Genese

34 AERE atura te tamaine a Lea ra a Dina, tana i anau ia Iakoba ra, e akara i te au vaine o tana enua ra.

2 E kite akerā Sekema te tamaiti a Hamora ngati Hevi ra, e tangata mana no taua enua ra, iaia, kua opu iora, moe atura iaia, e kua taakaaka iora.

3 Riro atura tona ngakau kia Dina ki te tamaine a Iakoba ra, e inangaro atura aia i taua tamaine ra, kua tuatua meitaki atura ki taua tamaine ra.

4 Kua karanga atura oki a Sekema ki tona ra metua kia Hamora, na ko atura, E tiki koe i taua tamaine nei ei vaine naku.

5 Kite akerā Iakoba e, kua moe aia i tana tamaine ia Dina; no te mea ra, tei te kainga te au tamariki, tei te au puaka ra; muteki ua iorā Iakoba e tae maira ratou.

6 Aere atura te metua o Sekema ra ko Hamora kia Iakoba ra, e tuatua kiaia ra.

7 Tei te akarongo anga ratou i taua tuatua ra, kua aere maira te au tamariki a Iakoba mei te kainga mai; kinokino rava akera taua aronga tangata ra, makitakita roa akera, i tana i rave ia Iseraela, i te mea viivii, i te tamaine a Iakoba i moeia ra; kare oki te reira e tika kia rave.

8 Kua karangaranga mairā Hamora kia ratou, na ko maira, Kua inangaro roa te ngakau o taku tamaiti nei ko Sekema i te tamaine a kotou na; teia taku tuatua kia kotou, e o mai kotou iaia ei vaine nana.

9 E e akaipoipo mai kotou i to matou; o mai ta kotou au tamaine na matou, e rave mai oki kotou i ta matou au tamaine na kotou:

10 E ka noo mai kotou i o matou nei: tei mua oki i to kotou aroaro te enua nei; ka noo, e ka oko, e kia apingaia ta kotou i reira.

11 Kua tuatua mairā Sekema ki te metua tane, e te au tungane o taua tamaine ra, Kia kite aroaia mai au ki mua i to kotou aroaro na; e ta kotou e akakite mai kiaku ra, naku ïa e oronga atu.

12 E akamaata ua mai te ōra e te apinga apai ua, e ta kotou e tuatua mai kiaku na, naku ïa e oronga atu: ka o maira i taua tamaine ra ei vaine naku.

13 Kua karanga atura ra te tamariki a Iakoba kia Sekema, e tona metua ia Hamora, e tuatua pikikaa atura, no te mea, kua moe aia i to ratou tuaine ia Dina:

14 Kua karanga atura kia ratou, Kare e tika ia matou kia akapera, kia oronga i to matou tuaine ki te tangata peritome koreia; ka riro oki te reira ei akakino anga ia matou.

15 Teia ra te mea e akatika atu ei matou ia ta kotou: Kia tika ia kotou kia riro mei ia matou katoa nei te tu, kia peritomeia te au tane katoa i roto ia kotou na;

16 E oronga matou i ta matou au tamaine kia kotou i reira, e ka rave oki matou i ta kotou na au tamaine na matou, e ka noo matou i o kotou nei, e ka riro tatou ei iti-tangata okotai.

17 Kia kore ra kotou e akarongo mai kia matou nei e, e peritomeia kotou; ka rave matou i ta matou tamaine nei, e e aere matou.

18 Mareka rava akerā Hamora, e te tamaiti a Hamora ra ko Sekema, i taua tuatua na ratou ra.

19 Kare akera taua tangata ou ra i tavare i te rave i taua peu ra, no te mea, kua inangaro aia i taua tamaine a Iakoba ra: ko koia ra tei akangateiteiia i te ngutuare katoa o tona metua ra.

20 Aere aturā Hamora, e te tamaiti nana ra ko Sekema, ki te ngutupa o to ratou oire, e kua karangaranga atura ki te au tangata no to ratou ra oire, na ko atura,

21 E aronga tangata au teianei aronga i roto ia tatou nei; vaoo kia noo ua ratou i ko nei i te enua nei, oko uaʼi ta ratou oko anga i reira; e enua maata oki, kare e kapi ia ratou: e rave oki tatou i ta ratou au tamaine ei vaine na tatou, e e oronga atu oki tatou i ta tatou au tamaine na ratou.

22 Teia ra te mea e tikaʼi i taua aronga tangata nei kia noo i rotopu ia tatou, e kia riro ei iti-tangata okotai; kia peritomeia te au tane ravarai i o tatou nei, mei ia ratou katoa i peritomeia ra.

23 Kare aina e riro mai ta ratou anana, ta ratou au apinga, e ta ratou au puaka ravarai kia tatou nei? E akatika ua atu tatou i ta ratou, e ka noo ïa ratou i o tatou nei.

24 Kua akarongo maira te aronga katoa i tomo na te ngutupa o tona oire kia Hamora, e tana tamaiti ra kia Sekema; e peritomeia iora te au tane katoa, te aronga ravarai i tomo ki te ngutupa o tona oire ra.

25 Kia tae ra ki te toru o te rā ra, kia mamae ratou, kua rave akera e toko rua o nga tamariki a Iakoba ra, ko Simeona raua ko Levi, nga tungane o Dina ra, i a raua koke, tetai e tetai, kua tomo atura ki roto i te oire, kare i mataku, ta iora i te au tane ravarai e mate roa akera:

26 Ta iora oki raua ia Hamora, e te tamaiti nana ra ia Sekema, ki te mata koke, e rava atura oki ia Dina i roto i te are o Sekema ra, e kua aere maira ki vao.

27 Tei runga roa maira tetai papaki tamariki na Iakoba ra, i tei taia ra, e tairipoti roa akera taua oire ra, no te mea, kua moe ratou i to ratou tuaine ra.

28 Kua apai ke ratou i ta ratou au mamoe, e ta ratou au puaka-toro, e ta ratou au asini, ki to roto i te oire ra, e to vao katoa ra,

29 E ta ratou apinga tini ravarai; e ta ratou au vaine, e ta ratou au tamariki mea riki katoa ra, akariroia ïa ei tuikaa; e noniia iora te apinga ravarai i roto i te are.

30 Kua tuatua mairā Iakoba kia Simeona raua ko Levi, Kua tumatetenga roa au ia korua, i te akariro anga iaku ei mea viivii i te au tangata o te enua nei, i te ngati Kanaana, e te Perizi; e no te mea, e iti au nei, e riro ratou i te uipa e rave iaku, e ta; mate iora au, e toku katoa nei ngutuare.

31 Kua karanga atura raua, E rave mai oki aia i to maua tuaine, mei te rave i te akaturi ra?