Isaia

41 KA AKARONGO muteki ua mai ana iaku nei, e te pa enua taatai e; kia akamaroiroi mai te au tangata i te maroiroi ou: kia akavaitata mai ratou; ka tuatua mai ei; e akavaitata tatou ka akatau ei i te tuatua.

2 Koai tei akatupu i te tangata tuatua-tika i te pae i te itinga o te rā, tana oki i karanga e aru iaia? kua tuku aia i te au enua kiaia, e kua eke te au ariki iaia, kua riro ta ratou koke mei te one-pueu iaia, e mei te ota puia keia ta ratou ana.

3 Kua arumaki ra aia ia ratou; e kua aere ua ra ma te ora; i na te ara kare i takaiia e tona vaevae.

4 Naai i akonokono e kua rave oki? nana na tei tuatua ki te au uki mei te akamata anga mairai; ko au ïa ko Iehova, te muatangana, e tei te akaopenga, ko au nei ra.

5 Kua akara te au enua taatai, e kua mataku; kua ruketekete te au openga o te enua nei; kua akavaitata mai ratou; e kua aere mai.

6 Kua tauturu ratou ravarai i tona uaorai tangata tupu; e kua tuatua ki tona taeake, E akamaroiroi.

7 Kua akamaroiroi maira te akatikitiki rakau i te tupaki auro; ko tei tamaniania i te amara i te tupakipaki ki runga i te pange ra; te tuatua ra aia e, E mea meitaki te tapou nei: e kua patiti ra aia ki te nairo, kia kore e akakeuia.

8 Ko koe ra, e Iseraela e, ko toku ïa tavini; ko koe oki, e Iakoba, taku ïa i iki, te uanga o toku oa o Aberahama:

9 Ko taku ïa i rave mai mei te openga mai o te enua ra; e kua kapiki atu ia koe mei tona kotinga roa mairai; e kua karanga atu au kia koe, Ko toku tavini koe; kua ikiia koe e au, kare oki au e akaruke ia koe.

10 Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe; koia ïa, e mou au ia koe i toku rima katau tuatua tika ra.

11 I na, te aronga ravarai i riri mai ia koe ra, e akama ïa, e akatumatetengaia; ka riro ratou ei puapinga kore; tei māro mai ia koe ra, e pou ïa,

12 Naau ratou e kimi, kare ra ratou e kitea atu e koe, te au tangata i māro ma ia koe ra: e riro ratou mei te mea kare ra, e mei te puapinga kore, te au tangata i tamaki mai ia koe ra.

13 Ko au oki to Atua ra, ko Iehova, ko tei akamaroiroi i to rima katau ra; ko tei tuatua atua ia koe e, Auraka e mataku, naku koe e tauturu.

14 Auraka e mataku, e tera ra toke e Iakoba; e ko kotou, te aronga paruparu o Iseraela e; te na ko mairā Iehova, Ko au toou tauturu, e toou ra Akaora, ko Tei Tapu i Iseraela nei.

15 I na, ka akariro au ia koe ei porotata pāpā sitona ou, ma te nio taratara: e naau e pāpā i te au maunga, e ungaunga roa akera, e naau e akariro i te au tuaivi mei te ota ra.

16 Naau ratou e ruru, e ka puia keia ratou e te matangi: e na te puaioio ratou e akapueu ke: e rekareka ra koe ia Iehova; e rere ua koe i te rekareka i Tei Tapu i Iseraela nei.

17 Te ao, e te aronga apinga kore kua kimi i te vai, e kare ra, te pakapaka ua ra to ratou arero i te kaki vai: Naku na Iehova e akono atu ia ratou; e kare au, te Atua o Iseraela, e akaruke ia ratou:

18 Naku e ko i te au taʼeanga vai i te au ngai teitei ra, e te vai pupui i rotopu i te au o ra: e akariro au i te medebara ei punavai, e te enua keremarō ra ei vai pupui ua ra.

19 E akatupu au i te arezi i te medebara, te sitima, te maire, e te rakau mori; e tanu oki au i te berusi i te enua marō ra, te paina, e te tasura, i te tanu anga okotai;

20 Kia akara ratou, e kia kite, e kia akamaaraara, e kia kite pu tikai e, na te rima o Iehova teia i rave, e na Tei Tapu i Iseraela nei i anga.

21 E tuku mai i ta kotou tuatua, te tuatua mairā Iehova; e akakite mai i ta kotou tuatua ketaketa, te pera maira te ariki o Iakoba.

22 E akavaitata mai ratou, ka akakite mai kia tatou i te au mea te ka tupu: te au mea taito ta ratou e akakite mai eaa ïa, kia kimi oki tatou, e kia kitea te openga o te reira au mea; e kare ra, e akakite mai i te au mea te ka tupu a muri atu.

23 E akakite mai i te au mea te ka tupu a muri nei, e kite ei matou e, e atua kotou: koia ïa, ka rave i te mea meitaki, e kare ra, ka rave i te kino, kia tumatetenga matou, e kia mataku katoa oki.

24 I na, e iti rai kotou i te puapinga kore; e ta kotou e rave ra, e iti ïa i te puapinga kore rai; e viivii maata tona to tei inangaro ia kotou na.

25 Kua akatu au i tetai no te pae i apatokerau ra, e nana e aere mai; e kapiki mai aia i toku nei ingoa mei te itinga mai o te rā ra: e takatakai aia ki runga i te ui ariki ra, mei te ngaika ra; mei te potera e takatakai i te karakaraea ra.

26 Naai i akakite mai mei te akamata anga mairai, e kite e tatou nei? mei muatangana mai oki, kia karanga atu tatou e, Kua tika ïa? Kare rava tetai i akakite mamao mai; kare rava tetai i tuatua mai; koia ïa, kare rava tetai i kite i ta kotou tuatua.

27 Ko au ana tei tuatua kia Ziona, I na, i na ratou nei: e kua oronga i te karere tuatua rekareka kia Ierusalema.

28 Kua akara iora au e, kare e tangata; e ki roto oki ia ratou ra, e kare ua e tumu korero, iaku i ui atu ia ratou, e tika kia tuatua mai.

29 I na, e mea puapinga kore anake ratou, ta ratou angaanga e mea puapinga kore rai; to ratou au idolo i akatoia ra, e matangi ïa, e te tarevakaua.