E Peʼe na Solomona

1 Te peʼe akatatānga tu ke a Solomona.

2 Kia ongi mai aia iaku ki te ongi o tona vaa: ko to inangaro oki tei meitaki maata i to te wina ra.

3 Mei te aunga rai oki o to manongi meitaki ra, ko toou ïa ingoa, manongi maringi ïa, i inangaro mai ei te au paretenia ra ia koe.

4 E totō koe iaku, ka aru rai matou ia koe: kua arataki te ariki iaku ki tona ra au pia. E rekareka matou, e pingapingareka oki ia koe; e manako rai matou i toou inangaro, e iti te manako i te wina; te aronga tiratiratu tei inangaro ia koe.

5 Kerekere toku, e tupu meitaki ra, e te au tamaine i Ierusalema e; mei te au puakapa i Kedara, mei te au paruru o Solomona.

6 Auraka ra e akara mai iaku, i te mea kua kerekere au, i te mea kua akatu keia au e te rā. Kua riri mai te au tamariki a toku metua vaine iaku; kua tuku maira ratou i te tiaki i te au kainga vine ra iaku: kare ra au i tiaki i toku uaorai kainga vine.

7 E akakite mai iaku, e tei akaperepereia e taku vaerua e, i taau angai anga i te anana naau ra; e taau akaangaroi anga i te avatea ra. Eaa oki au e tikaʼi kia uoa aere ua ki roto i te au anana a to au oa ra?

8 Kare koe i kite, e tera ra vaine tu ke i te purotu i te au vaine katoa ra, e aere koe na te ruatapuae o te anana ra, ka akaangai i taau ra au punua puaka-nio ki te pae puakapa o te aronga tiaki ra.

9 Te akaaite nei au ia koe, e taku akaperepere e, ki tetai oroenua i te kariota a Pharao ra.

10 Manea to to paparinga i te tupati poe ra, e to kaki i te ei auro ra.

11 E anga ra matou i te ei auro noou ra, e te au poe ario katoa ra.

12 Te noo ra te ariki i tana ra kaingakai, te aunga atura te narido noku ra.

13 E ruru mura taku akaperepere nei noku; ei runga i taku umauma aia moe ei e ao ua ake.

14 E putunga tiare kophera taku akaperepere nei, no te au kainga vine i Eni-gedi.

15 I na, e manea toou, e taku akaperepere e! i na, e manea toou, e mata kukupa toou ra.

16 I na, te manea ra koe, e taku akaperepere e! te meitaki ra, e to tatou roi totoaia nei, i te uriuri meitaki e!

17 E arezi te tea o to tatou are, e e berusi ta tatou au kao.