Zephania

3 AUE tona to tei meameaau e te viivii, te oire akateimaa e!

2 Kare aia i akarongo i te reo; kare aia i āriki i te ako; kare aia i irinaki kia Iehova; kare aia i akavaitata atu ki tona Atua.

3 Tona ra ui ariki i roto iaia ra, e liona ngunguru ïa; tona ra au akava, e luko aiai ïa; kare ratou e ngau i te au ivi i te popongi.

4 Tona ra au peroveta, e au tangata tarevakaua ïa e te pikikaa; kua akaviivii tona ra au taunga i te mea tapu, kua rave kino ratou i te ture.

5 Tei roto iaia a Iehova tuatua-tika ra, kare aia e rave i te mea tika kore; te tuku nei aia i tana tuatua-tau ki te mārama i te au popongi katoa, kare ua e kore anga i te reira, kare ra te tangata tuatua-tika kore e kite i te akama.

6 Kua tipu keia e au te pa enua; kua tanea to ratou au punanga; kua meamea ua to ratou au arataa iaku, e kare ua e tangata e na reira te aere: kua pou to ratou au oire; kare ua e tangata, kare ua e tangata kia noo.

7 Kua tuatua oki au, Kia mataku ua mai koe iaku; kia āriki mai koe i te ako; kia kore tona nooanga e tipu keia, mei te au mea katoa i akonoia e au nona: kua tu popongi metua ra ratou, kua akakino ratou i ta ratou au ravenga ravarai.

8 E tapapa mai ana ra iaku, te tuatua mairā Iehova, e kia tae ki te rā e tu ei au ki runga i taku e ka noni ra; teia oki taku i akakoro ana e akaputuputu i te pa enua, e uipa mai i te au basileia; kia riringi atu au i toku mainaina ki runga ia ratou, i te vera anga o toku riri kia ope; e pou rava oki te enua katoa nei i te ai ra i toku nei vareae.

9 Ei reira oki au e tuku atu ei i te vaa viivii kore ki te au tangata nei, kia tautopa katoatoa ratou i te ingoa o Iehova; kia tavini atu ratou iaia ma te manako okotai.

10 Mei ko roa mai i te au kauvai i Kusa ra, te aronga e pure iaku ra, te tamaine a toku aronga i akapueurikiriki keia ra, e apai mai ïa i te atinga naku ra.

11 I taua rā ra, kare koe e akama i taau au ravenga katoa i ara ai koe iaku ra; ei reira oki au e akataka ke atu ei i rotopu ia koe i toou aronga akatietie, kare oki koe e akateitei akaou ia koe uaorai i runga i toku maunga tapu ra.

12 E vaoo ra au i roto ia koe i te au tangata akaaka e te ao, e ka irinaki ratou i te ingoa o Iehova.

13 Kare te toenga o Iseraela e rave i te kino; kare oki ratou e tuatua i te tuatua pikikaa; kare oki e arero pikikaa e kitea i roto i to ratou vaa; ka kaikai oki ratou, e ka akāvai ki raro, e kare ua tetai e akamataku mai.

14 Ka imene, e te tamaine a Ziona; ka maeva, e Iseraela; kia pereperekavana, e kia rekareka ma te ngakau katoa, e te tamaine a Ierusalema.

15 Kua apai keia e Iehova taau ra au utunga; kua akapeke aia i toou ra au enemi; tei roto ia koe ra te ariki o Iseraela, ko Iehova: kare koe e kite akaou i te kino.

16 I taua rā ra ka tuatuaiaʼi Ierusalema, Auraka e mataku; e Ziona e, Auraka e parukaua to rima.

17 Ko to Atua ra ko Iehova, tei roto ïa ia koe, ko tei ririnui ïa; nana rai e akaora; e rekareka aia i runga ia koe ma te pereperekavana, e noo marie aia i roto i tona aroa; e rekareka aia i runga ia koe ma te imene.

18 E akaputuputu au i te aronga e aue i te au uipa anga tapu ra, no roto oki ratou ia koe; te aronga i akakoromaki i te akakino anga iaia.

19 I na, i taua tuatau ra e raveia atu e au te aronga katoa i kino ei koe ra: e akaora oki au i tei pirikoki, e akaputuputu mai au i tei tuaruia kia vao, e naku e akatupu i te paapaa e te rongonui ia ratou i roto i te au enua katoa i taakamaiaʼi ratou.

20 I taua tuatau ra e akaoki mai ei au ia kotou, i taua tuatau rai e akaputuputu ei au ia kotou: e akatupu oki au i to kotou ingoa, e te paapaa ia kotou, i roto i te pa enua katoa o te enua nei, kia taruri ke au i to kotou tuikaa anga ki mua i to kotou mata, te tuatua mairā Iehova.