2 Ariki

4 KUA kapiki ua maira tetai vaine na tetai i te au tamariki peroveta kia Elisaia, tuatua maira, Kua mate to tavini ko taku tane nei; kua kite oki koe e, kua mataku to tavini ia Iehova: e teia mai nei te tangata anana te ou i tiki mai i aku tamariki toko rua nei ei tavini.

2 Kua karanga aturā Elisaia kiaia, E akapeea atu au ia koe? e akakite mai kiaku: eaa taau i roto i te are? Kua tuatua maira aia, Kare rava o roto i te are o to tavini vaine, mari ra e pani inu.

3 Kua karanga atura aia, E aere ua ana koe, e pati aere i to au tangata tupu katoa ra i te āriki, auraka ei apinga to roto; auraka kia iti.

4 E kia tae mai koe ki roto ra, e topiri mai i te pa ia koe e o puke tamariki, ka akato ei ki roto i taua au āriki ra, e ko tei ki ra, ka tuku ke atu ïa.

5 Riro atura aia, kua topiri iora i te pa iaia e nga tamariki ra, ko tei apai mai i taua āriki ra kiaia ra, e nana oki i akato.

6 E ki akera taua au āriki ra, kua karanga atura aia ki te tamaiti, E apai mairai i tetai āriki. Kua tuatua maira aia kiaia, Kare atu rai e āriki. Kore akera taua inu ra.

7 Kua oki maira aia kua akakite ki taua tangata no te Atua ra. Kua karanga atura aia, E aere, e oko i te inu, e kia oko na taua ou ra, e te toenga ra, naau ïa e na to tamariki.

8 E tae akera ki tetai rā te aere rā Elisaia ki Sunema, tei reira tetai vaine taoiau; e kua māro maira aia iaia e kai i te kai. E muri akera, kia aere aia na reira ra, kua tapae aia ki roto e kai i te kai.

9 Kua karanga atura aia ki tana tane, I na, te kite nei au i teianei tangata e aere putuputu mai ki o taua nei, e tangata tapu ïa no te Atua.

10 E akatu taua i tetai pia iti ki runga i te patu nei, taku ïa tuatua kia koe, e tuku ei taua i tetai roi nona, e tetai kaingakai, e tetai nooanga, e tetai lamepa: e kia tae ua mai aia ki o taua nei, ka tapae mai aia ki reira.

11 E tae akera ki tetai rā, kua aere maira aia ki reira, e kua tapae akera ki roto i taua pia ra, e kua moe iora i reira.

12 Kua karanga atura aia ki te tavini nona ra kia Gehazi, E kapiki atu ana i te vaine Sunema. E oti akera aia i te kapikiia e ia, kua tu ua maira ki mua iaia.

13 Kua karanga atura aia kiaia, E karanga atu koe kiaia e, I na, i akamaroiroi ua ana oki koe ia maua i tenana akamaroiroi anga; e akapeea atura maua ia koe? Kia karangaia atu ainei koe ki te ariki, e te rangatira o te nuku nei ainei? Kua tuatua maira aia, Te noo nei au i roto i toku uaorai au tangata nei.

14 Kua tuatua maira aia, E akapeeaia atura aia? Kua karanga aturā Gehazi, Kare ana e tamaiti, e kua ruaine oki te tane.

15 Kua tuatua maira aia, E kapiki atu ana kiaia. E oti akera aia i te kapikiia atu, te tu ua maira i te ngutupa.

16 Kua karanga atura aia, Mei teianei, i te tuatau i akonoia ra, e tamaiti taau ka ikiiki. Kua tuatua mairai aia, Auraka, e taku pu, e te tangata o te Atua ra, auraka ana koe e pikikaa mai i to tavini vaine nei.

17 Kua to iora taua vaine ra, e kua anau maira te tamaiti kia tae ki te tuatau ra, te tuatau i akonoia ra, ta Elisaia i tuatua mai kiaia ra.

18 E pakari akera taua tamaiti ra, e tae akera ki tetai rā, kua aere iora aia ki vao ki te metua ra ki te aronga kokoti sitona ra.

19 Kua karanga atura aia ki te metua tane, Toku mimiti, toku mimiti. Kua karanga atura aia ki tetai tamaiti, E apai ana ki tona metua vaine ra.

20 E apaiia atura aia e ia, e tae atura ki tona metua vaine ra, kua noo iora aia ki runga i te ūā, e avatea akera, mate iora.

21 Kua aere aia ki runga, kua tuku atura ki runga i te roi o taua tangata no te Atua ra, topiri atura i te pa iaia, aere atura.

22 Kua kapiki atura aia ki tana tane, karanga atura, E tono mai koe i tetai i te au tamariki iora, e tetai asini, ko taku ïa tuatua kia koe, e oro ana au ki te tangata no te Atua ra, ka oki mai ei au.

23 Kua tuatua maira aia, Eaa koe ka aere ei i teianei rā? Kare teia te marama ou, kare oki te sabati. Kua karanga atura aia, Ka meitaki rai.

24 Kua tuku atura aia i te nooanga ki runga i te asini, e kua karanga atura ki te tavini, Akaoro, kia viviki, auraka e aere marie, kia tuatuaia ra e au.

