Salamo

69 E AKAORA koe iaku, e te Atua e: te maremo nei au i te vai:

2 Kua topa au ki raro i te vari ooko, kare rava e turanga: kua tae au ki te vai oonu roa; kua na runga iaku te vai puke.

3 Kua potopoto toku aʼo i te aue anga: kua marō toku karaponga: kua ruarua toku mata i te tatari anga i taku Atua.

4 E iti te rauru o toku upoko i te aronga i makitakita tumu kore ua mai iaku; te mana nei toku au enemi pikikaa i anoano mai iaku nei kia mate: tei iaku te akaoki i tei kore i raveia e au ra.

5 E te Atua e, kua kite koe i toku auouo; e taku nei au apa, kare ïa i ngaro ia koe.

6 E tenana, auraka noku nei ratou e akamaʼi, tei tapapa atu kia koe, e te Atu Sabaota, e Iehova; auraka noku nei ratou e raungaraʼi, tei kimi ia koe, e te Atua o Iseraela.

7 Noou tikai i akakoromaki ei au i te akakino; i purokuiaʼi toku mata i te akama.

8 Kua riro au ei tangata ke ki toku au taeake nei, e mei te tangata kitea kore ki te au tamariki a toku metua vaine ra.

9 No te mea kua riro roa au i te maroiroi i to are; te akakino a te aronga i akakino ia koe ra, kua iri mai ïa ki runga iaku.

10 Kia aue au ra e kia taakaaka i toku vaerua ma te akakore i te kai, kua akariroia ïa ei akakino anga iaku.

11 Kia kakau au ki te kakau paoa ra, kua riro au ei tuatua anga na ratou.

12 Te aronga i noo i te ngutupa ra tei tuatua akakino mai iaku; kua riro au ei amuamu anga na te aronga konā kava.

13 Kareka au nei, tei ia koe taku pure, e Iehova; ia koe, e te Atua, i te tuatau e kiteia mai ei ra; e akarongo mai koe iaku i te aroa maata noou ra, te tuatua-mou oki o te ora naau ra.

14 E kiriti koe iaku i te vari nei kia kore au e maremo; kia ora au i te aronga i makitakita mai iaku nei, e i te vai oonu.

15 Auraka te vai puke kia taʼe na runga iaku; e auraka au kia apukuia e te moana; auraka te vaarua kia momani i tona vaa iaku nei.

16 E akarongo mai iaku, e Iehova, e mea meitaki roa oki te takinga-meitaki noou ra: e akono mai iaku i te aroa maata noou ra.

17 Auraka oki koe e uuna i to mata i to tavini nei; te tumatetenga nei oki au: kia ngakoikoi i te akarongo mai iaku.

18 E akavaitata mai ki toku vaerua kia ora; kia ora oki i toku nei au enemi.

19 Kua kite koe i te akakino iaku, toku akama, e toku aringaringa; tei mua oki i toou aroaro toku au enemi katoa ra.

20 Kua paruparu toku ngakau i te akakino; kua vaitata rava au i te mate: i tapapa oki au i tei aroa mai, e kare ua; e te akapumaana mai, kare rava i kitea e au.

21 Kua apai mai ratou i te apinga kava ei kai naku; e i toku kaki vai anga ra, kua apai mai i te vinega e inu.

22 Ka riro ta ratou kaingakai ra ei ereere i mua ia ratou; e te mea i meitaki ei ratou ei kupenga.

23 Ka avarevare to ratou mata kare e tika kia akara; ka ruketetete uaorai oki to ratou taukupu.

24 Riringi mai i to riri akaoko ra ki runga ia ratou, e kia rokoia ratou e te otooto anga o toou ra riri.

25 Ka riro to ratou au punanga i te tanea; e kare rava e tangataia to ratou au puakapa.

26 Te takinga-kino nei ratou i tei taia e koe ra, e te tuatua akataitaia mai nei ratou i tei paruparu ia koe ra.

27 E kapiti koe i te ara ki ta ratou ra ara: e auraka ratou e o mai ki taau ra tuatua-tika.

28 Ka taparaparaia ratou i te tuatua a te aronga e ora ra; kare e tataia i roto i te aronga tuatua-tika ra.

29 Kareka au nei, kua akaaka ïa, e te taitaia: na te ora naau, e taku Atua, e apai iaku ki runga.

30 Ka akapaapaa au i te ingoa o te Atua i te imene; ka akamaata au iaia i te akameitaki;

31 E mea tau maata to te reira ia Iehova, i to te puakatoro tara pakari, e te maikuku ra.

32 Ka kite tei akaaka ra i te reira ma te rekareka; to ratou ngakau, to te kimi i te Atua ra, ka ora ïa.

33 E akarongo mai oki a Iehova i te aronga akaaka ra, e kare oki e akavaavaa i tona tangata i tapekaia ra.

34 Na te au rangi e na te enua e akapaapaa iaia; te moana e te au mea katoa e tere aere i reira.

35 Ka akaora rai oki te Atua ia Ziona, e nana e patu i te au oire i Iuda ra; ka noo oki ratou i reira, kia riro kia ratou:

36 Ka riro ïa ki te uanga o tona au tavini, e te aronga i inangaro i tona ra ingoa te ka noo i reira.