Apokalupo

2 KA tata koe i te tuatua ki te angela a te ekalesia i Ephesia ra; Te na ko maira aia ko tei mou i nga etu e itu i tona rima katau ra, ko te aaere na roto i te au lamepa auro e itu ra;

2 Kua kite au i taau angaanga, e toou roiroi, e toou akakoromaki, e kare koe e tau i te aronga kikino ra: e kua timata koe i te aronga e tuatua ra e, e aposetolo ratou, e kare, e kua kite koe e pikikaa ratou:

3 E kua akatupua ua koe, e kua akakoromaki marie, no toku nei ingoa, e kua tauta marie, e kare i potopoto to aʼo.

4 Te vai nei ra taku akaapa anga ia koe, i te mea kua vaoo koe i to inangaro mua ra.

5 E tenana, ka maara i toou inga anga, e tataraara, e rave i te angaanga mua ra; kia kore ra, e aere vave atu au ia koe na, e e apai keia e au taau lamepa i tona vairanga, kia kore koe e tataraara.

6 Teia ra taau manga meitaki e tāpu na, te akaviivii na koe i te tuatua a te au pipi a Nikola, ko taku katoa e viivii nei.

7 E taringa tona ra, ka akarongo aia i ta te Vaerua e tuatua ki te au ekalesia ra; Te upokotu ra, e angai au iaia i te rakau ra i te ora, e tu i rotopu i te Paradaiso a te Atua ra.

8 E e tata koe i te tuatua ki te angela a te ekalesia i Semurina; Te na ko maira te muatangana, e te akaopenga, ko tei mate na, e te ora nei;

9 Kua kite au i taau angaanga, e toou tumatetenga, e toou ngere, (e apinga maata ra toou,) e kua kite oki au i te akakino a te aronga e karanga e, e ngati Iuda ratou, e kare, ko te sunago ra ratou no Satani.

10 Auraka koe e mataku i te au mea ravarai e rokoia mai ei koe: i na, e uri te diabolo i tetai pae o kotou ki roto i te are tapekaanga, ei timata anga ia kotou; po ngauru kotou i te mate anga; kia mou marie ra koe e tae ua atu ki te matenga, e naku e oronga atu i te korona ora noou.

11 E taringa tona ra, ka akarongo aia i ta te Vaerua e tuatua ki te au ekalesia ra; Ko te riro iaia te re ra, kare rava aia e kino i te rua o te mate.

12 E tata koe i te tuatua ki te angela a te ekalesia i Peregamo ra; Te na ko maira aia ko tei mou i te koke kokoi matarua ra;

13 Kua kite au i taau angaanga, e toou noo anga, i te ngai o to Satani terono; e te mou marie ua na koe i toku nei ingoa, e kare koe i uuna i to akarongo iaku, i te au rā i riro ei a Anitipa ei kite mou noku ra, ko tei taia i rotopu ia kotou, i te noo anga o Satani ra.

14 Te vai nei ra taku akaapa anga ia koe, i te mea tei ko na ia koe na te aronga i mou i te tuatua a Balaama ra, ko tei apii ia Balaka i te tuku i te turorianga ki mua i te tamariki a Iseraela, e te kai i te mea i akaatingaia na te au idolo, e te akaturi.

15 Tei ia koe katoa na te aronga i mou i te tuatua a te au pipi a Nikola, taku e viivii nei.

16 Ka tataraara; kia kore ra, e aere vave atu au ia koe na, e e tamaki atu au ia ratou i te koke nei i taku vaa.

17 E taringa tona ra, ka akarongo aia i ta te Vaerua e tuatua ki te au ekalesia ra; Te riro iaia te re ra, e angai ïa au iaia i te māna uunaia ra, e e oronga oki au i tetai toka teatea nana; e te ingoa ou i tataia ki rungao i taua toka ra, ko tei kore rava i kitea e tetai tangata ake, mari ra ko tei rave ra.

18 E tata koe i te tuatua ki te angela a te ekalesia i Tuatira ra; Te na ko maira te Tamaiti a te Atua, ko tei tau tona mata i te mura ai ra, e tona vaevae ra mei te veo meitaki ra;

19 Kua kite au i taau angaanga, e toou aroa, e toou takinga-meitaki, e te akarongo, e toou akakoromaki, e taau au angaanga; ko tei maata ïa i tei muatangana ra.

20 Te vai nei ra taku akaapa anga ia koe, ko koe i vaoo i tenana vaine ko Iezebela na, ko tei karanga iaia uaorai e e peroveta, kia apii ua na, e kia tapikipiki, i taku au tavini kia akaturi, e kia kai oki i te au mea i akaatingaia na te au idolo ra.

21 E kua oronga au i te taime nona kia tataraara, e kare aia e tataraara i tana akaturi.

22 I na, e uri au iaia ki runga i te roi, e te aronga katoa e akaturi iaia ra, e tumatetenga maata to ratou, kia kore ratou e tataraara i ta ratou ravenga.

23 E e ope takiri tana au tamariki iaku i te mate; e e kite te au ekalesia ravarai e, ko au tei akara matariki i te manako e te ngakau: e naku e o atu ia kotou ravarai i te tau i ta kotou angaanga.

24 Teia ra taku tuatua kia kotou, i tetai aronga i Tuatira na, i te aronga katoa kare i kite i taua tuatua nei, e kare oki i kite i te tuatua oonu a Satani, ta ratou e tuatua na, Kare atu aku teiaa ke e tuku ki runga ia kotou.

25 Ko ta kotou ra i rauka na, e mou piri tikai e kia tae atu au.

26 E te riro iaia te re ra, e te tāpu i taku tuatua e tae ua atu ki te openga ra, e oronga atu au i te mana nona ki rungao i te pa enua:

27 E e tutara aia i rungao ia ratou ma te sepeta auri ra; e e ungaungā rava ratou mei te kapu a te potera ra: mei tei tukuia mai e taku Metua iaku nei.

28 E e oronga au i te etu popongi nona.

29 E taringa tona ra, e akarongo aia i ta te Vaerua e tuatua ki te au ekalesia ra.