Iosua

9 E KITE akera te au ariki katoa i teia pae Ioridana, to runga i te maunga, e to te au o, e to te pae taatai katoa ra, i te tai maata ra, i vaitata i Lebanona ra, no te ngati Heta, e no te ngati Amori, e no te ngati Kanaana, e no te Perizi, e no te ngati Hevi, e no te ngati Iebusi;

2 Kua uipa akera ratou ravarai e tamaki ia Iosua, e Iseraela katoa, i te kapiti anga okotai.

3 E kite akera to Gibeona i ta Iosua i rave kia Ieriko ra e kia Ai.

4 Kua akapakari oki ratou, e kua akatutu karere ratou, i te aere anga mai, e kua tuku akera i te pute taito ki rungao i ta ratou au asini, e te au āriki wina piro e te motumotu, kua itikitikiia ra;

5 E te tamaka piro e te pananaki tei to ratou vaevae, e te kakau piro ki rungao ia ratou; e ta ratou kai no te momoeo kua marō anake ïa e te pueka.

6 Kua aere maira ratou kia Iosua ra, ki te puakapa i Gilagala ra, kua tuatua maira kiaia, e te au tangata katoa no Iseraela, Mei te enua mamao mai matou, e teianei e papau mai kotou i tetai koreromotu kia matou nei.

7 Kua karanga atura to Iseraela ki taua au ngati Hevi ra, Peneiake no ko nei kotou i o matou nei, eaa matou e tikaʼi kia papau i te koreromotu kia kotou na?

8 Kua tuatua maira ratou kia Iosua, Ei tavini matou noou. Kua karanga aturā Iosua kia ratou, Koai kotou? Mei ea mai kotou?

9 Kua tuatua maira ratou kiaia, Mei te enua mamao roa mai to au tavini nei, no te ingoa o to Atua ra o Iehova; kua akarongo oki matou i tona rongo, e te au mea ravarai tana i rave i Aiphiti ra;

10 E tana katoa i rae i nga ariki o te ngati Amori i tetai pae Ioridana ra, ia Sihona ariki i Hesebona, e ia Oga ariki i Basana, i noo i Asetarota ra.

11 No reira to matou aronga pakari, e te tangata ravarai o to matou enua, i tuatua mai ei kia matou e, Ka rave i te kai ei momoeo i to kotou tere, e aere kotou e aravei atu ia ratou ka karanga atu ei e, E tavini matou no kotou: e teianei e papau mai kotou i tetai koreromotu kia matou nei.

12 Teianei areto i apai maanaia mai e matou mei roto mai i to matou au are ei kai na matou, i te rā i anga tika mai ei matou, e aere mai kia kotou nei; i teianei ra, kua marō, i na, kua pueka;

13 E teianei au āriki wina i akakiia e matou nei, e mea ou ïa, e i na, kua motumotu; e to matou nei kakau, e to matou tamaka, kua piro, i te roa o te aerenga.

14 Kua rave iora te au tangata o Iseraela i ta ratou kai, kua kai, e kare akera i ui ki ta Iehova ra tuatua.

15 Kua akamoeau aturā Iosua ia ratou, e kua papau iora i te koreromotu kia ratou e, e akaora ia ratou; e kua taputou iora oki te au mataiapo o taua uipaanga ra kia ratou.

16 E ope akera nga rā e toru, i muri ake i ta ratou papau anga i te koreromotu kia ratou ra, kite akera ratou e, no reira uaorai taua aronga ra e tei o ratou uaorai te noo anga.

17 Aere atura te tamariki a Iseraela, e tae atura ki to ratou au oire i te rā toru ra. Ko taua au oire ra, ko Gibeona ïa, e ko Kephira, e ko Beerota, e ko Kiriata-iearima.

18 Kare akerai te tamariki a Iseraela i ta ia ratou, no te mea kua taputou te au mataiapo o te uipaanga i te Atua o Iseraela ia Iehova ia ratou. Kua urutoe anake iora te uipaanga i te ui mataiapo.

19 Kua tuatua akera te ui mataiapo ki taua uipaanga katoa, Kua taputou matou i te Atua o Iseraela ia Iehova ia ratou; kare oki e tika kia rave atu tatou ia ratou i teianei.

20 E akapera ra tatou ia ratou, ka vaoo ua atu tatou kia ora, ko te ririia mai aea tatou, i te taputou ta matou i taputou atu kia ratou ra.

21 Kua karanga atura te au mataiapo kia ratou, Vaoo ua atu ratou kia ora: riro atura ratou ei pāpā vaie, e ei kave vai na te uipaanga ravarai, i ta te au mataiapo i karanga atu kia ratou.

22 Kua tiki aturā Iosua ia ratou, e kua karanga atura aia kia ratou, na ko atura, Eaa kotou i pikikaa mai ei ia matou, i tuatua mai ei e, No te ngai mamao matou; e tei rotopu ia matou nei kotou te noo anga?

23 E tenana kua taumaaia kotou, kare rava kotou e toe i te akatuikaaia, ei pāpā vaie, e ei kave vai, no te are o taku Atua.

24 Kua tuatua maira ratou kia Iosua, na ko maira, No te mea kua akakite puia mai to au tavini nei e, kua akaue mai to Atua ra ko Iehova i tona tavini ia Mose e, e oronga i te enua katoa nei no kotou, e e ta i te tangata ravarai o taua enua ra, kia pou takiri rava ki mua i to kotou aroaro; mataku rava akera matou ia kotou, ko te mate aea matou, i peraʼi oki matou nei.

25 E teianei, tei to rima matou nei, i na, ko te tika ia koe e te meitaki kia rave ra, ko taau ïa e rave ia matou nei.

26 Kua akapera atura aia kia ratou, akaora iora ia ratou i te rima o te tamariki a Iseraela, kare akera ratou i ta ia ratou.

27 E akariro aturā Iosua ia ratou ei pāpā vaie i taua rā ra, e ei kave vai, na te uipaanga katoa ra, e no te atarau a Iehova, i te ngai akonoia e ia ra, e tae rava akenei ki teianei rā.