Genese

26 E ROKOIA iora taua enua ra e te onge, eiaa te onge muatangana i tupu i te tuatau ia Aberahama; e aere aturā Isaaka ki Gerara, ki te ariki o te Philiseti kia Abimeleka.

2 Kua mama maira oki a Iehova kiaia ra, e kua tuatua maira e, Auraka e aere ki raro ki Aiphiti; ka noo ra koe i te enua taku e akakite atu kia koe na:

3 Ka noo tuitarere ua koe i teianei enua, e ei vaitatao oki au ia koe, e ka akameitaki atu au ia koe; e ka oronga atu oki au i teia katoa nei au enua noou, e no toou ra uanga; e ka akatupu au i te taputou i taku i taputou atu ki toou metua kia Aberahama;

4 E ka akamaata au i toou ra uanga mei te etu o te rangi ra, e ka oronga au i teia katoa nei pa enua no toou uanga; e ei toou ra uanga e meitaki ei te pa enua katoa o te ao nei: 5 No te mea, kua akarongo a Aberahama i toku reo, e kua akono i taku ikuanga, e taku au akauenga, e taku au akonoanga, e taku ture.

6 E noo iorā Isaaka i Gerara:

7 E kua ui maira te au tangata no taua ngai ra i tana vaine ra; e kua karanga atura aia, E tuaine aia noku: mataku oki aia kia karanga atu e, E vaine aia naku; ko te taia aea aia e to reira ia Rebeka; e vaine purotu oki aia.

8 E roa akera aia i reira, te akara ua maira taua ariki o te Philiseti ra ko Abimeleka na roto i te māramārama, e i na, kite maira aia ia Isaaka i te aani anga raua ma tana vaine, ma Rebeka.

9 E kua tiki mairā Abimeleka ia Isaaka, e tuatua maira, E vaine tikai naau taua vaine nei; eaa oki koe i tuatua mai ei, E tuaine aia noku? E kua karanga aturā Isaaka kiaia, No te mea, i karanga au e, Ko te mate aea au iaia.

10 E kua tuatua mairā Abimeleka, Eaa koe i peraʼi kia matou nei? e moe uaia oki taau vaine e tetai o te au tangata nei, ara iora matou ia koe i reira.

11 E kua ako aturā Abimeleka i te tangata katoa nona ra, na ko atura, Ko te arapaki ua atu i teianei tangata, e i tana vaine, e taia takiri ïa.

12 Kua tanu iorā Isaaka i taua enua ra, e taki tai anere tana i rauka i te ua okotai i taua mataiti ra: kua akameitaki maira oki a Iehova iaia.

13 E maata atura tana, e tupu ua atura i te maata anga, e riro atura aia ei tangata maata roa:

14 E anana mamoe oki tana, e te anana puaka-toro, e manganui oki te tavini: e kua vareae iora te Philiseti iaia ra.

15 E te au ruavai katoa i koia e te au tavini o tona metua, i te au rā o tona metua o Aberahama ra, na te au Philiseti i akaki, e ki roa akera i te one.

16 E kua tuatua mairā Abimeleka kia Isaaka, E aere ke atu ana koe ia matou; kua maata roa atura oki koe ia matou nei.

17 E mei reira, aere aturā Isaaka, patia iora i te puakapa i te o i Gerara, noo iora i reira.

18 Kua ko akaou iorā Isaaka i te au ruavai, i koia e ratou i te au rā o tona metua o Aberahama ra; kia mate a Aberahama i akakiiaʼi e te Philiseti ra: e tapa iora aia i to te reira au ingoa, mei te au ingoa ta tona metua i tapa ra.

19 E kua ko iora te au tavini o Isaaka i taua o ra, e kitea iora te punavai mapia i reira.

20 E kua tauetono maira te au tiaki anana i Gerara, i te au tiaki anana a Isaaka, na ko maira, Na matou tenana vai: tapa iora aia i te ingoa o taua ruavai ra ia Eseka; no te mea, kua taumāro mai ratou iaia.

21 Kua ko akaou ratou i tetai ruavai, e kua tauetono maira oki ratou i te reira: tapa iora aia i to te reira ingoa ia Sitina.

22 E mei reira kua aere ke atura aia, e kua ko akaou i tetai ruavai rai; kare ra ratou i tauetono i te reira: tapa iora aia i to te reira ingoa ko Rehobota; kua na ko akera oki aia, Kua o tatou i teianei ia Iehova, kia tupu tatou i te maata anga i te enua nei.

23 E mei reira oki aere atura aia ki Bereseba.

24 E kua mama mairā Iehova kiaia i taua po ra, na ko maira, Ko au te Atua o toou metua o Aberahama: auraka e mataku, tei vaitata katoao au ia koe, e ka akameitaki atu au ia koe, e akamaata au i toou ra uanga no toku tavini no Aberahama.

25 Kua patu iora oki aia i tetai atarau i reira, e kua tautopa iora i te ingoa o Iehova; e kua patia iora i tona puakapa i reira; e kua ko iora te au tavini o Isaaka i te ruavai i reira.

26 Kua aere mairā Abimeleka, e tona oa ko Ahuzata, e te rangatira maata o te nuku nona ra ko Phikola, kiaia, mei Gerara maira.

27 E kua karanga aturā Isaaka kia ratou, Eaa kotou i aere mai ei kiaku nei, te makitakita mai nei oki kotou iaku, e kua tuaru maira kotou iaku?

28 E kua tuatua maira ratou, Kite pu akenei matou e, tei ia koe a Iehova: e teianei, te tuatua nei matou e, ei taputou ta tatou, ko matou, e ko koe, e papau ana matou i tetai koreromotu kia koe na:

29 E mei ia matou kare i rave kino ua atu ia koe, e ko te takinga-meitaki anake ra to matou ia koe, e kua tuku au ua akenei matou ia koe; e tenana, kua akameitakiia mai koe e Iehova, auraka katoa koe e takinga-kino ua mai ia matou nei.

30 E kua rave iora aia i te umu-tarakai na ratou, e kua kai ratou, e kua inu oki.

31 E tu akera ratou ki runga i te popongi roa, e kua taputou iora ratou tetai e tetai: e kua tuku aturā Isaaka ia ratou kia aere, riro atura ratou ma te au.

32 E kua aere maira te au tavini o Isaaka i taua rā ra, kua tuatua maira kiaia i te ruavai i koia e ratou ra, na ko maira kiaia, Kua kitea te vai e matou.

33 Tapa iora i te reira ia Seba; i tuatuaiaʼi taua oire ra i teianei e, ko Bere-seba te ingoa.

34 Ka a atura ngauru anga to Esau mataiti, e kua akaipoipo atura aia i te tamaine a Beri ngati Heta ra ia Iudita, e te tamaine a Elona ngati Heta ra ia Basemata:

35 E riro atura raua ei mamae ngakau no Isaaka raua ko Rebeka.