Iobu

39 KUA kite ainei koe i te tuatau e anau ei te au puaka-nio momoavao? naau ainei e tiaki i te au aili kia anau mai?

2 E tika ainei ia koe kia tatau i te rainga o te au marama i akaopeia e ratou? e te tuatau e anau ei ratou, te kite ra ainei koe?

3 Kua akamingi maira ia ratou uaorai ki raro, e anau iora ta ratou au punua, kore akera to ratou mamae.

4 Maroiroi atura ta ratou au punua, raʼi akera ratou i te ngai atea ka ua; aere ke atura, e kare e oki akaou mai kia ratou.

5 Naai i tuku i te asini momoavao kia aere ua ana? e naai i tatara i te au tapeka o te asini momoavao?

6 Tei akariroia e au te medebara ei are nona, e te enua taitai ei nooanga nona.

7 Te kata ua maira aia ki te urupu o te oire, e te vaa o te arumaki kare aia i akono mai.

8 Ko te au maunga ko tana ïa one-kai, e te au rakau tupu ou katoa ra tana i kimi aere.

9 E riro ainei te puakatoro taetaevao ei tavini noou, e noo ainei aia ki vaitatao i taau ra vairanga kai?

10 E mou ainei te puakatoro taetaevao ia koe i te taura ki runga i te rua arote? e arote ainei aia i te au o i murio ia koe?

11 E irinaki ainei koe iaia, no te mea e ririnui tona? e tuku ainei koe i taau angaanga kiaia?

12 Te manako ra ainei koe iaia, ei apai mai i taau ra sitona ki te ngutuare, e ei akaputuputu ki taau ra vairanga?

13 Te takapakapa navenave o te peau renanima e! e takinga-meitaki ainei tona peau e te uruuru ra?

14 Kua tuku aia i tona ua ki raro i te one, e kua tamaanaana i te reira ki roto i te one-pueu.

15 E kare i manako e ka takaiia e te vaevae, e ka ngaangaa i te puaka momoavao.

16 Kua akono kore aia i tana uaorai anauanga, mei te mea kare tana: angaanga puapinga kore tana i te mataku kore;

17 Na te Atua oki aia i akangere i te pakari, kare oki i oronga mai i te kite nona.

18 Kia akamaroiroi ra aia iaia uaorai e oro, kua kata aia i te oroenua ma tona katoa ra akaoro.

19 Naau ainei i oronga i te ririnui ki te oroenua ra? naau ainei i vaî i tona kaki ki te mangungu?

20 Naau ainei i rere ei aia mei te tāpaki ra? te maata o tona mapu anga, e mea rikarika ïa.

21 Te eru ra aia i te o, e te rekareka ra i te ririnui: te aere atura e aravei i te rakau tamaki.

22 Te kata ra aia i te mataku, e kare ua e taitaia; e kare e oki mai i te mata koke ra.

23 E kerekererepuapinga kore ua te pia kakao ki runga iaia, te korare kanapanapa e te tao.

24 Kua apuku ua i te enua i te akataae e te riri: kare rai oki e mou kia tangi te pu ra.

25 I te tangi anga o te pu ra, te na ko ra aia, E tika oki; e te ongi ra i te tamaki i te ngai mamao, te maeva o te kau toa, e te aoa-tamaki.

26 Noou ainei te pakari i rere ei te neza ra, e i totoaʼi ona peau ki te pae ki apatonga ra?

27 E naau ainei i akaue i te aeto i rere ei ki runga ra, ka angaʼi tona koanga ki runga take ra?

28 Ki runga i te mato tona noo tamou anga, ki runga i te puku mato ra, e te ngai ketaketa.

29 I reira tana kimi anga i te kai, te kite ra ona mata i te mamao ke.

30 Na tana au punua oki e ngote i te toto: e tei te vairanga o tei taia ra, tei reira aia.