Apokalupo

8 E KIA vavaʼiia e ia te itu o te akairo ra, e muteki anga tei runga i te rangi e mei te vaanga ora tika te roa.

2 E kua akara atura au i nga angela toko itu i tei tu ki mua i te aroaro o te Atua ra; e e puke pu e itu tei apaiia mai kia ratou ra.

3 Kua aere maira tetai angela, tu iora ki mua i te atarau ma te kapu auro i te mou ranga, e e rakau kakara maata tei apaiia mai iaia ra, kia apai aia ma te pure a te aronga tapu katoa ki runga i te atarau auro i mua i te terono ra.

4 Peke kapipiti iora te au o te rakau kakara i te rima o taua angela ra, e te pure a te aronga tapu ki runga, ki mua i te aroaro o te Atua ra.

5 Kua rave iora te angela i taua kapu ra, akaki iora i te ai no runga i te atarau ra, kua titiri maira ki runga i te enua; ko te aruru iora, e te mangungu, e te uira, e te ngaueue o te enua.

6 Kua akateateamamao iora nga angela toko itu, i mou i nga pu e itu ra, e akatangi.

7 Kua akatangi tetai angela i tana, ko te ua toka maira i muringao, e te ai i irokia i te toto, e tiria maira ki raro ki runga i te enua nei; pou iora te toru o te tuanga o te enua nei i te pakapaka, pou iora te toru o te tuanga o te au rakau ra i te pakapaka, pou iora oki te au ngangaere mata katoatoa i te pakapaka.

8 Kua akatangi maira te tokorua o te angela i tana, e mei te mea kua tiria tetai maunga maata e ka i te ai ra ki raro i te tai: e riro atura te toru o te tuanga o te tai ra ei toto;

9 Mate atura te toru o te tuanga o te au mea ora ki raro i te tai ra; e te toru o te tuanga o te au pai ra, pou iora ïa.

10 Kua akatangi te toko-toru o te angela i tana, e kua topa maira tetai etu maata mei te rama mura ra no runga mai i te rangi, topa maira ki runga i te toru o te tuanga o te au kauvai ra, e ki rungao i te au vai pupui ra;

11 E te ingoa o taua etu ra i tapaia, ko Maramara ïa; maramara atura te toru o te tuanga o te au vai ra; e manganui te tangata i mate i te vai, no te mea kua maramara.

12 Kua akatangi iora te tokoa o te angela i tana, pāpāia iora te toru o te tuanga o te rā, e te toru o te tuanga o te marama, e te toru o te tuanga o te au etu, poiri iora te toru o te tuanga ia ratou ra, kare atura te toru o te tuanga o te mārama o te ao nei i te kakā anga mai, e to te po katoa oki.

13 Kua akara atura au e kua rongo au i tetai angela i te rere anga na rotopu i te mareva nei, e te kapiki ua anga ma te reo maata, E ae! e ae! e ae oki, to te aronga e noo i te ao nei i te tangi oki o te pu o nga angela toko toru e vaitata i te tangi nei!