Daniela

12 E I TE reira ra tuatau e tu mai ei te ariki maata ra ko Mikaela, ko tei tu mai ei tika no te tamariki a toou ra au tangata: e i reira te tuatau manamanata, kare e aite mei te tupu anga mai o te enua ra e tae rava atu ki taua tuatau ra: e i taua tuatau ra e oraʼi toou au tangata, te aronga ravarai i kitea e kua tataia ki roto i te buka ra.

2 E manganui to tei moe ki raro i te one-pueu o te enua nei e ara mai, ei te ora mutu kore tetai pae, e tetai pae ra, ei te akama ïa, e te akavaavaa mutu kore.

3 E te aronga i apii ra, e kakā mai, ïa mei te kakā o te rangi ra; e ko tei akaariu i te tangata e manganui ki te tuatua-tika ra, mei te au etu ïa, e tuatau e tuatau ua atu.

4 Ko koe na ra, e Daniela, e popani i teianei au tuatau, e topiri atu i te buka e tae ua atu ki te tuatau openga ra: e manganui te ka oro ki runga e ki raro, e tupu atura te kite i te maata anga.

5 Kua akara atura au nei, ko Daniela, e i na, te tu ua maira i e toko rua rai, tei teianei nia kauvai tetai, e tei tera nia kauvai tetai.

6 E kua tuatua maira tetai ki te tangata i kakau ki te orongā, ki runga ake aia i taua kauvai ra, Mei te aa te roa e taeaʼi te openga o teianei au mea i umereia nei?

7 Akarongo atura oki au i te tangata i kakau ki te orongā i runga ake i taua kauvai ra, iaia i tataki i tona rima katau e tona rima kaui ki runga i te rangi, ka taputou ei iaia i tei ora ra e tuatau ua atu, e okotai rai tuatau, e nga tuatau oki, e te vaenga o tetai tuatau; e kia ope rava te akapueurikiriki ke anga o te aronga tapu ra, e ope ei teianei au tuatau i te tupu.

8 Te akarongo atura au, kare ra au i kite, e kua karanga atura au i reira, E te Atu, eaa ra te openga i teianei au mea?

9 E kua tuatua maira aia, Ka aere, e Daniela: kua popaniia taua tuatua nei, e kua sigiloia e tae ua atu ki te tuatau openga ra.

10 E manganui te ka tamāia, e ka akateateaia, e ka timataia oki; e rave ra te aronga kino i te kino; kare oki tetai o te aronga kino e kite, e kite ra te aronga pakari.

11 E mei te tuatau e apai keiaʼi te atinga no te au rā ra, e e akatuiaʼi te mea rikarika e taneaʼi ra, e riro okotai ïa tausani e rua anere e iva ngauru i te rā.

12 E ao ra tona to te tapapa marie, e tae rava atu ki te okotai tausani e toru anere e toru ngauru ma rima i te rā.

13 E aere ra koe i toou ra aerenga, e tae ua atu ki te openga: ka akaangaroi oki koe, e ka tu atu rai koe i to tuanga i te openga o te au rā ra.