2 Samuela

6 KUA akaputuputu iorā Davida i te au tangata katoa i ikiia no roto ia Iseraela, e toru ngauru i te tausani.

2 Kua tu akerā Davida, e te au tangata katoa iaia ra, e kua aere ki Baale i o Iuda ra, e apai mai i te aruna a te Atua ra mei reira mai, ko tei tautopaia tona ingoa te ingoa o Iehova Sabaota, ko tei noo i rotopu i nga kerubi ra.

3 Kua tuku iora ratou i te aruna a te Atua ki runga i tetai kariota ou, e kua apai maira mei te are mai o Abinadaba i Gibea ra: e na Uza raua ko Ahio, nga tamariki a Abinadaba ra, i kave i taua kariota ou ra.

4 E kua apai maira ratou mei roto mai i te are o Abinadaba i Gibea ra, e kua aere ua iora na te pae o te aruna a te Atua: e kua na mua i te arunā Ahio i te aere.

5 Kua akatangi iorā Davida, ma te ngutuare katoa o Iseraela, ki mua ia Iehova, i te au mea akatangiia, i angaia i te rakau paina, i te kinura e te nabala, e te tophe, e te pu, e te sumebalo.

6 E tae atura ratou ki te ngai pāpā sitona o Nakona, kua akatika aturā Uza i tona rima ki te aruna a te Atua, e kua mou atura; kua turori oki nga puakatoro.

7 Tupu akera te riri o Iehova ia Uza; taia iora aia e te Atua i reira no tana apa, e mate rava akera aia i reira i vaitata i te aruna a te Atua.

8 Mainaina iorā Davida i te mea i taiā Uza e Iehova; tapaia iora te ingoa o taua ngai ra ia Pereza-uza e tae rava maira ki teianei rā.

9 Mataku iorā Davida ia Iehova i taua rā ra, e kua tuatua akera, E akapeea te aruna a Iehova e tae mai ei kiaku nei?

10 Kare akera i tika ia Davida kia apai aia i te aruna a Iehova kiaia ki roto i te oire o Davida: kua apai ke aturā Davida ki roto i te are o Obeda-edoma i Gata ra.

11 Te vai ua atura taua aruna a Iehova ra i roto i te are o Obeda-edoma i Gata ra, e toru akera marama: kua akameitaki iorā Iehova ia Obeda-edoma e tona katoa ra ngutuare.

12 E kua akakiteia maira te ariki rā Davida, i tuatua mai, kua akameitaki a Iehova i te are o Obeda-edoma, e te au mea katoa nona ra, no te aruna a te Atua. Aere aturā Davida, e kua apai mairā i te aruna a te Atua, mei te are o Obeda-edoma, ki roto rava i te oire o Davida ma te rekareka.

13 E i akaperaia oki, kia tae te aronga i apai i te aruna a Iehova ki te ono o te takainga kia topa, taia iora e ia te puakatoro e te mamoe matu.

14 Kua ura iorā Davida ki mua i te aroaro o Iehova ma te maroiroi katoa; te tatuaia iorā Davida ki te tiputa orongā.

15 Kua apai mairā Davida, e te ngutuare katoa o Iseraela, i te aruna a Iehova ma te maeva, e ma te tangi o te pu ra.

16 E te apaiia ra te aruna a Iehova ki roto i te oire o Davida ra, te akara ra te tamaine a Saula ko Mikala na roto i te māramārama, e kite atura i te ariki ra ia Davida i te rere anga, e te ura anga, ki mua i te aroaro o Iehova; e kua akavaavaa atura aia iaia i roto i tona ngakau.

17 Kua apai mai oki ratou i te aruna a Iehova ra, e kua tuku iora ki roto i tona ngai tikai, i rotopu i te Are i akatuia e Davida no taua aruna ra: e kua apai a Davida i te au atinga karakaratio, e te au atinga au ra, ki mua i te aroaro o Iehova ra.

18 E oti akera ia Davida te au atinga karakaratio, e te au atinga au, i te apaiia, kua akaora aia i te tangata i te ingoa o Iehova Sabaota.

19 Kua tua iora aia i reira na te tangata katoa, na to Iseraela ravarai, ki te tane e te vaine katoa, tataki tai tupe faraoa ki te tangata okotai, e tetai manga puaka, e tetai āriki wina. Aere anake atura te tangata ravarai ki te ngutuare tikai.

20 Kua oki mairā Davida e akaora i tona uaorai ngutuare. Kua aere maira te tamaine a Saula ra ko Mikala ki vao kia aravei ia Davida, e kua karanga atura, Aue te ngateitei o te ariki o Iseraela i nakonei, ko tei taratara i tona kakau i nakonei, ki mua tikai i te mata o te au tavini vaine nona e, mei tetai o te aronga tarevakaua e mātau i te taratara i tona kakau e!

21 Kua karanga aturā Davida kia Mikala, I mua i te aroaro o Iehova i pera atu ei au, tei iki mai iaku auraka to metua, e tona katoa ngutuare, e kua akono iaku ei ariki no rungao i te au tangata no Iehova, no Iseraela: e teianei, ka navenave rai au ki mua i te aroaro o Iehova.

22 E ka maata atu rai toku kino e te akaaka i toku uaorai akara anga i teia: kareka te au tavini vaine taau i tuatua maira, e akangateiteiia au e ratou.

23 Karekā Mikala te tamaine a Saula, kare rava ana tamariki e mate roa atu ei aia.