1 Korinetia

1 KO Paulo, i akonoia e te inangaro o te Atua ei aposetolo na Iesu Mesia, e to tatou taeake nei ko Sositene,

2 I te ekalesia a te Atua i Korinetia na, tei akatapuia i roto i te Mesia ra ia Iesu, i akonoia ei aronga tapu, e te aronga katoa e tautopa atu i te ingoa o to tatou Atu ra o Iesu Mesia i te au ngai katoa ra, to ratou e to tatou katoa oki:

3 Ei ia kotou te aroa ua, e te au, no ko mai i te Atua i to tatou Metua ra, e te Atu oki ia Iesu Mesia nei.

4 Te akameitaki atu nei au i taku Atua ia kotou kare i tivata, i te aroa ua o te Atua i orongaia mai e te Mesia ra e Iesu ia kotou na;

5 Kua rai oki ta kotou iaia, i te au mea ravarai nei, i te au tuatua katoa, e te au kite katoa;

6 E kua akakite puia te tuatua o te Mesia ki roto ia kotou na.

7 Kare akenei kotou i topa ki muri i te au meitaki ravarai nei; i te tatari anga i to tatou Atu ia Iesu Mesia i te mama anga mai:

8 Nana e akatinamou ia kotou e tae ua atu ki te openga, auraka ei akakinoanga i te rā o to tatou Atu ra o Iesu Mesia.

9 E tuatua-mou ta te Atua, i akonoiaʼi kotou no te kapitianga a tana Tamaiti a to tatou Atu a Iesu Mesia.

10 E teianei, e te au taeake, te ako atu nei au ia kotou i te ingoa o to tatou Atu ra o Iesu Mesia, e ei tuatua okotai ta kotou ravarai, e auraka ei pae ke i roto ia kotou na; kia kapiti marie ra kotou ma te ngakau okotai e te manako okotai.

11 Kua akakiteia mai au ia kotou, e aku au taeake, e to te ngutuare o Keloe, e e taumāro anga tei rotopu ia kotou na.

12 Teia taku tuatua, te karanga na kotou e, No Paulo au; e no Apolo au; e no Kepha au; e no te Mesia au.

13 Kua mavete aina te Mesia? e ko Paulo aina tei akasatauroia no kotou? e i bapetizoia aina kotou ki roto i te ingoa o Paulo?

14 Te akameitaki nei au i te Atua i te mea kare au i bapetizo i tetai o kotou na, mari ra ko Keripo e ko Gaio:

15 Ko te karanga aea tetai e, kua bapetizo au iaia ki roto i toku nei ingoa.

16 E kua bapetizo katoa au i te kopu-tangata o Setephana: kare atu aku tangata i kite i te bapetizo angaia e au.

17 Kare oki te Mesia i tono iaku e bapetizo, e tutu aere ra i te evangelia: eiaa ra ma te pakari tuatua, ko te riro aea oki te satauro o te Mesia ei mea puapinga kore.

18 Ko te tuatua oki i te satauro nei, e tuatua neneva ïa i te aronga e mate, kareka ia tatou i akaoraia nei, ko te mana ïa o te Atua.

19 Kua tataia oki e, “E akakore au i te pakari o te aronga pakari, e e akariro au i te kite o te aronga i kite ra, ei mea puapinga kore.” 20 Teiea te tangata pakari? teiea te tata tuatua? teiea te tangata taumāro i teianei ao? kare aina kua akariro te Atua i te pakari o teianei ao ei neneva?

21 Kare akera to te ao i kite i te Atua i to ratou uaorai pakari, i te ravenga pakari a te Atua ra, inangaro akera te Atua i te akaora i te aronga akarongo i te mea neneva ra i te ako.

22 Te pati ra oki te ngati Iuda i te akairo, e te umuumu ra te Eleni i te pakari;

23 Te tuatua nei ra matou i te Mesia akasatauroaia ra, ei turorianga no te ngati Iuda, e e mea neneva i te Eleni;

24 Kareka i te aronga i karangaia ra, te ngati Iuda e te Eleni katoa, ko te mana ïa o te Atua e te pakari o te Atua, te Mesia nei.

25 E pakari maata to te mea neneva a te Atua nei i to te tangata nei pakari: e maroiroi maata to te apikepike o te Atua i to te tangata nei maroiroi.

26 Te kite na oki kotou, e aku au taeake, i to kotou kapiki angaia e, kare e rai te tangata pakari i te akonoanga i te kopapa nei, kare e rai te tangata mana, kare e rai te tangata ngateitei anau i kapikiia:

27 Kua iki ra te Atua i te au mea neneva o te ao nei, ei taakama atu i te aronga pakari; e kua iki oki te Atua i te mea parukaua o teianei ao, ei taakama atu i te aronga maroiroi;

28 E te au mea akaaka o te ao nei, e te au mea akavaavaaia ra, e te au mea kare ra, ko tei ikiia ïa e te Atua, ei akakore i te au mea e vai nei:

29 Kia kore rava te tangata kia akatietie ki mua iaia.

30 E teianei nona kotou i karangaiaʼi e, tei roto kotou i te Mesia ra ia Iesu, ko tei akariroia e te Atua ei pakari, ei tuatua-tika, ei tapu, e ei ora, no tatou:

31 Kia tau i tei tataia ra e, “Ko tei akatietie ra, kia akatietie aia i te Atu.”