Genese

37 NOO iorā Iakoba i te enua i tuitarereia e tona metua, i te enua ra i Kanaana.

2 Teia te tuatua ia Iakoba ra. Tae akera Iosephā ki te ngauru ma itu o tona mataiti, te tiaki ra aia i te anana, koia e tona ai tuakana ra; tei roto rai taua tamaiti i nga tamariki a Bila, e nga tamariki a Zilipa, nga vaine a tona metua tane ra: e kua apai oki a Iosepha i ta ratou tuatua kino ki to ratou metua ra.

3 E e akaperepere maata to Iseraela ia Iosepha i tana au tamariki ravarai, no te mea e tamaiti aia no tona ruaine anga ra: e kua tui aia i tetai kakau tipurepure nona.

4 E kite akera tona ai tuakana e, e akaperepere maata to ratou metua iaia i te au tuakana ravarai nana ra, kua makitakita maira ratou iaia, e kare i tika ia ratou kia tuatua maru mai kiaia.

5 E moe ta Iosepha, e kua akakite atura ki tona ai tuakana: maata roa maira to ratou makitakita iaia.

6 Kua karanga atura aia kia ratou, E akarongo mai ana kotou i teianei moe, i moeia e au nei:

7 I na oki, te ruru ra tatou i te ruru sitona i te kainga, e i na, kua tu akera taku ra ruru, tu ua maira ki runga; e i na, kua tu akapini maira ta kotou au ruru e kako roa ake, e kua tupou maira ki taku ra ruru.

8 Kua tuatua maira tona au tuakana kiaia, E mana ainei koe ki rungao ia matou nei? e riro tika aina koe ei tutara no matou? Maata rava atura to ratou makitakita iaia i nga moe nana, e te tuatua nana.

9 Kua moe akaou iora oki aia i tetai moe, e kua akakite atura ki tona ai tuakana, na ko atura, I na, kua moe akaou rai au i tetai moe; e i na, ko te rā, e te marama, e nga etu okotai ngauru ma tai ra, tei tupou mai ïa kiaku nei.

10 Tei te akakite anga atu aia ki tona metua tane iaia, na ko maira kiaia, Eaa tenana moe i moe ei koe na? Ko au aina, e to metua vaine, e to ai tuakana, te ka aere atu ka tupou tika atu ei ki raro i te one, ki mua ia koe na?

11 Kua vareae maira tona ai tuakana iaia; kareka tona metua tane, vaoo marie iora i taua tuatua ra.

12 Kua aere atura tona ai tuakana e tiaki i te mamoe a to ratou metua i Sekema ra.

13 Kua tuatua mairā Iseraela kia Iosepha, Kare aina te tiaki ra to ai tuakana i te anana i Sekema? Ka aere mai, e tono atu au ia koe kia ratou ra.

14 Kua tuatua maira aia kiaia, Teia taku tuatua kia koe, ka aere ana koe, e akara i to ai tuakana i te meitaki anga, e te meitaki anga o te anana; ka oki akaou mai ei, e akakite mai kiaku i te tuatua. Kua tono atura aia iaia, mei te o atu mei Heberona, e tae atura aia ki Sekema.

15 E kitea iora aia e tetai tangata, e i na, te uoa aere ua ra aia i te ngangaere: kua ui maira taua tangata ra kiaia, na ko maira, Eaa taau e kimi ana?

16 Kua karanga atura aia, Te kimi nei au i toku ai tuakana: e akakite mai ana koe kiaku i ta ratou tikai anga i ta ratou au anana.

17 Kua tuatua maira taua tangata ra, Kua aere ke akenei; kua akarongo oki au ia ratou i te tuatua anga e, E aere tatou ki Dotana. Kua aru aturā Iosepha i tona ai tuakana, e rokoia atura tei Dotana.

18 Kia akara maira ratou iaia i te atea ke; kare rai aia i vaitata mai ia ratou, kua kotikoti kupenga iora ratou e ta iaia.

19 Kua karangaranga iora ratou ratou uaorai, I na, te aere mai nei taua tangata moemoea ra.

20 E teianei, e aere mai tatou, e ta iaia, ka akaruke atu ei ki roto i tetai vaarua, ka karanga atu ei tatou e, I pou i tetai puaka taae; ei reira tatou e kite ei i tana moe i te tupu anga.

21 Kia akarongo rā Reubena, kua akaora aia iaia i to ratou rima; e kua karanga atura, Auraka tatou e tamate rava iaia.

22 E kua karanga aturā Reubena kia ratou, Auraka kia taʼe te toto; e titiri ra ki raro i teianei vaarua; te medebara nei, auraka ra e ta; te akakoro ra aia e akaora iaia i to ratou rima, ka tono akaou atu ei ki tona metua tane ra.

23 E tae ua mairā Iosepha ki tona au tuakana ra, kua kiriti iora ratou i to Iosepha kakau ra, koia oki taua kakau tipurepure nona i runga iaia ra;

24 Kua arataki atura ratou iaia, titiri atura ki raro i te vaarua: kare ua ra o roto i taua vaarua ra, kare e vai o roto.

25 Kua noo iora ratou ki raro e kai i te kai; kua nānā akera to ratou mata ki runga, kite atura, e i na, tetai pouou ngati Isemaela, te aere maira mei Gileada mai, ma ta ratou au kamela, kua teiaa i te kai kakara, e te balama, e te mura, te apai ra ki Aiphiti.

26 Kua karanga aturā Iuda ki tona ai taeake, Eaa ta tatou puapinga kia ta tatou i to tatou teina, ka uuna ua atu ei i tona toto?

27 Aere mai, tatou e oko ki te ngati Isemaela, auraka ra tatou e ta iaia; e teina oki aia no tatou, ko to tatou ïa kiko aia nei. Kua akatika maira taua au taeake nona ra.

28 E tei te aerenga mai taua au tangata oko no Midiana ra i vaitata, kua totō maira ratou ia Iosepha ki runga mei raro mai i te vaarua ra, e kua oko atura ia Iosepha ki te ngati Isemaela, i nga ario okotai takau ra: kua kave atura ratou ia Iosepha ki Aiphiti.

29 Kua oki aturā Reubena ki taua vaarua ra; e i na, kare ra Iosepha i roto i taua rua ra; kua aae iora aia i tona kakau.

30 Kua oki maira aia ki tona ai taeake, na ko maira, Kare rai te tamaiti nei; ko au nei oki e, ka aere tika au nei kiea?

31 Kua rave iora ratou i te kakau o Iosepha ra, ko iora i tetai punua puaka-nio, e kua takū iora i taua kakau ra ki roto i te toto ra:

32 Kua akau atura ratou i taua kakau tipurepure, e kua apai atura ki to ratou metua tane ra, e kua karanga atura, Kua kitea e matou teianei kakau, ka akara koe, ko te kakau aina o to tamaiti, me kare?

33 Kua kite atura aia i taua kakau ra, e kua tuatua maira, No taku tamaiti te kakau! kua pou aia i tetai puaka taae: kua etieti roaiā Iosepha!

34 Kua aae iorā Iakoba i tona kakau, kua pareu iora ki te kakau paoa, aue iora i tana tamaiti e manganui te rā.

35 Kua timata iora tana katoa ra au tamariki tamaroa e te au tamaine katoa i te akapumaana iaia; kare akerai i tika iaia; e kua tuatua maira aia, E aere roa au ki raro i te vaarua ma te aue i taku tamaiti. Aue iora tona metua iaia.

36 Kua okoia ra aia e to Midiana i Aiphiti, tei ia Potiphara, e tangata taoonga i o Pharao, e rangatira no te vaeau.