Exodo

32 E KITE akera te au tangata e, kua tavare a Mose, kare rai i aere mai ki raro mei runga mai i taua maunga ra, kua uipa maira taua au tangata kia Aarona ra, kua tuatua maira kiaia, Ka tu, ka rapa i tetai atua no tatou, ei na mua ia tatou nei; kareka taua Mose nei, ko te tangata i arataki mai ia tatou mei te enua maira mei Aiphiti, kare tatou i kite i tona aerenga.

2 Kua karanga aturā Aarona kia ratou, E kiriti mai ana kotou i te poe auro i te taringa o ta kotou au vaine, e ta kotou au tamariki tamaroa, e ta kotou au tamariki tamaine, ka apai mai ei kiaku nei.

3 Kua kiriti akera taua au tangata katoa ra i to ratou au poe auro i to ratou taringa, e kua apai maira kia Aarona.

4 Kua rave atura oki aia i te ratou ra rima, akaaite iora aia i te reira ki te toi, e kua akato iora ei punua puakatoro: kua tuatua iora ratou. Teia toou atua, e Iseraela, ko tei arataki mai ia koe mei te enua maira mei Aiphiti.

5 E kia akara akerā Aarona i te reira ra, kua akatu iora aia i tetai atarau ki mua i taua panua puakatoro ra: e kua akakite aturā Aarona i te tuatua, na ko atura, E rā oroa apopo no Iehova.

6 E ao akera, kua tu akera ratou i te popongi, e kua apai i te atinga karakaratio, e kua apai mai i te atinga au; e kua noo te au tangata ki raro e kai e e inu oki, e kua tu akera ki runga e ura.

7 Kua tuatua mairā Iehova kia Mose, Ka aere, ka eke koe ki raro; kua kino oki toou au tangata, taau i arataki mai mei te enua maira mei Aiphiti:

8 Kua akaruke vave io nei ratou i te arataa taku i akaue ia ratou: kua anga ratou i te punua puakatoro akato no ratou, e kua akamori atu i te reira; e kua apai ratou i te atinga ki te reira, e kua tuatua e, Teia toou atua, e Iseraela, ko tei arataki mai ia koe mei te enua maira mei Aiphiti.

9 E kua tuatua mairā Iehova kia Mose, Kua akara au i taua iti-tangata nei, e i na, e au tangata kaki ketaketa ratou:

10 E teianei, e vaoo ua ana iaku, kia otooto ua ana toku riri ia ratou, kia pou ratou iaku; e ko koe taku e akariro ei iti-tangata maata.

11 Pure iorā Mose i tona Atua ia Iehova, na ko atura, Eaa ka otooto ei to riri, e Iehova, i toou au tangata nei, i taau i arataki mai mei te enua maira mei Aiphiti, ma te mana maata, e ma te rima marōrō? 12 Eaa e tikaʼi kia tuatua to Aiphiti, i te na ko anga e, I arataki aia ia ratou kia rokoia e te kino, kia ta aia ia ratou ki runga i te au maunga, e kia pou roa ratou i te ao nei? E akaruke i taua riri otooto noou na, ruri ke ake koe i toou manako i te kino no to au tangata nei.

13 E akamaara i to au tavini ia Aberahama ra, e ia Isaaka, e ia Iseraela, taau i taputou atu ia koe uaorai, e kua karanga atu kia ratou e, E akamaata au i to kotou uanga e mei te etu o te rangi ra te maata, e taua enua katoa ra, taku i karanga ra, e oronga ïa au no to kotou na uanga, e na ratou e noo e tuatau ua atu.

14 E kua ruri ke akerā Iehova i tona manako i te kino tana i tuatua e, e apai ki rungao i tona au tangata.

15 Kua ariu mairā Mose, e eke maira ki raro mei runga mai i taua maunga ra, ma nga papa kite ra i tona rima: nga pae e rua ravarai tei tataia i aua nga papa ra; tetai pae e tetai pae tei tataia.

16 E angaanga na te Atua aua nga papa ra, e te tataanga i kokotiia ki rungao i aua nga papa ra, e mea tataia ïa e te Atua.

