Salamo

140 KIA ora au ia koe, e Iehova, i te tangata kino ra; e akaora koe iaku i te tangata takinga-kino; 2 Ko tei kimi i te kino i roto i te ngakau; ko tei kuku i te au rā katoa nei i te tamaki. 3 Kua akakokoi ratou i to ratou arero mei to te ovi ra; te kavangu asepi tei roto i to ratou ngutu. Sela. 4 E tapapa koe iaku, e Iehova, i te rima o te tangata kino; kia ora oki au ia koe i te tangata takinga-kino; ko tei akakoro i te taii i toku vaevae. 5 Kua tuku te aronga nengonengo i te ere iaku, e te taura; kua oora ratou i te kupenga i te pae arataa; kua tuku i te ereere iaku. Sela. 6 Kua tuatua oki au kia Iehova, Ko taku Atua koe; e akarongo mai, e Iehova, i te reo o taku pati anga. 7 E taku Atu, e Iehova, toku Ora ririnui ra, kua tapoki koe i toku mimiti i te rā tamaki ra. 8 Auraka koe e akatika, e Iehova, i te inangaro o te aronga kino ra; auraka ta ratou kimi anga ravenga kino kia tupu, ko te akateitei aea ratou ia ratou uaorai. Sela. 9 Ko te mimiti o tei akapini mai iaku nei, kia tapokiia ratou ki te kino o to ratou uaorai vaa. 10 Ka topa mai te ngarau mura ki runga ia ratou; ka titiriia ratou ki roto i te ai; ki roto i te au vaarua oonu ra; kia kore e tu akaou mai. 11 Auraka te tangata tuatua kino e akatinamouia ki runga i te enua nei; e aruaru te kino i te tangata takinga kino ra kia mate takiri atu. 12 Kua kite oki au e tauturu mai a Iehova i te tuatua a te tangata akaaka, te tuatua–tau a te aronga ao. 13 Na te aronga tuatua-tika e akameitaki i toou ra ingoa; te aronga tiratiratu te ka noo ki mua i to aroaro.