Salamo

72 E O mai ana, e te Atua, te au tuatua-tau naau ra na te ariki; e te tuatua-tika naau ra na te tamaiti a te ariki.

2 Ka akava aia i to au tangata ma te tuatua-tika, e toou ra aronga akaaka ma te tuatua-tau.

3 Ka apai te au maunga i te au ki te au tangata, e te au tuaivi oki, ma te tuatua-tika.

4 Nana e akataka i te tuatua i tei akaaka i o te au tangata ra; te tamariki a te aronga apinga kore ra, nana e akaora, ka atiati takiri rava oki aia i tei takinga-kino ra.

5 Ka vai rai to ratou mataku ia koe, mei te rā e te marama e vai nei, i tera uki i tera uki.

6 Ka eke mai aia mei te ua ki runga i te ngangaere motu ou ra; mei te tua ua i akamauu i te enua nei.

7 I tona ra au rā e ruperupe ei te aronga tuatua-tika; e maata roa oki te au, e ope ua atu te marama.

8 Ka riro aia ei ariki mei tetai tai e tae ua atu ki tetai tai, e mei te vai ra e tae ua atu ki te openga o te enua.

9 To te medebara ra, ka tupou ïa ki raro iaia, e ka mitimiti tona au enemi i te one-pueu.

10 Ka uipa mai te au ariki no Taresisa e to te pa enua rikiriki i te apinga; te au ariki no Seheba e to Seba te ka apai mai i te taoonga-rima.

11 Ka ope takiri te au ariki i te tupou ki mua iaia; ka ope akea te pa enua i te tavini kiaia.

12 Ko tei putaua ra me kapiki maira, nana ïa e akaora; e tei akaaka ra, e kare ona e tauturu.

13 Ka akaperepere aia i tei apikepike ra e tei putaua, e akaora oki aia i te au vaerua o te aronga ao ra.

14 Ka akaora aia i to ratou vaerua i te takinga-kino e te rotoriri ra, e to ratou toto, ka riro ïa ei mea apinga nana.

15 E tika aia i te ora anga, e ka orongaia mai te auro o Seba ra nana; ka pure tamou oki te tangata iaia, ka akameitaki oki ratou iaia, kare e rā e tukua.

16 E manga sitona okotai rima i ki i te enua nei, i runga i te take o te au maunga ra; e tei tupu ra ka ngaee ïa mei ia Lebanona ra; ka ruperupe to te oire ra mei te ngangaere o te enua nei.

17 Ka vai rai tona ingoa e tuatau ua atu: ka vai rai tona ingoa mei te rā ra: ka meitaki oki te tangata iaia, ka ope akea te pa enua i te akameitaki iaia.

18 Kia akameitakiia te Atua, te Atua o Iseraela ko Iehova, koia anake ra tei rave i te au mea taka ke ra.

19 Kia akameitakiia oki tona ingoa kakā e tuatau ua atu: kia akakiia oki te pa enua ravarai ki tona kakā; Amene, e Amene.

20 Te au pure a te tamaiti a Iese ra a Davida, kua ope ïa.