17 E kia akarongo akerā Iosua i te reo o te au tangata ra i te maeva ua anga, kua karanga atura aia kia Mose, E maeva tamaki tei te puakapa ra.

18 Kua tuatua maira ra aia, Kare tera ra i te reo maeva tamaki, kare oki i te aue eke anga: e reo peʼe ra taku e akarongo nei.

19 E vaitata maira aia i te puakapa, kite maira aia i taua punua puakatoro ra, e te ura anga: otooto rava akera to Mose riri, titiri iora i nga papa i tona rima ki raro, ngaangaa roa akera i te tumu o taua maunga ra.

20 Kua rava iora aia i taua punua puakatoro ra i angaia e ratou ra, e kua taʼu iora ki te ai, reru iora e ungaungatiti rava akera, e kua ruru atura ki raro i te vai, e kua akainu atura i te tamariki a Iseraela i taua vai ra.

21 Kua karanga aturā Mose kia Aarona, I akapeea mai teianei au tangata kia koe, i ara maataʼi ratou nei ia koe?

22 Kua tuatua mairā Aarona, Auraka e akatupu roa i to riri, e toku pu e: kua kite oki koe e, tei te tuatua kino teianei aronga.

23 Kua tuatua mai oki ratou kiaku e, E rapa koe i tetai atua no tatou, ei na mua ia tatou; kareka taua Mose nei, ko te tangata i arataki mai ia tatou mei te enua maira mei Aiphiti, kare tatou i kite i tona aerenga.

24 Kua karanga atura au kia ratou, E poe auro tona ra, e kiriti mai ïa. Kua apai maira ratou i te reira kiaku nei: kua titiri atura oki au i te reira ki roto i te ai, e te aere ua maira teianei punua puakatoro.

25 E kia akara akerā Mose e, te ngaei ua ra te tangata; (na Aarona oki ratou i akangaei kia pou ratou i to ratou au enemi;)

26 Kua tu akerā Mose i te ngutupa o te puakapa ra, kua tuatua maira, Koai to Iehova ra? ko te oro mai ïa kiaku nei. Kua uipa katoa maira te au tamariki ravarai a Levi kiaia.

27 Kua karanga atura aia kia ratou, Te na ko maira te Atua o Iseraela ra ko Iehova, Ka akamou ana te tangata ravarai i tana koke ki tona kaokao, ka aere, e ka aere mai oki ki tera ngutupa ki tera ngutupa, e pini ua ake te puakapa katoa nei, ka ta ai, ko te tangata ko tona uaorai taeake, ko te tangata ko tona uaorai oa, ko te tangata ko tona uaorai tangata tupu.

28 Kua pera te tamariki a Levi i ta Mose i tuatua maira: e mate iora to taua au tangata ra e toru katoa paa tausani i taua rā ra.

29 Kua karanga aturā Mose, Kua akataka kotou ia kotou uaorai i teianei rā no Iehova, i te rave anga te tangata katoa i tana uaorai tamaiti, e tona uaorai taeake; kia oronga mai oki aia i tetai meitaki no kotou i teianei rā.

30 E popongi akera, kua karanga aturā Mose ki te tangata, E ara maata ta kotou i rave io nei: e teianei e aere au ki runga kia Iehova ra; peneiake ko te tapokiia ta kotou ara iaku.

31 Kua oki aturā Mose kia Iehova ra, e karanga atura, Aue! e ara maata ta te au tangata i rave io nei, kua rapa i tetai atua auro no ratou.

32 E teianei, kia tika ia koe i te akakore mai i ta ratou ara, ka akakore mai; e kare ra, teia taku tuatua kia koe, ko au ra taau e taparapara atu i roto i taau buka i tataia e koe ra.

33 Kua tuatua mairā Iehova kia Mose, Ko tei ara ïa iaku nei, ko taku ïa e taparapara i roto i taku nei buka.

34 E tenana, ka aere, e arataki i te au tangata ki te ngai i karangaia atu e au kia koe ra; i na, e na mua taku angela ia koe; kia tae ra ki te rā e tutaki ei ia ratou i ta ratou ra ara.

35 Kua tuku mairā Iehova i te au maki i roto i taua au tangata ra, no te mea kua anga ratou i te punua puakatoro ta Aarona i anga ra.