Salamo

132 E IEHOVA, e akamanako mai ia Davida, e tona katoa ra au tumatetenga; 2 Iaia i taputou kia Iehova, e kua tia i Tei Mana i o Iakoba, 3 Kare rai au e tomo i te puakapa ra, i toku are, kare oki au e aere ki runga i toku roi; 4 Kare au e oronga i te moe ki toku mata, te tiromoe ki toku topiri-mata: 5 Kia kitea ra e au tetai ngai no Iehova, tetai nooanga no Tei Mana i o Iakoba nei. 6 I na, kua akarongo akenei tatou i Epherata; kua kite akenei tatou i te au kainga i Ieari ra. 7 Taki aere tatou ki roto i tona ra puakapa: tatou e akamori i tona pae vaevae. 8 Ka tu, e Iehova, ka tomo ki roto i to akaangaroianga; ko koe e te aruna o to maroiroi. 9 Kia akakakauia te au taunga naau ki te tuatua-tika, e kia maeva toou aronga tapu ra i te rekareka. 10 No to tavini nei, no Davida, auraka koe e akaanga ke i te mata o tei akamainuia e koe ra. 11 E tuatua-mou ta Iehova i taputou kia Davida, kare rava oki aia e ariu ke i taua mea ra, No te uanga o to kopu taku e tuku ki runga i to terono. 12 Kia akono mai taau ra au tamariki i taku koreromotu, e taku au tuatua-akakite, taku e apii atu ia ratou, ka noo katoa ta ratou au tamariki ki runga i to terono e tuatau ua atu. 13 Kua iki oki a Iehova ia Ziona, kua inangaro aia ei nooanga nona: 14 Ko toku akaangaroianga teia e tuatau ua atu; ei ko nei au noo ei, ko toku ïa inangaro. 15 Ka akameitaki roa au i te au kai nana: ka merengo tona au tangata rikiriki i te kai iaku. 16 E akakakau rai au i tona au taunga ki te ora, ka imene nui oki tona aronga tapu ra i te rekareka. 17 Ei reira au e akatupu ei i te tara o Davida; kua akono au i tetai lamepa no tei akatainuia e au ra. 18 E akakakau au i tona au enemi ki te akama; e kakā ra tona korona i runga iaia uaorai.