Maseli

31 TE tuatua a te ariki ra a Lemuela. Te tuatua totou ta tona metua vaine i apii atu kiaia.

2 E peea atu au, e taku tamaiti? e peea, e te tamaiti o taku kopu nei? e peea, e te tamaiti o taku tia e!

3 Auraka e oronga i toou ra ririnui ki te vaine, e taau ra akonoanga ki te mea e mate ei te au ariki ra.

4 Kare e tau i te ui ariki, e Lemuela e, kare e tau i te ui ariki i te inu i te wina; e te aronga mana i te kava kona:

5 Ko te inu aea ratou, e ko te ngaropoina te ture, e kua akamingi ke iora i te tuatua a te tangata i takinga-kinoia ra.

6 E apai i te kava kona ki te tangata i vaitata i te mate, e te wina na te tangata i mamae te ngakau ra.

7 Ka inu aia ka akangaropoinaʼi i tona putaua, e auraka e manako akaou i tona mamae.

8 E amama i to vaa i te tuatua a te tangata kare e tika kia tuatua ra; i te tangata katoa i vaitata i te mate ra.

9 E amama i to vaa, e akava ma te tuatua-tika, e akatika i te ao e te putaua.

10 Koai te tangata kua kitea e ia te vaine akono meitaki ra? kare te au poe nei e tau iaia.

11 Te irinaki ra te ngakau o tana tane ra iaia, kare rava oki aia e akangereia i te apinga.

12 E riro aia i te takinga-meitaki mai iaia e kare e takinga-kino, e mutu ua atu tona aʼo.

13 Te kimi ra aia i te uru mamoe, e te orongā, e te rave rekareka ra tona rima i te angaanga.

14 E tau aia ki te pai a te aronga oko ra; no te enua mamao mai tana kai kia apai mai.

15 Kare rai i ao tika i tu ei aia ki runga, e kua apai i te kai na to te ngutuare, e tetai tuanga na te au tavini vaine.

16 Te manako ra aia ki te kainga, e kua oko; kua tanu i te kainga vine i tei raveia e tona rima.

17 Kua tatua aia i tona taukupu ki te maroiroi, e te akamatutu ra aia i tona rima.

18 Te kite ra aia e te meitaki ra tana i rave ra; kare oki tona mori e tamateia i te po.

19 Te tāpu ra tona rima i te rakau taviri; e te mou ra tona kapu-rima i te kautā.

20 E oora aia i ona puke rima ki te ao; e kua akatika ua i tona rima ki te putaua ra.

21 Kare aia i ngarangara i tona ngutuare i te tuatua kiona ra; kua tataki rua anake ïa i te kakau e pini ua ake ratou ra.

22 Te anga ra aia i te āriki roi manea nona uaorai; e orongā oki tona kakau i tukuia ki te vairakau uriuri.

23 Te kitea uaia ra tana tane i roto i te au ngutupa ra; kia noo aia ki rotopu i te ui mataiapo o te enua ra.

24 Kua anga aia i te orongā e kua oko; e te purekau, e kua oko atu ki te aronga oko ra.

25 Te maroiroi e te ngateitei tona kakau; e rekareka oki aia a muri atu.

26 E tuatua tona vaa i te pakari; e te ture ra i te takinga-meitaki tei tona arero.

27 E akara aia i te akonoanga o tona ngutuare, e kare i kai i te manga i rauka i te akatau ra.

28 E tu tana au tamariki ma te akaora iaia; e tana tane katoa, ma te akapaapaa iaia:

29 E manganui te vaine akono meitaki, ko koe ra tei tu ke ia ratou katoa.

30 E mutu rai te manea; e te purotu, e kore ïa: ko te vaine ra e mataku ia Iehova ra, e akapaapaaia ïa.

31 E orongaia atu tei raveia e tona rima; e akaapaapaa mai tei raveia e ia i te au ngutupa ra.