Salamo

96 E IMENE ia Iehova i te imene ou: e imene ia Iehova, e te pa enua katoa nei.

2 E imene ia Iehova, e akameitaki i tona ingoa; e akakite i te ora nana i tera rā i tera rā.

3 E akakite i tona kakā i rotopu i te au etene; tana ra au angaanga taka ke i roto i te au tangata katoa ra.

4 E maata oki a Iehova, e kia maata tona akapaapaa angaia: Kia matakuia oki aia, auraka te au atua katoa.

5 Te au atua ravarai o te au etene ra, e idolo ïa: ko Iehova ra tei anga i te au rangi ra.

6 Te kakā e te akangateitei tei mua i tona mata; te ririnui, e te manea, tei tona ïa ngai-tapu.

7 O atu kia Iehova, e te uanga o te au tangata e, o atu kia Iehova i te kakā e te ririnui.

8 O atu kia Iehova i te kakā e tau ki tona ra ingoa: ei taoonga-rima te apai mai me tomo ki tona ra au paepae.

9 E akamori ia Iehova i te are tapu kakā ra; kia rutetetete kotou ki mua iaia, e te pa enua ravarai ra:

10 Ka tuatua i rotopu i te pa enua e, ko Iehova te ariki: e akamou katoaia teianei ao, kare ïa e ngaueue. Te akava aia i te au tangata ma te tuatua-tika.

11 Kia mareka te au rangi ra, e kia rekareka te enua, kia aruru te tai e tona ki katoa ra.

12 Kia pereperekavana te au kainga e to roto katoa ra; ei reira e pingapingarekaʼi te au rakau katoa o te vaorakau ra,

13 Ki mua i te aroaro o Iehova; te aere maira oki aia, te aere maira oki aia, e akava i te enua nei: e akava aia i to te ao nei ma te tuatua-tika, e te au tangata ra ma te tuatua-mou nana ra.