Iobu

41 E RAUKA ainei Leviatana ia koe kia ii ki te matau? e tika ainei ia koe kia taomi i tona arero ki raro ki te taura?

2 E tika ainei ia koe kia tui i tona putaiu ki te taura? e puta ainei tona tanga ia koe ki te tara?

3 E maata ainei tona taparu anga mai ia koe? e tuatua maru mai ainei aia ia koe?

4 E papau mai ainei aia i te koreromotu ia koe? e rave ainei koe iaia ei tavini mou?

5 E amirimiri ainei koe iaia mei te manu ra? e tapeka ainei koe iaia na to au tamaine ra?

6 Na te au manuiri ainei e kai iaia? e tua ainei ratou na te aronga oko?

7 E ki ainei tona kiri ia koe ki te auri akatara? e tona mimiti ki te ko ika?

8 Ka tuku ana i to rima ki runga iaia, akamaara i te tamaki, ka akapaki atu ei.

9 I na, e mea puapinga kore kia manakonako atu iaia: i te akara anga anake ra, kare ainei kua taitaia takere ua?

10 Kare rava e toa e tikaʼi kia akaara atu: koai ra tei tika kia mou ki mua iaku?

11 E tika iaai kia opu mai iaku kia akatika atu au i tana? To raro ake i te rangi katoa nei, naku ïa.

12 Kare au e uuna i tona au melo, e tona ririnui, e te taoonga tamaki meitaki nona.

13 Naai e eeu i te vaî o tona kakau? naai e tomo ki roto i nga pa nio e rua nona ra?

14 Naai e eeu i te pa o tona mata? nga pa nio nona e pini ua ake e mea rikarika ïa.

15 Tona paruru ketaketa ra, ko tona ïa akaparauanga, kua topiri takiriia mei te sigilo piri.

16 Kua piri rava ïa tetai ki tetai, kare ua te matangi e o ki roto ra.

17 Kua akapiriia tetai ki roto i tetai, kua tapiri pu uaia ratou, e kare ua e tika kia akataka keia.

18 I tona maretie anga ra, kua pura ïa te ai, e kua tau ona mata mei nga topiri-mata o te popongi.

19 E rama mura tei puroro mai no roto i tona vaa, e te rere atura te pura ai.

20 E auai tei pupu mai no roto i ona rua putangiu, mei to te pani kia pupu ra, e mei te pani maata ra.

21 E ka te ngaru i te aʼo nona, e mura ai tei puroro mai no roto i tona vaa.

22 Te noo maira te ririnui i runga i tona kaki, e te ura maira te taitaia ki mua iaia.

23 Kua akapiri roaia te kiko ngenengene nona: kua piriakita rava ïa te reira; kare rava e ngaueue.

24 E tau tona pukuatu ki te toka i te ketaketa, e kua aite ki te toka tavirianga raro i te māro.

25 Kia tu aia ki runga ra, kua mataku te aronga ririnui i reira: e no te rikarika i u aere uaʼi ratou.

26 Kare te koke a te tangata i ko atu iaia e mou: te korare, te tao, e te oto.

27 E ngangaere te auri nei iaia, te veo ra, e rakau pe ïa.

28 Kare aia e oro i te kakao: e te toka maka ra, kua riro ïa iaia mei te ngangaere ra.

29 Kua riro oki te rakau tamaki ei ngangaere iaia: te kata ra aia i te ruru anga i te korare.

30 E toka kokoi tei raro ake iaia: e au mea makoikoi tana i oora na runga i te vari.

31 Kua pupu te moana iaia mei te pani ra: e kua riro te tai ra mei te kapu manongi ra iaia.

32 Te inuinu maira te ara i muri ake iaia; e ana ïa e kua inaina te moana.

33 Kare ona e arite ki runga i te enua nei, tei angaia e auraka e mataku o roto iaia.

34 Te akara ra aia i te au mea teitei ravarai: ko te ariki oki aia i runga i te au tamariki nengonengo katoa ra.