Genese

35 KUA tuatua maira te Atua kia Iakoba, Ka tu, ka aere ki Betela, ka noo atu ei ki reira; ka akatu i tetai atarau i reira na te Atua, ko tei mama mai kia koe, ka oro ei koe i te mata o toou tuakana ra ko Esau.

2 Kua tuatua mairā Iakoba ki tona ngutuare, e te au tangata katoa ki ona ra, Ka akaruke i te au atua ke ke i roto ia kotou, ka tamā ana ia kotou, e kakau oki ki te kakau ke;

3 E tu tatou, e aere ki Betela; e naku e akatu i tetai atarau i reira na te Atua, ko tei akarongo mai iaku i te rā i tumatetengaʼi au ra, e ko tei vaitata mai kiaku i taua aerenga noku ra.

4 Kua apai atura ratou i te au atua ke ke katoa, ta ratou i mou ra, kia Iakoba ra, e te au poe ravarai i roto i to ratou taringa; e kua uuna iorā Iakoba ki raro ake i te ale i vaitata ki Sekema.

5 Riro atura ratou i to ratou tere: rokoia iora taua au oire ra e pini ua ake e te mataku maata i te Atua ra, kare akerai ratou e aruaru i te au tamariki na Iakoba ra.

6 Tae aturā Iakoba ki Luza, koi arai Betela, i te enua ra i Kanaana, koia e te tangata katoa ki ona ra.

7 Kua akatu iora aia i tetai atarau i reira, e tapa iora i taua ngai ra ia Eli-betela: no te mea, i mama mai te Atua kiaia i reira, ka oro ei aia i te mata o tona tuakana ra.

8 Mate iora te ikiiki ia Rebeka ra ko Debora, e tanumia iora i reira i Betela, i raro iora, i raro ake i tetai ale; tapaia iora te ingoa ia Alona-bakuta.

9 Kua mama akaou mairai te Atua kia Iakoba, i tona oki anga mai mei Padana-arama maira, e kua akameitaki maira iaia.

10 Kua tuatua maira te Atua kiaia, Ko Iakoba toou ingoa: kare toou ingoa e tuatua akaouia ia Iakoba, ko Iseraela ra toou ingoa: kua tapa iora aia i tona ingoa ko Iseraela.

11 Kua tuatua maira te Atua kiaia, Ko au te Atua Mana katoatoa; ka akakatiri, e kia maata: e iti-tangata katoa, e manganui ua atura te iti-tangata te ka tupu ia koe, e e ui ariki taau e anau.

12 E te enua taku i oronga atu kia Aberahama, e kia Isaaka, ko taku ïa e o atu noou, e no toou ra uanga i muri ake ka o atu ei au i taua enua ra.

13 Riro atura te Atua ki runga, vaoo maira iaia, i taua ngai tana i tuatua mai kiaia ra.

14 Kua akatu iorā Iakoba i te tuaau i taua ngai tana i tuatua mai kiaia ra, e tuaau toka; e kua riringi iora aia i te atinga inu ki rungao, e kua riringi katoa oki aia i te manongi ki rungao.

15 Tapa iorā Iakoba i te ingoa o taua ngai i tuatua mai ei te Atua kiaia ra, ia Betela.

16 Aere atura ratou mei Betela atu; e ngai iti te toe e tae atu ei ki Epherata; rokoiā Rahela e te mamae anau, e mamae maata tona i te anau anga mai.

17 E te maata roa ra tona mamae anau, kua tuatua maira te akaanau kiaia, Auraka e mataku; ko tetai tamaroa katoa teia naau.

18 E vaitata akera aia i te rere, mate roa akera oki aia, tapa iora aia i tona ingoa ko Benioni: tapaia iora ra aia e tona metua tane ia Beniamina:

19 Mate iorā Rahela, e tanumia iora i te arataa ki Epherata, koia Betelehema nei.

20 Kua akatu iorā Iakoba i tetai pou toka i te tanumanga ra; koia te pou i te tanumanga o Rahela ra, e tae roa akenei ki teianei rā.

21 Aere aturā Iseraela, e kua patia iora i tona puakapa i tera atu pae i Migadala-edera.

22 Te noo rā Iseraela i te reira enua, i aere ei a Reubena i moe ei i te vaine tavini a tona metua tane ra ia Bila: e akakiteia mairā Iseraela. Tino ngauru ma rua au tamariki a Iakoba:

23 Ko ta Lea ra puke tamariki; ko Reubena ïa, ko ta Iakoba ïa tama mua, e ko Simeona, e ko Levi, e ko Iuda, e ko Isakara, e ko Zebuluna:

24 Ko ta Rahela puke tamariki; ko Iosepha ïa, e ko Beniamina:

25 E ko ta Bila puke tamariki, ta te tavini vaine o Rahela ra; ko Dana ïa, e ko Naphatali:

26 E ko ta Zilipa puke tamariki, ta te tavini vaine o Lea ra; ko Gada ïa, e ko Asera: ko nga tamariki eia na Iakoba, tana i anau i Padana-arama ra.

27 Aere aturā Iakoba ki tona metua ra kia Isaaka ki Mamera ra, ki Kiriata-araba, koia Heberona nei, ki te ngai i nooia e Aberahama raua ko Isaaka ra.

28 Kua tae atura to Isaaka au rā ki te okotai anere e varu ngauru mataiti.

29 Rere takiri akerā Isaaka, mate rava akera, e kapiti katoaia atura ki tona uaorai iti-tangata, kua ruaine, e kua rai roa ona puke rā: e na nga tamariki ana ra na Esau raua ko Iakoba aia i tanu.