Daniela

11 I TE mataiti mua o Dariu te ngati Madai, e tu ei au i vaitatao, ei akatinamou iaia, e ei akamaroiroi oki.

2 E teianei, e akakite atu au ia koe i te tuatua-mou. I na, e toko toru rai ariki te ka tu mai ki runga i Peresia; e te toko a ra, e apinga maata roa tana i ta ratou katoa ra: e i te maroiroi nona, no tana apinga maata, e akaaraaraʼi aia i te au tangata katoatoa e tamaki i te basileia o Eleni.

3 Ei reira e tu mai ei tetai ariki ririnui, e e tutara aia ma te mana maata, ka rave oki aia i tana uaorai i inangaro.

4 Kia akatinamouia ra aia, e pueurikiriki ei tona basileia, e ka tuaia ki nga matangi e a o te rangi ra; kare ra no tona uaorai uanga, kare ra e aite ki tona mana ka tutaraʼi aia ra: e kiriti tumuia oki tona basileia no tetai aronga ke atu rai kare ratou nei.

5 Ka ririnui oki te ariki no te apatonga, e tetai o te ui ariki ki ona ra, e riro oki tona re iaia ra, e koia atura te ka tutara; e riro oki tona mana ei mana maata.

6 E kia ope etai au mataiti i uipa ei raua ra: e riro oki te tamaine a te ariki i apatonga ra i te aere mai ki te ariki no apatokerau ra e papau i tetai koreromotu, kare ra te mana o te rima e tāpuia e ia, kare oki aia e mou, e kare oki tona uanga: e tukua keia ra aia, e te aronga i arataki mai iaia, e tana katoa i anau ra, e koia katoa ko tei tauturu mai iaia i taua au tuatau ra.

7 No te uri ra no te aka nona tetai i te tu anga mai ei tupau iaia, te ka aere mai ma te nuku katoa, e tomo oki ki roto i te punanga o te ariki i apatokerau, e rave oki aia ia ratou, e e riro te re iaia.

8 E to ratou au atua, e te au tiki i akatoia ra, e to ratou au āriki ario memeitaki e te auro, ko tana ïa e apai tuikaa atu ki Aiphiti ra, e ka rai tona au mataiti i te tutara anga i to te ariki i apatokerau ra.

9 E kia tae aia ki te basileia o te ariki i apatonga, ka oki mai aia ki tona uaorai enua.

10 Ko tana au tamariki ra, ka akatupu ratou i te tamaki, e urupu toa maata ta ratou e akaputuputu: e tae mairai tetai, e maringi ua mai ïa, e aere atura oki na rotopu, ei reira aia e oki ei ka tamaki e tae rava atu ki tona punanga.

11 Ka tupu oki te riri o te ariki i apatonga, e e aere mai aia ki vao e tamaki kiaia, ki te ariki oki i apatokerau ra, e urupu maata tana e akamou i te tamaki kiaia; e tukuia ra taua urupu ra ki roto i tona rima.

12 E kia apai keia e ia taua urupu ra, e akateiteiia tona ngakau; manganui atura ra te tausani anga te ka inga iaia, kare ra e riro ei maroiroi nona.

13 E oki mai oki te ariki i apatokerau, ma te urupu maata roa e iti tei muatangana kia akamou i te tamaki ra, e kia topa etai au mataiti ra e tae mai ei aia ma te nuku maata e te apinga maata.

14 E i te reira au tuatau e manganui te ka tu mai ki runga e tamaki ki te ariki i apatonga ra: e te au tamariki o te aronga āru i o toou au tangata ra te ka akateitei ia ratou uaorai, ei akatinamou i taua orama ra; e inga ra ratou.

15 E tae mai oki te ariki i apatokerau ra, e akāū oki i te one, e rave oki i te au oire i koroia ra, e te au rima i apatonga ra, e te au tangata ikiia nona ra, kare ïa e mou mai, kare oki e maroiroi e mou mai ei ra.

16 E ko te ka aere mai e tamaki iaia, e rave aia i tana uaorai i inangaro, e kare rava e tangata e mou ki mua iaia: ka mou ra aia ki te enua inuinu ra, e pou rava ïa i tona rima.

17 E riro katoa oki aia i te anga i tona mata e akao atu ma te ririnui o tona basileia katoa, koia ma te aronga tiratiratu katoa ra; e akapera oki aia; ka oronga oki aia i te tamaine o te au vaine ra nana, ei takinokino iaia; kare oki aia e mou i tona pae, e kare oki e riro nona.

18 E muri ake i te reira e ariu ei i tona mata ki te au enua motu, e manganui te ka pou iaia; na tetai tangata mana ra e akakore i taua akakino i uriia ki runga iaia, e apai maira aia i te akakino ki runga iaia uaorai.

19 Ei reira aia e ariu ei i tona mata ki te au punanga i tona uaorai enua: e turori ra aia e inga atu, e kare e kitea.

20 Ei reira e tu mai ei tetai ei tupau iaia, ko te ka tono i tetai umuumu apinga aere i te inuinu o taua basileia ra, e ope akera etai puke rā e mate roaʼi aia, kare ra i te riri, e kare rai oki i te tamaki.

21 E tu mai oki ei tupau iaia ra tetai tangata akaviiviia ra, kare e orongaia atu e ratou te ngateitei o te basileia kiaia: e aere au ua maira aia, e e rauka iaia te basileia i te taparu.

22 E i te ririnui vai puke ra e ngaromiaʼi ratou ki mua iaia, e ka atiatiia; koia tika rai, ma te ariki katoa i akakoreromotuia ra.

