Daniela

1 I TE toru o te mataiti i te au o te ariki o Iuda ko Iehoiakima, i tae mai ei te ariki o Babulonia ko Nebukanesa ki Ierusalema, e kua akapini akera ki te nuku.

2 E kua tuku atura te Atu i te ariki o Iuda ia Iehoiakima ki tona rima, e tetai pae o te au kapu no te are o te Atua: ko tana ïa i apai ki te enua ra ko Sinara, ki roto i te are o tona ra atua; e kua apai oki aia i taua au kapu ra ki roto i te are vairanga apinga no tona atua.

3 Kua karanga akera te ariki kia Asepenaza i tei maata i rungao i te aronga taoonga nona ra kia arataki mai aia i e okotai i te au tamariki a Iseraela, to te au tamariki a te ariki, e to te aronga nunui katoa ra;

4 I te au tamariki kino kore, ko tei meitaki i te akara anga atu, ko tei karape i te au kite katoa, e tei pikipiki i te kite, e te ngakau mārama i te au mea i apiiia ra, e tei tika kia tu ki roto i te are o te ariki ra e tei tika kia apiiia atu te tuatua e te reo o te au Kaledea ra.

5 Kua akataka iora te ariki i te tuanga kai na ratou, no te au rā katoa, no roto i ta te ariki uaorai e no te wina oki tana i inu ra: kia akapera i te angai ia ratou e kia toru ua atu mataiti, e kia ope ka tu atu ei ratou ki mua i te aroaro o te ariki ra.

6 E ko Daniela tetai i roto i taua au tamariki a Iuda, ko Hanania, ko Misaela, e ko Azaria;

7 Ko tei tapaia te ingoa e tei maata o te aronga taoonga ra: kua tapaiā Daniela ra, ko Beletesazara ïa; e ko Hanania ra, ko Sadaraka ïa; e ko Misaela ra, ko Meseka ïa’ e ko Azaria ra, ko Abede nego ïa.

8 Te manako ra te ngakau o Daniela e, auraka aia e viivii i taua tuanga kai a te ariki ra, e i te wina tana i inu ra: i akatu ei aia ki tei maata i taua aronga taoonga ra e, auraka aia e akaviivii iaia uaorai.

9 Kua akariroia akerā Daniela e te Atua ei tangata akaperepere maataia e tei maata i taua aronga taoonga ra.

10 Kua karanga atura tei maata i taua aronga taoonga ra kia Daniela, Te mataku nei au i taku atu i te ariki ra, ko tei akataka i ta kotou kai e ta kotou e inu: ko te akara mai aea aia i to kotou mata i te tu kino anga, kare i aite ki te au tamariki okotai rai o kotou uki ra; ko toku mimiti te ka umuumuia mai e te ariki i reira.

11 Kua karanga aturā Daniela ki te akaaere, ta tei maata i te aronga taoonga i tuku ki runga ia Daniela, Hanania, Misaela, e ia Azaria ra,

12 Teia taku tuatua kia koe, Ka timata ua mai ana i to au tavini nei, e kia po ngauru ake; ei pipi ta ratou e o mai na matou e kai, ei vai oki te inu.

13 Ka akara mai ei koe i to matou mata ki mua i to aroaro na, e te mata katoa o te au tamariki e kai i te tuanga kai a te ariki ra: e taau e kite ra, e akapera koe ki to au tavini nei.

14 Kua akarongo atura aia ia ratou i taua tuatua ra, e kua timata iora ia ratou e po ngauru akera.

15 E ope akera aua nga po okotai ngauru ra, te vai meitaki ra to ratou mata kia akaraia atu, e te poria oki i te kopapa, i to te au tamariki katoa ra tei kai i te tuanga a te ariki ra.

16 Kua rave iora te akaaere i taua tuanga kai na ratou ra, e te wina i akonoia kia inu ratou; e kua o maira i te pipi na ratou.

17 E ko aua nga tamariki toko a nei, kua oronga maira te Atua i te kite no ratou, e te pikipiki, i te au mea katoa i apiiia, e te pakari: e kite oki to Daniela i te au orama katoa e te au moe.

18 E ope akera nga rā i karangaia e te ariki e aratakiia mai ei ratou ra, kua arataki maira tei maata i te aronga taoonga ra ia ratou ki mua i te aroaro o Nebukanesa ra.

19 Kua karangaranga iora ratou ma te ariki; kare rava tetai i kitea i rotopu ia ratou ravarai e aite ia Daniela, Hanania, Misaela, e Azaria ra: i tu atu ei ratou ki mua i te aroaro o te ariki ra.

20 E te au tuatua pakari katoa e te kite, ta te ariki i ui kia ratou ra, kite atura aia e kua tu ke, e kua papa ngauru atu to ratou kite i to te aronga pakari ravarai, e to te au akara etu, e pini ua ake tona basileia katoa ra.

21 Te ora ua rā Daniela e tae rava atu ki te mataiti mua o te ariki ra ko Kuro.