Exodo

18 KITE akera te metua ongoai o Mose ra, ko Ietero taunga i Midiana, i te au mea katoa ta te Atua i rave ia Mose ra, e tona ra au tangata i to Iseraela, kua arataki mai oki a Iehova i to Iseraela mei Aiphiti mai;

2 Kua rave iora te metua ongoai o Mose ra, ko Ietero, i te vaine a Mose ia Zipora, i tei akaokiia maira,

3 E nga tamariki tamaroa nana ra; ko Geresoma te ingoa o tetai; kua tuatua oki aia e, I noo tangata ke ua ana au i te enua ke:

4 E ko Eliezera te ingoa o tetai: Ko te Atua oki o toku metua tei tauturu mai iaku, e kua akaora iaku i te koke a Pharao:

5 Kua aere maira taua metua ongoai o Mose ra, ko Ietero, ma te vaine a Mose, e nga tamariki tamaroa nana ra, kia Mose i te medebara, i te ngai i puakapaia e ia ra, i vaitata i te maunga ra o te Atua:

6 E kua tuatua maira aia kia Mose, Ko au teia ko Ietero, ko toou metua ongoai, i aere mai nei au ia koe, ma taau vaine, e ana tamariki toko rua katoa ra.

7 Kua aere aturā Mose ki vao, e aravei i te metua ongoai nona ra, e kua tupou atura, e ongi atura iaia; e kua ui iora raua ia raua uaorai i te ora anga; e kua totomo iora ki roto i te puakapa.

8 Kua akakite akerā Mose ki te metua ongoai i te au mea ravarai ta Iehova i rave ia Pharao, e to Aiphiti, no to Iseraela ra, e te au tumatetenga katoa ta ratou i kite i te aerenga mai, e ta Iehova akaora anga ia ratou ra.

9 Rekareka akerā Ietero i te au takinga-meitaki katoa a Iehova i to Iseraela, tana i akaora i te rima o to Aiphiti.

10 Kua karanga aturā Ietero Kia akameitakiiā Iehova, i tei akaora ia kotou nei i te rima o to Aiphiti, e te rima oki o Pharao, e kua akaora i te au tangata nei i roto i te rima o to Aiphiti.

11 Kua kite atu au i teianei e, e maata ua aturā Iehova i te au atua ravarai i taua mea rai i rave nengonengo mai ei ratou ia ratou ra.

12 Kua apai maira te metua ongoai o Mose ko Ietero i tetai atinga karakaratio na te Atua, e tetai au atinga ke oki: e kua aere mairā Aarona, e te aronga pakari katoa o Iseraela ra, e kua kai i te kai, ratou e te metua ongoai o Mose ra, ki mua i te aroaro o te Atua.

13 E ao akera, kua noo mairā Mose e akava i te au tangata ra: e kua tu ua iora te au tangata ki mua ia Mose, mei te popongi mai e aiai ua atura.

14 Kite akera te metua ongoai o Mose i tana angaanga ravarai i taua aronga tangata ra, kua tuatua akera aia, Eaa teia taau e rave i te aronga tangata nei? eaa koe e noo uaʼi ko koe anake ra, tu uaʼi te au tangata ravarai mei te popongi mai e aiai ua atu?

15 Kua tuatua mairā Mose ki tona metua ongoai ra, No te mea te aere maira te tangata kiaku nei e ui i ta te Atua ra tuatua:

16 E tuatua ta ratou ra, kua aere mai ratou kiaku nei, e kua akatau marie iora au i ta tetai e ta tetai, e kua akakite oki i tei akonoia e te Atua, e tana au ture.

17 Kua karanga atura te metua ongoai o Mose ra kiaia, Kare e meitaki taau e rave na.

18 Ka mate ua koe, ko koe, e taua aronga katoa nei: e mea teiaa maata roa taua mea nei ia koe; kare e tika ia koe anake ra kia rave.

19 Ka akarongo mai ana i taku nei tuatua, e ako ua atu au ia koe na, e ka vaitata mai te Atua ia koe; ei vaa koe no te tangata ki te Atua ra, e naau e apai i ta ratou tuatua ki te Atua ra:

20 E naau e apii ia ratou i te au akonoanga, e te au ture, ka akakite ei oki kia ratou i te ara kia aere ratou, e te angaanga ta ratou e rave.

21 E kimi io na oki koe i te au tangata maroiroi i roto i te tangata katoa nei, i tei mataku i te Atua ra, ei tangata tuatua-tika, e te rikarika ki te morimori apinga; ko taau ïa e akataka i runga ia ratou, ei rangatira tausani, ei rangatira anere, ei rangatira rima ngauru, e ei rangatira ngauru:

22 Ei ia ratou te akava i te au tangata nei i te au rā katoa; ko te tuatua maata katoa ra, e apai mai ratou i te reira kia koe na, te au tuatua rikiriki katoa ra, na ratou ïa e akava i te reira: māmā iora koe i reira, kia raverave katoa ratou e koe katoa ra.

23 Kia tika ia koe i te rave i taua mei nei, e kia tuatua mai te Atua kia koe e rave, ka riro koe i te tu roa i reira, e ka tae katoa oki teia au tangata ravarai ki to ratou ra ngai ma te ora.

24 Kua akarongo iorā Mose i te tuatua a te metua ongoai ra, e kua rave iora i te au mea katoa tana i tuatua maira.

25 Kua iki iorā Mose i te au tangata maroiroi no rotopu ia Iseraela katoa, kua akariro atura ei rangatira no te au tangata, ei rangatira tausani, ei rangatira anere, ei rangatira rima ngauru, e ei rangatira rima ngauru, e ei rangatira ngauru.

26 Na ratou atura i akava i te tangata i te au rā katoa ra: ko te tuatua ketaketa ra, kua apai kia Mose, kareka te au tuatua rikiriki katoa ra, na ratou uaorai ïa i akava.

27 Kua tuku ua aturā Mose i te metua ongoai nona i reira; aere atura aia ki tona uaorai enua tikai.