Apokalupo

15 KITE atu rai au i tetai akairo maata, e te tu ke, ki runga i te rangi, e puke angela toko itu, e tei ia ratou nga mate openga e itu ra; e ope oki te riri o te Atua i te tupu i te reira.

2 E kite atura au mei te mea e e tai io i irokia i te ai; e te aronga i riro ia ratou te re i taua puaka taae ra, e tona tutu, e tana akairo, e te numero o tona ingoa, i te tu ua anga ki runga i taua tai io ra, te mou ra te au kitara a te Atua.

3 Te imene ra ratou i te imene a te tavini o te Atua ra a Mose, e te imene a te Punua-mamoe ra, i te na ko anga e, E angaanga maata e te taka ke taau, e te Atu ra, e te Atua mana katoatoa; e aerenga tika e te tuatua-mou taau, e te Ariki o te aronga tapu e!

4 Koai oki te ka kore e mataku ia koe, e te Atu, e te akakakā i toou ingoa? ko koe anake oki Tei Tapu; e ope katoa te pa enua i te aere mai ki mua i toou aroaro e akamori ei; kua akakite uaia taau ra au tutaki anga tika. 5 E muri ake i te reira, akara atura au, e i na, kiritiia akera te nao o te Are kite ra i runga i te rangi.

6 E kua aere maira nga angela toko itu, ko tei mou i nga mate e itu ra, mei roto mai i te nao ra, ma te kakau viivii kore e te teatea i te kakau anga, e ma te tatuaia te umauma i ta tatua auro ra.

7 E kua tuku maira tetai o nga mea ora e a ra i e itu kapu auro i nga angela toko itu ra, kua ki anake i te riri o te Atua, ko te ora ua rai e tuatau ua atu.

8 Kua ki te nao i te auai no te kakā o te Atua, e no tona mana; e kare rava e tika i tetai kia tomo atu ki roto i taua nao ra, e kia ope ua atu nga mate e itu o nga angela toko itu i te akatupuia.