Esetera

9 TAE akera ki te ngauru ma rua o te marama, i te marama ra ko Adara, i te rā okotai ngauru ma toru o taua marama ra, kua vaitata te taime e tupu ei te tuatua e te ture a te ariki ra, i te rā i manako ei te enemi o te ngati Iuda e vi ïa ia ratou, (riro atura ra, e ko te ngati Iuda tei mana ki rungao i te aronga i riri mai ia ratou ra:)

2 Kua akaputuputu iora te au ngati Iuda i to ratou au oire e pini ua ake i te au enua katoa o te ariki ra o Ahasueru, e opu atu to ratou rima i te aronga i umuumu mai ia ratou kia takinga-kino: e kare rava akera e tangata e tikaʼi kia mou i mua ia ratou; kua rokoia oki te tangata ravarai e te mataku ia ratou.

3 E te au tutara katoa o te au enua ra, e te au tauturu, e te au rangatira, e te aronga akataoongaia i o te ariki ra, kua tauturu ratou i te au ngati Iuda; no te mea kua rokoia ratou e te mataku ia Moredekai.

4 Maata atura oki a Moredekai i te are o te ariki ra, riro atura oki tona rongo e pini ua ake te au enua katoa ra, tupu ua atura oki taua tangata ra ko Moredekai i te maata anga.

5 Pou atura te au enemi o te au ngati Iuda i te taia e ratou ki te koke, e mate atura, e pou atura ratou, e kua rave atura i to ratou anoano i te aronga i makitakita mai ia ratou.

6 E i roto oki i te are o te ariki ra i Susana, e rima anere o te tangata i tamate ravaia e te au ngati Iuda.

7 E ko Parasanata, e ko Dapona, e ko Asaphata,

8 E ko Porata, e ko Adalia, e ko Aridata,

9 E ko Paramasata, e ko Arisai, e ko Aridai, e ko Vaiezata,

10 Te au tamariki tino ngauru a Hamana te tamaiti a Hamedata, te enemi o te ngati Iuda, kua taia ïa e ratou; kareka te apinga no taua noni ra, kare to ratou rima i rave ua atu i te reira.

11 Tei taua rā ra, te rainga o tei taia i te are o te ariki ra i Susana, kua apaiia mai ïa ki mua i te ariki ra.

12 Kua karanga atura te ariki ki te ariki vaine kia Esetera, Kua taia e te ngati Iuda te au tangata e rima anere, e kua mate takiri rava, i te are o te ariki ra i Susana, e te au tamariki katoa a Hamana tino ngauru, mei te aa ra ta ratou i rave i te au enua katoa o te ariki nei? e tenana, eaa toou anoano? ka akatikaia atu ïa; eaa taau e pati mai nei? ka raveia ïa.

13 Kua tuatua mairā Esetera, Kia tika i te ariki ra, e tuku ua atu koe apopo ki te au ngati Iuda i Susana, kia pera akaou mei te ture i raveia i nakonei, e ka ri rai te au tamariki a Hamana tino ngauru katoa ki runga i te ringa ra.

14 Kua akaue atura te ariki e akapera: tukuia iora te ture i Susana; riia iora te au tamariki a Hamana tino ngauru katoa.

15 Kua akaputuputu iora te au ngati Iuda i Susana i te rā okotai ngauru ma a i te marama ra ko Adara, e kua ta iora i te au tangata e toru anere i Susana, kareka te apinga no taua noni ra, kare to ratou rima i rave ua atu i te reira.

16 Kareka tetai papaki ngati Iuda i roto i te au enua o te ariki ra, kua akaputuputu iora, e akamaroiroi ia ratou uaorai kia ora, e akaangaroi akera i to ratou au enemi; mate iora to ratou au enemi e itu ngauru ma rima i te tausani ia ratou, kareka te apinga no taua noni ra, kare to ratou rima i rave ua atu i te reira.

17 E tae akera ki te rā okotai ngauru ma toru i te marama ra ko Adara, e te ngauru ma a oki o te rā i taua marama ra, kua akaangaroi iora ratou, akariro atura ïa ei rā kaingakai e te rekareka.

