Isaia

29 E AE oki Ariela e, Ariela e, te oire i nooia e Davida e! ei mataiti rai te mataiti, ka akono atu rai te au oroa.

2 E tinaimate rai au ia Ariela; e vai oki te aue e te mii ki reira; ka riro rai oki te reira ei Ariela iaku nei.

3 E akapini au ia koe i te puakapa; e e rave akapini au ia koe i te koro; e akāu oki au i te punanga ia koe.

4 E tuku akaakaaia koe ki raro rava, mei te mea no raro mai te repo taau tuatua anga mai; e rikiriki mai toou reo mei raro mai i te one-pueu ra, e mei raro mai i te one toou reo, mei to te taura vaerua kino ra, e ei raro koe i te one-pueu koumuumu ua mai ei kia tuatua.

5 Kareka te urupu maata o to au enemi ra, e riro ïa mei te ungaungā one mea ngiti ra, e te maata katoa o taua aronga e mataku roaia ra, mei te ota ïa i akapueu keia ra: e kare te reira e roaia, i te kamoanga mata nei rai.

6 E atoroia mai koe e Iehova Sabaota ra, ma te mangungu, e te ngaruerue enua, e te reo maata; ma te uriia, e te tipi, e te mura o te ai kakai ra.

7 Mei te moe oki, mei te rikamoe i te po ra, mei te reira katoa te tangata katoa o te pa enua ra, ko tei tamaki ia Ariela; te aronga katoa e tamaki atu, e tei takinga-kino atu iaia, e te punanga katoa nona ra.

8 Mei te mate pongi kia rokoia e te moemoea, e ana ra aia e, te kaikai ra; kia ara maira, kare ua e pangia tona kaki: mei te tangata e kaki vai ra kia rokoia e te moemoea, e ana ra aia e, te inu ra aia; kia ara maira, i na, kua uti ua te manava, e kua maata rai te kaki vai: e pera rai te tangata katoa o te pa enua ra, ko tei tamaki ki te maunga ra kia Ziona.

9 Ka nonoo ana kotou, e kia va ua ana; akanavenave kotou, e kia akamatapoia mai: kua kona ratou, kare ra i te wina; kua turorirori ratou, kare ra i te kava kona.

10 Kua riringi oki a Iehova i te vaerua moe maata ki rungao ia kotou na, e kua tapiri aia i to kotou mata, te au peroveta: e to kotou mimiti, to te au akara ra, tana ïa i tapoki.

11 E kua riro taua orama katoa ra mei te tuatua ki roto i te buka i topiriia ra ia kotou, tei tukuia atu ki te tangata kite i te tatau tuatua ra, ka na ko atu ei, Ka tatau ana koe i teia, taku ïa tuatua kia koe: e te tuatua maira aia, Kare e rauka iaku; no te mea kua topiriia.

12 E kia tukuia oki taua buka ra ki te tangata kite kore i te tatau tuatua, ka na ko atu ei e, Ka tatau mai ana koe i teia, taku ïa tuatua kia koe: te tuatua maira aia, Kare au i apiiia i te tatau tuatua.

13 I tuatua mai ei te Atu, No te mea te akavaitata mai nei teianei aronga iaku i to ratou vaa, e te akameitaki maira to ratou ngutu iaku, tei te atea ke ra to ratou ngakau iaku nei; e to ratou mataku iaku nei, e mea apii uaia i te tuatua a te tangata anake ra:

14 E teianei, i na, e rave atu rai au i te ravenga vavariaia, e te poitirere; kare atu oki te karape o to ratou aronga karape ra, e te kite o to ratou aronga akono ra, e ngaro ke ïa.

15 E ae oki to ratou to tei kimi i te mea oonu e uuna i ta ratou ravenga ia Iehova, tei te poiri ta ratou angaanga, e ko te akapera e, Naai tatou e akara mai? koai te kite mai ia tatou?

16 Te aronga manako ketaketa e! e akaariteia ainei te potera ki te karaea? e tuatua ainei oki te angaanga ki te taunga, Kare aia i anga iaku? e tuatua ainei tei angaia ki tei anga iaia, Kare ona e kite?

17 Ka roa ainei ka kore ei e arite Lebanona ki te kainga ua maata, e e manakoiaʼi te kainga ua maata ra ei enua rarorakau ra?

18 Kia tae ki te reira rā e akarongo ei te turi i te tuatua o te buka, e mei roto mai i te kareureu, e te poiri, e kite ei te mata o te aronga matapo tikai ra.

19 E akamaata te aronga maru i to ratou rekareka ia Iehova, e rere ua te tangata putaua i te rekareka i Tei Tapu ia Iseraela ra.

20 Ko tei rikarikaia ra oki, kua kore ïa; kua pou oki te taitoito, e ko tei aruaru i te kino ra, kua tipu keia ïa.

21 Ko tei akaapa i te tangata i te tuatua, e kua tuku oki i te ereere i tei ako mai i te ngutupa ra, e kua akatatipake puapinga kore ua i te aronga tuatua-tika ra.

22 E teianei, te na ko mairā Iehova ki te ngutuare o Iakoba ra, ko tei akaora ia Aberahama ra, Kare Iakoba e akama akaou, kare oki e tea akaou tona rae.

23 Kia kite oki tana au tamariki i te angaanga a toku rima i rotopu ia ratou ra, e riro na ratou uaorai e akatapu i toku nei ingoa; e e akatapu ratou i Tei Tapu i o Iakoba ra, e ruketekete oki ratou i te Atua o Iseraela ra.

24 E te aronga i ē te ngakau ra e rauka te kite i reira, e te aronga i upokoango ra, e akarongo ïa i te ako.