Mika

5 E AKAPUTUPUTU marie mai koe, e tera ra tamaine o te au motuanga toa ra: kua akapiniia tatou: kua taia e ratou te paparinga o te akava ra o Iseraela ki te rakau.

2 E mea ngiti rai koe, e Betelehema Epharata, kia kapiti katoa ki roto i te au tausani i Iuda ra, e tae maira aia kiaku nei mei roto mai ia koe ra, ko te ka riro ei tutara i Iseraela nei; mei ito mairai oki tona au aerenga, mei tupua rava mai.

3 E teianei, ka tuku atu aia ia ratou, e kia tae ki te tuatau e anau mai ei te ka anau ra, ei reira e oki mai ei te toenga o tona au taeake ki te au tamariki a Iseraela.

4 E tu ua aia ma te angai i tana anana, ma te ririnui o Iehova, ma te mekameka o te ingoa o tona ra Atua ko Iehova, e tika marie oki ratou i te noo anga; e maata oki aia i reira e tae rava atu ki te au openga mai o te enua ra.

5 E riro taua tangata nei e, ko te au ïa. Kia kaitamaki mai to Asura ki to tatou nei enua, e kia takatakai aia i to tatou au are ariki, ei reira tatou e akatupu ei ei patoi iaia i nga tiaki mamoe toko itu, e nga tangata ariki toko varu.

6 E pou oki te enua ra o Asura ia ratou i te koke, e te enua o Nimeroda i te tomoanga atu: e akaoraia oki tatou e ia i to Asura, kia tae mai aia ki to tatou nei enua, e kia takai aia i to tatou nei au kotinga.

7 E vai rai te toenga o Iakoba i rotopu i te tangata e manganui, mei te au no ko ia Iehova ra; mei te ua toungaunga ki runga i te ngangaere ra, tei kore ïa e tatari ki te tangata nei, kare oki e tapapa ki ta te tangata nei au tamariki.

8 Ei vai rai oki te toenga o Iakoba ki roto i te au enua ra, ki roto i te au tangata e manganui, mei te liona i rotopu i te au puaka o te vaorakau ra, mei te liona ou i rotopu i te au anana mamoe ra, kia aere ua aia na roto ra, kua takatakai ïa ki raro, e kua aeae ua ake, e kare e akaora.

9 E akateiteiia to rima ki runga i to au ekai ra, e ka ope rava to au enemi i te tipu keia.

10 E i taua rā ra, te tuatua mairā Iehova, e tipu keiaʼi e au taau aronga oroenua i roto ia koe na, e e pou to au kariota iaku:

11 E e tipu keia e au te au oire o to enua, e naku e uri i to au punanga ketaketa ra ki raro:

12 E e tipu keia e au te au purepure i to rima na, e kare atura oou e akara tumurangi:

13 E e tipu keia e au to au tiki kotikotiia ra, e to au tiki akatuia i rotopu ia koe ra; e kare rava koe e akamori akaou i tei angaia e to rima ra.

14 E e kiriti tumuia e au to au Asetoreta i roto ia koe, e e pou to au oire iaku.

15 E tutaki atu oki au ma te riri e te riri otooto, ki runga i te au enua kare i akarongo ra.