Deuteronomi

4 E TEIANEI, e Iseraela, e akarongo mai i te au akonoanga e te au tuatua-tau taku e apii atu kia kotou nei, e e rave, kia ora kotou, kia tae kotou ki rungao, e kia rauka te enua, ta te Atua o to kotou ai metua ta Iehova e oronga mai no kotou.

2 Auraka kotou e topiri ua mai i tetai ngai ke ki teianei tuatua taku e akaue atu kia kotou na, auraka oki kotou e akatopa i tetai ngai i taua tuatua nei; kia akono oki kotou i te au akauenga a to kotou Atua ra a Iehova i taku e akaue atu kia kotou nei.

3 Kua kite oki to kotou mata i ta Iehova i rave i te ara ia Baala-peora ra, kua ope takiri oki te au tangata katoa i rotopu ia koe i aru ia Baala-peora i te mate, i to Atua ra ia Iehova:

4 Kareka kotou ko tei piri tikai ki to kotou Atua ra kia Iehova, te ora ra ïa kotou ravarai i teianei rā.

5 I na, kua akakite atu au kia kotou i te au akonoanga, e te au tuatua-tau ta taku Atua ta Iehova i akaue mai iaku ra; ei akono anga na kotou i te enua ta kotou e aere e rave nei ei nooanga.

6 E tenana, e akono meitaki i taua tuatua na, e ka rave; ko to kotou ïa pakari, e to kotou kite, ki mua i te aroaro o te aronga te ka akarongo i teianei au akonoanga katoa, ka riro ïa i te tuatua e, Oti ra ua iti-tangata maata pakari e te karape ko taua aronga ra.

7 Teiea oki ïa enua maata, e vaitata mai to ratou atua ia ratou, mei to tatou Atua ra mei ia Iehova i te au mea katoa ta tatou e kapiki atu ei iaia ra?

8 E teiea ïa enua maata, i tikaʼi tona au akonoanga, e te au tuatua-tau, mei teia katoa nei ture taku i tuku atu ki mua i to kotou aroaro i teianei rā?

9 E akono meitaki ra ia koe uaorai, e e tiaki i toou uaorai vaerua, ko te ngaropoina aea ia koe te au mea i akaraia e toou uaorai mata, ko te riro ke ua atu aea oki taua mea nei i roto i to ngakau i te au rā katoa o toou ora anga na; e akakite ra i taua au mea ra ki taau au tamariki, e to au mokopuna:

10 I te rā i tu uaʼi koe ki mua i te aroaro o to Atua ra ko Iehova i Horeba ra, ka tuatua mai ei a Iehova kiaku ra e, Ka akaputuputu mai i te au tangata na kiaku nei, e akakite atu au kia ratou i taku nei tuatua; ei apii anga ia ratou, kia mataku mai ratou iaku i te au rā katoa o to ratou ora anga i runga i te enua nei, e kia apii katoa oki ratou ki ta ratou au tamariki.

11 Kua akavaitata maira kotou, e kua tu iora i te tumu o taua maunga ra; e kua mura ua taua maunga ra i te ai i rotopu roa i te reva nei, ma te poiri, e te tumurangi, e te poiri maata pangopango ra.

12 Kua tuatua maira oki a Iehova kia kotou i rotopu i taua ai ra; kua kite oki kotou i te aruru o tana tuatua, kare ra e tu i kitea e kotou; ko te aruru anake ra ta kotou i akarongo ua.

13 E kua akakite maira aia kia kotou i tana koreromotu, tana i tuatua mai kia kotou e rave, i nga tuatua okotai ngauru ra, e kua tata iora oki aia i te reira ki rungao i nga papa toka e rua ra.

14 Kua akaue mairā Iehova iaku i reira e apii ia kotou i te au akonoanga, e te au tuatua-tau, ei akono anga na kotou, i te enua ta kotou e aere e rave nei ei nooanga.