23 E muri ake i te koreromotu i papauia kiaia ra, e pikikaa mai ei aia ra: e kake mai oki aia, e riro oki ki te maroiroi ma nga tangata tokoiti ua.

24 E tomo au ua aia ki roto i te enua au ua e te ruperupe; ka rave oki aia i tei kore i raveia e tona metua, e nga metua o tona ra metua; ko te apinga āru, e te apinga noni, e te au apinga nui, ko tana ïa e titiri aere i rotopu ia ratou: e akakoro oki aia i tana ravenga i te au punanga ketaketa ra e tae atura ki tetai tuatau.

25 E akaaraara oki aia i tona ririnui, e tona maroiroi ki te ariki i apatonga ma te nuku maata; e ka akaaraaraia taua ariki i apatonga ra e tamaki ma te nuku maata ua atu e te ririnui; kare ra aia e mou mai; e riro oki ratou i te akakoro i ta ratou ravenga iaia.

26 Koia ïa, na tei kai i tana ra kai e ta iaia; e e nina uaia tana ra nuku, e tei taia e manganui ka inga ki raro.

27 E ko te manako o nga ariki toko rua nei, ko te takinga-kino ïa, e tuatua oki raua i te tuatua pikikaa i te kaingakai okotai ra; kare ra e manuia: kia tae oki ki te tuatau i akonoia ra, ko te openga iora ïa.

28 Ei reira aia e oki ei ki tona uaorai enua ma te apinga nui; e akakore oki tona ngakau i te koreromotu tapu ra; ka riro aia i te rave i tona inangaro ka oki atu ei ki tona uaorai enua.

29 I te tuatau i akonoia ra e oki akaou ei aia ki te pae ki apatonga ra; kare ra e riro mei tei muatangana, e mei tei muri ake oki.

30 Ko te au pai oki no Kitima te ka aere mai e tamaki iaia: e riro oki aia i te kinokino, e ka oki, e ka riri rava atura ki te koreromotu tapu ra: e kia oki ra e akatupu ei; e kapiti oki aia i tana tuatua ki te aronga e akaruke i te koreromotu tapu ra.

31 E nana e taki i te au nuku ra, e na ratou e akaviivii i te ngai-tapu i ririnui ei ra, e ka akakore i te atinga no te au rā, ka tuku mai ei i te mea rikarika e taneaʼi ra ki roto.

32 E te aronga e ara i te koreromotu ra e riro i te kino maata i te taparu ra: ko te aronga ra i kite i to ratou Atua ra, e riro i te maroiroi, e te rave oki i te ravenga.

33 E te aronga pakari o te tangata e manganui te ka apiiia e ratou ka inga ra ratou i te koke, e te mura ai, e i te tuikaa anga, e i te noni anga, e manganui te rā.

34 E kia inga ratou ra, e turuia mai ratou i te turu mea ngiti ua: e manganui ra te ka piri mai ia ratou ma te taparu ua.

35 E inga oki tetai pae i taua aronga pakari ra, ei timata anga atura ia ratou, e ei tamā atu, e ei akateatea ia ratou, e tae ua atu ki te tuatau openga ra: no te mea te vai ra taua tuatau i akonoia ra.

36 Ko te ariki ra, e rave aia i tana uaorai i inangaro; e akateitei oki aia iaia uaorai, e akamaata oki iaia uaorai i runga i te au atua katoa, e tuatua aia i te au tuatua variaia i te Atua no te au atua ra, e riro oki i te manuia, e kia ope rava te riri i te akatupuia: ko tei akonoia ra, te ka rave tikaia ïa.

37 Kare aia e akono i te Atua o tona ra ai metua, e te inangaro o te vaine; kare aia e akono i te au atua katoa ra: e akamaata oki aia iaia uaorai kia tu ke i te au mea katoa ra.

38 I tona ra ngai aia e akangateitei ei i te atua o te au punanga ra: e atua oki tei kore i kitea e tona ra ai metua, ko tana ïa e akangateitei, ma te auro, e te ario, e te au toka memeitaki, e te au mea inangaroia ra.

39 Ka akapera oki aia i te au punanga ketaketa roa ra, ma te atua ke katoa, ko tana ïa e akakite aere, e ka akamaata atu oki i te kakā: e akamana atu aia ia ratou ki runga i te tangata e manganui, ka tua oki i te enua kia apingaia.

40 Kia tae ra ki te tuatau openga e opara mai ei te ariki i apatonga ra iaia: e aereia maira aia e te ariki no apatokerau ra, mei te puaioio ra, ma te kariota, ma te tangata akaoro oroenua ra, e ma te pai katoa e manganui; e akao katoa atu ki roto i te au matakeinanga, e maringi ua atu e ka na roto i te aere.

41 E akao katoa oki aia ki roto i te enua inuinu ra, e manganui te enua te ka uritumuia atu; ko teia ra te ka ora i taua rima nona ra, koia oki ko Edoma, e ko Moabi, e te maata oki o te au tamariki o Amona.

42 E akatika katoa ra oki aia i tona rima na runga i te pa enua: e kare oki te enua ra ko Aiphiti e ora.

43 E e mana ra aia ki runga i te au apinga auro, e te ario, e ki runga oki i te au apinga memeitaki ravarai o Aiphiti ra: ko to Lubi, e to Etiopia, tei tona takainga vaevae ïa.

44 E pekapeka ra aia i te tuatua no te itinga o te rā mai e no apatokerau: e aere ei aia ma te riri maata kia pou, e kia ngaro rava atu te tangata e manganui.

45 E tatangi oki aia i te puakapa o tona are ariki ki rotopu i nga tai ra ki runga i te maunga tapu kakā ra; e tae ra aia ki tona uaorai openga, e kare rava ona e tauturu.