2 Ariki

13 TAE akera ki te okotai takau ma toru o te mataiti o Ioasa, te tamaiti a Ahazia, ariki no Iuda ra, i ariki ei a Iehoahaza, te tamaiti a Iehu, i runga ia Iseraela i Samaria, okotai ngauru ma itu ona mataiti i te ariki anga.

2 Rave atura aia i te kino i mua i te aroaro o Iehova, aru atura aia i te ara a Ieroboama te tamaiti a Nebata, i ara ai Iseraela; kare aia i akaruke i te reira.

3 Tupu akera te riri o Iehova ia Iseraela, e kare aia i tivata i te tuku ia ratou ki roto i te rima o te ariki o Arama ra ko Hazaela, e te rima oki o Beneadada te tamaiti a Hazaela ra.

4 Kua pati akatenga iorā Iehoahaza i mua i te aroaro o Iehova, e kua akarongo mairā Iehova iaia: no te mea te kite ra aia i to Iseraela tinai-mate angaia, i ta te ariki o Arama i tinai-mate mai ia ratou.

5 Kua oronga mairā Iehova i tetai akaora no Iseraela, kua aere iora ratou ki vao mei raro mai i te rima o Arama ra: noo iora te tamariki a Iseraela i to ratou uaorai puakapa, mei tei muatangana ra.

6 Kare ra ratou i akaruke i te ara a te ngutuare o Ieroboama, i ara ai Iseraela, kua na reira ra ratou te aere; e ko Asetoreta ra, te vai ua ra oki i Samaria.

7 E rima ngauru anga anake ua to te aronga akaoro oroenua i vaioia e ia ia Iehoahaza, e te au kariota oki okotai ngauru, e te au tangata aere ua ra okotai ïa ngauru anga i te tausani; kua pou oki ratou i te ariki o Arama ra, e kua riro ratou iaia mei te one-pueu i te pāpā anga.

8 E te toenga o te tuatua ia Iehoahaza, e te au mea katoa tana i rave, e tona ririnui, kare ainei kua tataia ki roto i te buka, te tuatua no te au rā o te au ariki o Iseraela ra?

9 Moe iorā Iehoahaza ki o tona ra ai metua: e tanumia iora aia e ratou i Samaria; tupauia akera aia i te au e te tamaiti nana ra e Ioasa.

10 Tei te toru ngauru ma itu o te mataiti o te ariki o Iuda o Ioasa, i ariki ei a Ioasa te tamaiti a Iehoahaza i runga ia Iseraela i Samaria ra, okotai ngauru ona mataiti e ono ara i te ariki anga.

11 I rave aia i te kino ki mua i te aroaro o Iehova; kare rava aia i akaruke i te au ara katoa a Ieroboama, te tamaiti a Nebata ra, i ara ai Iseraela; kua na reira ra aia te aere.

12 E te toenga o te tuatua ia Ioasa, e tana katoa i rave ra, e tona ririnui, i tamaki ei aia ki te ariki o Iuda kia Amazia ra, kare ainei kua tataia ki roto i te buka, te tuatua no te au rā o te au ariki o Iseraela ra?

13 Moe iorā Ioasa ki o tona ai metua, e kua noo mairā Ieroboama ki runga i tona ra terono: tanumia iorā Ioasa i Samaria ki o te ui ariki o Iseraela ra.

14 Rokoia iorā Elisaia e te maki, te maki i mate ei aia ra. Kua aere atura te ariki o Iseraela ko Ioasa ki raro kiaia ra, e kua aue iora ki runga i tona mata, e kua karanga atura, E taku metua e! e taku metua e! te kariota o Iseraela, e nga akaoro oroenua katoa ra.

15 Kua tuatua mairā Elisaia kiaia, E rave ana i te ana e te au kakao. Kua rave iora aia i te ana e te au kakao.

16 Kua tuatua maira aia ki te ariki o Iserela, Ka tuku ana i to rima ki runga i te ana. Kua tuku iora aia i tona rima ki runga i te ana: kua tuku iorā Elisaia i ona rima ki rungao i nga rima o te ariki.

17 Kua tuatua maira aia, E kiriti ana i te māramārama i te pae i te itinga o te rā. Kua kiriti akera oki aia. Kua tuatua mairā Elisaia, E akainana. Kua akainana atura aia. Kua tuatua maira aia, E kakao akaora ïa na Iehova, e kakao ora ïa ia Arama: ka ta oki koe i to Arama i Apheka e pou atura ia koe.

18 Kua tuatua maira aia, Ka rave i te au kakao. Kua rave iora aia. Kua tuatua maira aia ki te ariki o Iseraela, Ka ta ki raro i te one. Kua ta iora ka toru akera tainga, oti ra ua.

19 Riri akera taua tangata no te Atua iaia ra, e kua tuatua maira, Naringa koe i tataki rima, e kia taki ono i te tainga; kua pou takiriri rava ïa Arama i te taia e koe i reira, e teianei e toru ua o Arama tainga ia koe.

20 Mate iorā Elisaia, e tanumia iora e ratou. Kua akarato ua mai te au takanava Moabi i taua enua ra i te mua o te mataiti.

21 Te tanu ra to Iseraela i tetai tangata, i na, kua kite atura ratou i tetai takanava; kua titiri atura ratou i taua tangata ra ki roto i te tanumanga o Elisaia ra; e kia tukuia taua tangata ra ki raro, e tukuia atura i te au ivi o Elisaia, te ora ua aia ra, e kua tu ua maira ki runga i tona vaevae.

22 Takinga-kino ua mairai te ariki o Arama ra ko Hazaela ia Iseraela e ope rava akera te au rā o Iehoahaza;

23 Kua aroa mairā Iehova ia ratou, e kua tangi mai ia ratou, e kua akono mai aia ia ratou, no tana koreromotu ia Aberahama, ia Isaaka, e ia Iakoba, e kare rai aia i akapou ia ratou, kare rai i tuaru ia ratou i mua i tona mata e teia noaʼi.

24 Mate iora te ariki o Arama ra ko Hazaela; tupauia akera aia i te au e te tamaiti nana ra e Bene-adada.

25 Rauka akaou akera ia Ioasa te tamaiti a Iehoahaza i te rima o Bene-adada, te tamaiti a Hazaela, te au oire i rauka iaia, i te rima o Iehoahaza i tona metua, i te tamaki ra. Ka toru akera ona eke anga ia Ioasa, e kua rauka akaou maira taua au oire o Iseraela ra.