25 Riro atura aia, e tae atura ki te tangata no te Atua ra, ki te maunga ra ki Karamela. E kia akara mai taua tangata no te Atua ra iaia i te atea ke ra, kua tuatua akera aia ki tona tavini kia Gehazi, I na, tera ake taua vaine Sunema ra:

26 E oro atu ana koe kia aravei atu, ko taku ïa tuatua kia koe, ka karanga atu ei, Te meitaki na koe? te meitaki na to tane? te meitaki na te tamaiti? Kua tuatua maira aia, Meitaki.

27 Kia tae ra aia ki te tangata no te Atua ra ki runga i te maunga ra, kua opu iora aia i tona vaevae. Kua akavaitata mairā Gehazi e tute ke atu. Kua tuatua maira te tangata no te Atua ra, E vaoo ua atu, e tumatetenga tona i te mamae ngakau; e kua uunaia ïa e Iehova iaku nei, kare ïa i akakite mai kiaku ra.

28 Kua karanga atura aia, Naku aina i pati i te tamaiti ia koe, e taku pu? kare ainei au i karanga atu e,

29 Auraka e pikikaa mai iaku? Kua tuatua maira aia kia Gehazi i reira, Ka tatua ana i to taukupu, ka rave ei i te rakau naku ra i to rima, e aere: kia aravei ua atu koe i tetai tangata, auraka e aroa atu, e kia aroa mai tetai ia koe ra, auraka e ki atu: ka tuku ei i taku rakau ki runga i te mata o taua tamaiti ra.

30 Kua karanga atura te metua vaine o taua tamaiti ra, Te ora rā Iehova, e te ora ra koe uaorai, kare au e akaruke ia koe. Kua tu akera aia ki runga, e kua aru maira iaia.

31 Riro aturā Gehazi na mua ia raua, e kua tuku atura i te rakau ki runga i te mata o taua tamaiti ra; kare ra e reo, kare oki e rongo anga. Kua oki maira aia e aravei iaia, e kua tuatua maira, na ko maira, Kare rai i ara te tamaiti ra.

32 E kia tomo a Elisaia ki roto i te are, i na, kua mate taua tamaiti ra, kua tukuia ki runga i tona roi.

33 Kua aere atura aia ki roto i reira, e kua topiri iora i te pa ia raua toko rua, kua pure atura ia Iehova.

34 Aere atura aia ki runga, e kua tipapa iora ki runga i taua tamaiti ra, kua topiri akera tona vaa ki tona vaa, e tona mata ei runga ïa i tona mata, e tona rima ei runga ïa i tona rima; e kua tipapa iora ki runga iaia ra; kua maana akera te kopapa o taua tamaiti ra.

35 Kua oki iora, kua oriori aere ua i roto i te are ra; e kua aere iora oki ki runga, kua tipapa iora ki rungao iaia: kua maretie iora taua tamaiti ra e itu akera te maretie anga, e kua puera akera te mata o te tamaiti.

36 Kua karanga atura aia kia Gehazi, na ko atura, E kapiki ana i taua vaine Sunema ra. Kua kapiki atura aia. E tae maira aia ki roto kiaia ra, kua karanga atura aia, E rave ana i to tamaiti.

37 Kua tomo akera aia ki roto, e kua tipapa iora ki raro i tona vaevae, tupou iora ki raro i te one, kua rave iora i tana tamaiti, aere atura ki vao.

38 Kua tae akaou aturā Elisaia ki Gilagala: e kua onge taua enua ra, te noo ra te au tamariki peroveta ki mua iaia: kua karanga atura aia ki te tavini nona ra, Ka tuku ana i te pani maata ki runga i te ai, ka tunu ei i te kai na te au tamariki peroveta nei.

39 Kua aere iora tetai ki vao e koi aere i te rakau rikiriki, e kitea iora te poue ngangaere, kua koi aere iora i te ua poue ngangaere, e ki akera te kakau, e kua aere maira kua ruru ki roto i te pani kai: kare akerai oki ratou i kite.

40 Kua riringi iora i taua kai ra kia kai taua au tangata ra. Te kai ra ratou i taua kai ra, kua kapiki maira ratou, kua tuatua maira, E te tangata no te Atua e, e mate tei roto i te pani nei. Kare atura e tika ia ratou kia kai.

41 Kua tuatua ua akera aia, E apai mai ana i te faraoa. E kua tuku iora aia ki roto i te pani; e kua karanga atura aia, E riringi na te au tangata nei, kia kai. E kare rava akera e kino to roto i te taua pani ra.

42 Kua aere maira tetai tangata mei Baala-salisa mai, apai maira i te kai popo na te tangata o te Atua ra, okotai takau areto kerite, e te sitona katoatoa i roto i tana pute ra. Kua karanga atura aia, E apai atu na te au tangata nei, kia kai ratou.

43 Kua tuatua maira te tavini, E akapeea! e tuku ainei oki au i teia ki mua i te aroaro o te tangata katoa okotai anere nei? Kua karanga atura aia, E apai na te tangata, kia kai ratou; te tuatua maira oki a Iehova, Ka kai ratou, e ka toe oki.

44 Kua tuku atura aia i taua aronga areto ra ki mua ia ratou, e kua kai iora, e kua toe, ta Iehova oki i tuatua maira.