18 Kareka te au ngati Iuda i Susana tei te rā okotai ngauru ma toru to ratou uipa anga, e te rā okotai ngauru ma a; e i te rā okotai ngauru ma rima o taua marama ra, kua akaangaroi iora, akariro atura ei rā kaingakai e te rekareka.

19 I akariro ei te au ngati Iuda i noo i te au vila, i roto i te au oire patu koreia ra, i te rā okotai ngauru ma a i te marama ra ia Adara, ei rā rekareka, e te kaingakai, ei rā meitaki, e ei akau anga i te tuanga na tetai e na tetai.

20 Tata iorā Moredekai i taua au tuatua nei, e kua akau atura i te au leta ki te au ngati Iuda ravarai i te au enua katoa o te ariki ra o Ahasueru, ko tei vaitata e tei te mamao ke,

21 Ei akamou teia i o ratou ra, kia akono ratou i te rā okotai ngauru ma a e te ngauru ma rima o te rā, i te marama ra ko Adara, i te au mataiti katoa ra;

22 Ko nga rā ïa i raukaʼi to te ngati Iuda akaangaroi i to ratou au enemi, e te marama i akariroiaʼi to ratou aue ei rekareka, e to ratou eva ei rā meitaki: kia akariro ratou i aua nga rā ra ei rā kaingakai, e ei rekareka anga, e ei akau anga i te tuanga na tetai e na tetai, e kia orongaia atu te apinga na te aronga ao.

23 Kua akatika maira te au ngati Iuda e akapera ta ratou i rave ra, mei ta Moredekai i tata mai kia ratou;

24 No te mea na te enemi o te au ngati Iuda katoa, na Hamana te tamaiti a Hamedata e ngati Agaga, i akakoro i to te ngati Iuda mate, e kua tuku i te Pura, koia te kelero nei, e rave ia ratou kia pou, e kia pou takiri rava;

25 Kia tae rā Esetera ki roto i te ariki ra, kua akaue aia i roto i te au leta e kia akaokiia mai tana ravenga kino tana i akakoro i te au ngati Iuda ki runga i tona uaorai mimiti, e kia riia aia e tana au tamariki ki runga i te ringa ra.

26 Tapa iora ratou i aua nga rā ra ia Purima, no te tuatua ra ko Pura. E no te au tuatua katoa o teianei leta, e te au mea katoa ta ratou i kite ra, e tei rokoia mai ratou ra,

27 Kua akono oki te au ngati Iuda, e akatika ratou uaorai, e to ratou uanga, e te aronga katoa e kapiti mai kia ratou e, e akono tikai ratou i aua nga rā e rua i te au mataiti katoa ra, kare e akatopaia, mei tei tataia a mai e te tuatau i akonoia no ratou ra;

28 E kia manakoia eianei puke rā, e kia akonoia, i te au uki katoa ra, i te au kopu-tanga ravarai, i te au enua katoa, e te au oire katoa; e auraka rava eianei puke rā Purima kia topa i te au ngati Iuda nei, e auraka rava kia ngaropoina i to ratou ra uanga.

29 Kua tata iora te ariki vaine ra ko Esetera, te tamaine na Abihaila, e ko Moredekai ngati Iuda, ma to raua ra mana katoa, ei akatinamou i teia leta rua ia Purima.

30 E kua akau atura aia i te au leta ki te au ngati Iuda katoa, i te au enua okotai anere e rua ngauru ma itu i te basileia o Ahasueru, ma te au tuatua au e te tuatua-mou;

31 Ei akatinamou i aua puke rā Purima i te taime i akonoia ra, i ta te ngati Iuda ra i ta Moredekai, e ta te ariki vaine ra i ta Esetera, i akono no ratou, e ta ratou uaorai oki i akakoro no ratou, e to ratou uanga, te au tuatua i te akakore anga i te kai, e te pure.

32 Mou rava atura taua au tuatua Purima ra i te tuatua a Esetera, e kua tataia ïa i roto i te buka.