15 E tenana e akono meitaki ia kotou uaorai; kare oki e tu i kitea e kotou i te rā i tuatua mai ei a Iehova kia kotou i Horeba i rotopu i te ai:

16 Ko te kino aea kotou, e kua anga iora i te idolo tarai no kotou mei te au tiki katoa nei te tu, mei te tane e mei te vaine oki;

17 Mei tetai puaka o te enua nei; mei tetai manu peau rere i roto i te reva nei;

18 Mei tetai mea e totoro aere ua na raro i te one nei; mei tetai ika o te moana i raro ake i te enua nei:

19 Kia akara aea toou mata ki runga i te rangi, e kite akera koe i te rā, e te marama, e te au etu, to te rangi katoa ra nuku, ko te akanauruia aea koe e akamori ia ratou, e kua tavini atura kia ratou, ta toou Atua ta Iehova i tua aere no te pa enua katoa i raro ake i te rangi katoa nei.

20 Kua rave mairā Iehova ia kotou, e kua arataki mai ia kotou mei te umu auri maira, mei Aiphiti, ei iti-tangata nona tikai, mei tei teianei rai oki rā.

21 Riri iora oki a Iehova iaku ia kotou, e kua taputou iora e, auraka au e tae ki tetai pae Ioridana, e auraka e tae ki taua enua meitaki ra, ta to Atua ta Iehova e oronga mai noou na ei nooanga.

22 E teianei, ei teianei enua au ka mate ei, kare au e tae ki tetai pae Ioridana: ka tae ra kotou, e ka noo kotou i taua enua meitaki ra.

23 Kia matakite ia kotou uaorai, ko te ngaropoina aea ia kotou te koreromotu, ta ko kotou Atua ra ta Iehova i papau ia kotou na, ko te rapa aea kotou i te idolo akatikitikiia no kotou, mei tetai mea atu te tu, ta to kotou Atua ra oki ta Iehova i akakore ra:

24 E ai kakai oki toou Atua ko Iehova, e Atua vareae ïa.

25 E kia anau taau au tamariki, e te au mokopuna, e kua roa to kotou noo anga i te enua, kia tatipake ra kotou, e kua rapa iora i te idolo akatikitikiia no kotou ra, mei tetai mea atu te tu, e kua rave kotou i te kino ki mua i te aroaro o to Atua ra ko Iehova, ei akakoko anga atu iaia kia riri:

26 Te kapiki nei au i te rangi e te enua, ei kite noku ia kotou i teianei rā, e, kare e mamia, ka pou rava atu ei kotou, e taka ke atu i te enua ta kotou e aere e rave i tetai pae Ioridana eni, ei nooanga: kare kotou e roaia ki runga i taua enua ra, ka pou takiri ra kotou.

27 E akapueurikiriki ke oki a Iehova ia kotou ki te pa enua ra, e toe iora kotou tokoia ua ake i taua pa enua ra ta Iehova e tuaru atu ia kotou na.

28 Ei reira kotou e araaraʼi i te au atua rakau, e te toka, ta te rima tangata i anga, kare e kite kia akara, e kare e akarongo, e kare e kai, kare oki e ongi.

29 Kia kimi ra koe i to Atua ia Iehova i reira, ka kite rai koe iaia, kia kimi koe iaia ma to ngakau katoa, e ma to vaerua katoa.

30 Kia tumatetenga koe ra, e rokoia iora koe e taua au mea katoa nei a muri atu; kia ariu ra koe ki to Atua ra kia Iehova, e kia akarongo i tona reo;

31 Kare aia e akaruke ia koe, kare koe e mate, kare oki aia e akangaropoina i te koreromotu tana i akatinamou ma te taputou ki toou ra ai metua; e Atua aroa ua oki toou ra Atua ko Iehova.

