te mataiti.

29 Kua aere iorā Ierubaala, te tamaiti a Ioasa, noo iora i tona uaorai ngutuare.

30 E itu ngauru anga a Gideona tamariki tamaroa, nana uaorai i anau; e manganui oki tana vaine.

31 E tamaiti oki tana i anau i te vaine tavini nana i noo i Sekema ra, ko Abimeleka tona ingoa tana i tapa. 32 Mate ruaine roā Gideona, te tamaiti a Ioasa ra, e tanumia iora ki roto i te menema o tona metua tane ra ko Ioasa i Ophera, i o te ngati Abiezera ra.

33 E mate aturā Gideona, tatipake akaou atura te tamariki a Iseraela i te aru anga i te au Baala, e kua akariro atura ia Baala-berita ei atua no ratou. 34 Kare akera te tamariki a Iseraela i manako i to ratou Atua ia Iehova, ko tei akaora ia ratou i te rima o to ratou katoa au enemi e pini ua ake.

35 Kare katoa oki ratou i takinga-meitaki i te ngutuare o Ierubaala ra, ko Gideona, i te au takinga-meitaki katoa tana i akakite atu kia Iseraela ra.