Deuteronomi

15 KIA tae ki te openga o te itu o te mataiti ra, ei tukunga taau i reira.

2 Tera oki te tu o taua tukunga ra: Ko te au tangata ou ravarai ra, tei apai i te apinga ki tona tangata tupu ra, e tuku ua atu aia iaia; auraka aia e umuumu i taua apinga ra i taua tangata tupu nona ra, i te taeake nona ra, no te mea, kua tutuia te mataiti tukunga na Iehova.

3 I te tangata ke ra e tika ia koe kia umuumu atu, ko taau uaorai ra i to taeake na to uaorai rima e tuku ua atu;

4 Mari ra kia kore rava te aronga apinga kore i ou ra; e akameitaki rava oki a Iehova ia koe i runga i te enua ta to Atua ra ta Iehova e oronga noou nei ei nooanga:

5 Kia akarongo meitaki koe i te reo to Atua ra o Iehova, e e akono koe kia rave i teia katoa nei au akauenga taku e akaue atu kia koe na i teianei rā.

6 E akameitaki mai oki to Atua ra ko Iehova ia koe, tana oki i tuatua mai kia koe ra: e apai oki koe i te apinga na te pa enua e manganui, kare ra koe e pati i ta ratou: e mana oki koe i runga i te pa enua e manganui, kare ra ratou e mana i runga ia koe.

7 E tangata apinga kore to roto ia kotou na, no to au taeake ra, tei roto i te au oire katoa noou ra, i toou na enua ta to Atua ta Iehova e oronga mai noou, auraka koe e akamārokiakia i toou ngakau, e e topiri i to rima, i to taeake apinga kore ra:

8 E oora ua ra koe i to rima kiaia, e tuku atu oki koe iaia i tana e inangaro ra, e kia rava tikai.

9 Kia matakite, ko te tuatuaia aea to roto i to ngakau kino na, ko te karanga aea koe e, Kua vaitata i te itu o te mataiti, te mataiti tukunga; akara aroa kore atura koe i to taeake apinga kore ra, e kare akera koe i oronga ua atu i tetai apinga nana; e kua kapiki atura aia kia Iehova ia koe, araia iora koe ra.

10 E oronga tikai koe i te apinga nana, e auraka to ngakau e noinoi kia oronga koe i te apinga nana: no reira oki e akameitaki ei to Atua ra ko Iehova ia koe i taau au angaanga katoa ra, e te au mea katoa taau e rave ra.

11 Kare ra oki e kore te ao i runga i te enua na; e teianei, te akaue atu nei au ia koe, te tuatua nei au, E oora ua koe i to rima i toou taeake apinga kore, e tei ngere i runga i to enua na.

12 E kua okoia mai to taeake, i te ngati Ebera tane e te ngati Ebera vaine, kia koe, e ka ono akera mataiti i te tavini anga ia koe ra; kia tae ra ki te itu o te mataiti, e tuku ua koe iaia kia aere ke atu i o ou ra.

13 E kia tuku ke atu koe iaia i o ou ra, auraka koe e tuku puapinga kore ua iaia:

14 Ei tutaki maata taau e apai nana no roto i te au mamoe, e te sitona naau, e te taomianga vine naau; ta to Atua ta Iehova i akameitaki mai ia koe, ko taau ïa e oronga nana.

15 E akamaara oki koe e, e tavini katoa koe i te enua ra i Aiphiti, e kua akaoraia koe e to Atua ra e Iehova; i akaue atu ei au kia koe i teianei tuatua i teianei rā.

16 Kia tuatua ua maira aia kia koe e, Kare au e akaruke ia koe; no te mea te inangaro ra aia ia koe e toou ngutuare, no te mea e meitaki aia ia koe;

17 Ka rave koe i tetai ko i reira, ka ko ei i tona taringa ki runga i te pa, e ei tavini aia noou e tuatau ua atu. E pera katoa koe i to tavini vaine ra.

18 Auraka koe e noinoi kia tuku ua atu koe iaia kia aere ke atu i o ou ra; e tau oki tona meitaki i te tavini anga ia koe ra, e ono akera mataiti, i te tavini tutaki ua e kia rua ua atu; kia akameitaki mai oki to Atua ra ko Iehova ia koe i te au mea katoa taau e rave ra.

19 Te au anaunga toa mua o taau ra au puakatoro, e taau ra au mamoe, e akataka ïa koe na to Atua na Iehova: auraka rava taau ra au anaunga puakatoro mua e rave i te angaanga, e auraka rava te au anaunga mua o taau mamoe kia pakotiia.

20 Naau, e na toou ngutuare e kai i te reira ki mua i te aroaro o to Atua ra o Iehova, i tera mataiti, i tera mataiti, i te ngai ta Iehova e akono ra.

21 E kino ra to taua au puaka ra, kia pirikoki ra, e te matapo oki, e te au kino katoa nei oki, auraka koe e apai i te reira ei atinga na to Atua na Iehova.

22 E kai ua koe i te reira i roto i toou ra are: e kai katoa te aronga viivii e te viivii kore i te reira, mei te zabi, e te aili ra.

23 Auraka ra koe e kai i te toto; ka riringi koe i te reira ki raro i te one mei te vai ra.