2 Samuela

21 E ONGE tei taua tuatau ia Davida ra, tera mataiti, tera mataiti, ka toru akera mataiti; kua ui aturā Davida kia Iehova. Kua tuatua mairā Iehova, No Saula, e tona ngutuare ta tangata, koia i ta i to Gibeona ra.

2 Kua tiki atura te ariki ra i to Gibeona, e kua karanga atura kia ratou; (kare oki to Gibeona i te tamariki a Iseraela, e toenga ra no te ngati Amori; kua taputou oki te tamariki a Iseraela kia ratou e, ka akaora: ko Saula ra no tona maroiroi i te tamariki a Iseraela e ta Iuda, kua kimi atura aia ia ratou e ta.)

3 Kua karanga aturā Davida ki to Gibeona, E akapeea atu au kia kotou? e eaa te tapokiangaara, kia akameitaki mai kotou i te tuanga a Iehova nei?

4 Kua tuatua maira to Gibeona kiaia, Kare matou e rave i te ario e te auro a Saula, e no tona ngutuare; e auraka rava tetai tangata o Iseraela nei kia mate ia koe ia matou nei. Kua karanga atura aia, Ko ta kotou e tuatua maira, ko taku ïa e rave.

5 Kua tuatua maira ratou ki te ariki, Ko te tangata i umuumu ia matou kia pou ra, ko tei kimi ia matou kia pou rava i te taia i te au tapere katoa i Iseraela nei,

6 Ko nga tamariki ra nana kia toko itu ake te tuku mai kia matou nei, kia riia e matou ki mua ia Iehova i Gibea i o Saula ra, ta Iehova i iki ra. Kua karanga atura te ariki, Naku e tuku atu.

7 Kareka ko Mephiboseta, te tamaiti a Ionatana, te tamaiti a Saula ra, i vaooia ïa e te ariki; no te taputou a Davida ia Ionatana te tamaiti a Saula ia Iehova ra.

8 Kua rave atura te ariki i nga tamariki tamaroa a Rizepa i te tamaine a Aia ra, toko rua tana i anau ia Saula ra, ko Aramoni raua ko Mephiboseta; e nga tamariki tamaroa toko rima a te tuakana o Mikala te tamaine a Saula, tana i anau ia Aderiela te tamaiti a Barezilai i Meholati ra:

9 Kua tuku atura aia ia ratou ki te rima o to Gibeona, e kua ri atura ratou ia ratou ki runga i te tuaivi ki mua i te aroaro o Iehova: mate iora ra ratou toko itu katoa, i te tuatau akaū te mate anga, i nga rā mua o te akaū kerite.

10 Kua rave akera te tamaine a Aia ra ko Rizepa i te kakau paoa, kua totoa iora nona uaorai ki runga i te mato ra, mei tei muatangana mai o taua tuatau mou ra e tae ua atura ki te topa anga mai o te ua no te rangi mai ki runga ia ratou, kare rava e manu i to mai ki runga ia ratou i te ao, e kare oki e puaka o te ngangaere i te po.

11 E kua akakiteia akera kia Davida i ta Rizepa i rave, ta te tamaine a Aia, te vaine tavini a Saula ra.

12 E kua aere aturā Davida, e kua rave maira i te au ivi o Saula, e te au ivi o tana tamaiti ra, ko Ionatana, i te au tangata o Iabesa-gileada, ko tei keiaia e ratou i te mataara i Betesani, ka akautaiaʼi e te Philiseti ra, ka ta ai te Philiseti ia Saula i Gilaboa ra:

13 Kua apai maira aia i te au ivi o Saula, e te au ivi o tana tamaiti ra ko Ionatana; e kua akaputuputu katoa maira ratou i te au ivi o nga tangata i riia ra.

14 Kua tanu iora ratou i te au ivi o Saula, e to te tamaiti to Ionatana, i te tapere ra ko Beniamina i Zela ra, i te tanumanga o tona metua ra o Kisa: e ko te au mea katoa ta te ariki i ikuiku maira, ko ta ratou ïa i rave. E i muri ake i te reira, akarongoia maira raotu e te Atua i taua enua ra.

15 Te tamaki akaou maira te Philiseti ia Iseraela; e aere aturā Davida ki raro, e tona katoa au tangata, e kua tamaki atura i te Philiseti: kua paruparu oki a Davida.

16 E ko Isebi-benoba, no te tamariki o te roangarere aia, e toru anere sekela te veo o tana korare i te teimaa, e kua tatuaia aia ki te koke ou, kua manako aia e ta ia Davida ra.

17 I turuia maira aia e te tamaiti a Zeruia e Abisai, e kua ta atura aia i taua Philiseti ra, e mate rava akera. Kua taputou atura te au tangata o Davida kiaia, na ko atura, Kua oti ua taau i te aru mai ia matou nei i te tamaki, ko te mate aea ia koe te lamepa a Iseraela.

18 E i muri akera, kua tamaki akaou maira te Philiseti i Goba: mate iorā Sapha ia Sibekai i Husa, no te tamariki o te roangarere aia.

19 Kua tupu akaou iora te tamaki i te Philiseti rai i Goba, mate iora te taeake o Golia i Gata ra ia Elihanana te tamaiti a Iaira-oregima i Betelehema, e tau tana korare ki te kautā maata a te raranga kakau ra.

20 E kua tupu akaou rai te tamaki i Gata, tei reira tetai tangata roa, e ono ona maikao i te rima okotai, e ono oki maikao i te vaevae okotai, tai takau ma a; no te tamariki o te roangarere katoa oki aia.

21 E kia akakino maira aia ia Iseraela, mate iora aia ia Ionatana te tamaiti a Simea, e taeake no Davida.

22 Ko eianei puke tangata toko a ta taua roangarere i anau i Gata ra; e kua mate i te rima o Davida, e te rima o tona au tavini ra.