32 E ui ua ana oki koe i tei muatangana ra au rā, ou io nei koe ra, mei te rā mairai i anga ai te Atua i te tangata ki runga i te enua nei ra, e mei tetai pae rangi e tae ua atu ki tetai pae rangi ra, i te tupu anga i tetai mea maata mei teianei, e mei te reira oki i te akarongo ua anga i te rongo ra,

33 I te tangata oki i te akarongo anga ratou i te reo o te Atua i te tuatua anga mai i rotopu i te ai, ka oraʼi ra, mei taau oki i akarongo ra?

34 E kua tiki aina te Atua e kua rave mai i tetai iti-tangata ke, ma te timata anga atu, te akairo, e te mea umere, e te tamaki; ma te rima marōrō, e te rima i akatika ravaia; e te au ravenga mataku maata, mei ta to Atua ta Iehova i rave ia koe na i Aiphiti ki mua i to mata na?

35 Kia kite oki koe e ko Iehova te Atua; kare atu, koia anake ra, i kite ei koe.

36 Kua akakite mai aia kia koe i tona reo mei runga mai i te rangi ra, ei apii mai ia koe ra; e kua akakite mai aia kia koe i tana ai maata ki runga i te enua nei; e kua akarongo oki koe i tana tuatua mei roto mai i taua ai ra.

37 E no te mea i anoano aia i to ai metua na, kua rave io nei aia i to ratou uanga i muri ake ia ratou ra; e kua arataki mai aia ia koe ki vao ki mua i tona uaorai mata, i tona ra mana maata, mei Aiphiti maira;

38 Kia tuaru atu aia i te au enua mamaata, e te ririnui to ratou i toou, i mua ia koe ra, kia arataki aia ia koe ki rungao, kia oronga mai aia i to ratou enua noou ei nooanga, mei tei teianei rā.

39 E tenana, e akamaara meitaki ana to ngakau, kia kite koe i teianei rā e, ko Iehova anake ra te Atua ki runga i te rangi, e ki raro katoa i te enua nei, kare atu e Atua.

40 E teianei, e akono koe i tana au akonoanga, e tana au akauenga taku e akaue atu kia koe i teianei rā, kia meitaki oki koe, e to tamariki katoa i muri ake ia koe na, e kia akaroaia toou na au rā ki runga i te enua, ta to Atua ta Iehova e oronga mai noou, e tuatau ua atu.

41 Kua akono iorā Mose i e toru puke oire i teia pae Ioridana i te pae i te itinga o te rā ra;

42 Kia oro te ta tangata ki reira, ko tei mate te tangata iaia kare i kite ra, kare oki i makitakita iaia i muatangana ra, e kua oro ua aia ki tetai i aua nga oire ra kia ora aia:

43 Ko Bezera ïa, i te medebara ra, i te ngai atea, i o te ngati Reubena ra; e ko Ramota i Gileada, i o te ngati Gada ra; e ko Golana i Basana, i o te ngati Manase ra.

44 Teia oki taua ture i tukuia e Mose ki mua i te aroaro o te tamariki a Iseraela ra:

45 Teia te au tuatua-akakite, e te au akonoanga, e te au tuatua-tau ta Mose i karanga atu ki te tamariki a Iseraela, kia aere mai ratou mei Aiphiti maira;

46 I teia pae Ioridana i te o i vaitata i Bete-peora, i te enua o Sihona ariki o te ngati Amori, i noo i Hesebona ra, ta Mose e te tamariki a Iseraela i ta, kia aere mai ratou mei Aiphiti mai:

47 Rauka iora ia ratou tona enua, e te enua o te ariki o Basana ra, ko Oga, nga ariki o te ngati Amori toko rua, i teia pae Ioridana i te pae i te itinga o te rā ra;

48 Mei Aroera mai, i te pae o te kauvai ra ko Aranona, e tae ua atura ki te maunga ra ko Siona, koia Heremona ra,

49 E te Araba katoa i teia pae Ioridana, i te pae i te itinga o te rā ra, e tae ua atura ki te roto o te Araba ra, i raro atu i te au pupui anga vai o Pisega.