Luka

17 KUA karanga atura aia ki tana au pipi, Kare rava e kore te au mea e apaʼi ra: ko tei akatupu ra i tei reira, e ae oki aia!

2 E ngari ake aia kia riia tetai toka tavirianga ki runga i tona kaki, e kia titiriia aia ki raro i te tai, kia akatarevake aia i tetai o teianei au tangata rikiriki.

3 E matakite ia kotou uaorai: kia takinga-kino mai to taeake ia koe, e ako atu; e kia tataraara aia, e akakore atu i tana ara.

4 E kia itu ua atu rai ona takinga-kino anga mai ia koe i te rā okotai ra, e e itu oki ariu anga mai, e te tuatua anga mai e, Kua tataraara au; e akakore rai koe i tana apa.

5 Kua tuatua maira te au aposetolo ki te Atu, E akamaata mai i to matou akarongo.

6 Kua karanga atura te Atu, Naringa e akarongo to kotou mei te ua sinapi uaorai te maata, e karanga ua atu ïa kotou ki teianei sukamino, Kia kiriti tumuia koe, e kia tanumia atu ki raro i te tai; nana ïa e akarongo mai.

7 Koai to kotou na, e tavini tona, te arote ra, e te akaangai ra i te mamoe, e oki maira mei te kainga, e karanga vave atu kiaia, Ka aere koe, ka takoto i te kaingakai?

8 Kare aina e karanga atu kiaia e, E akanoonoo i te kaingakai naku, tatuaia to kakau ka rave mai ei i te kai, kia kai au, e kia inu oki! e akonei ake koe ka kai ei, e inu oki?

9 E manako ainei aia, e meitaki to taua tavini ra iaia, koia i rave i tei akaueia atu iaia ra? Te manako nei au, kare.

10 Koia katoa kotou, kia raveia e kotou te au mea katoa i akaueia atu, e na ko atu kotou, E au tavini puapinga kore matou nei: ko tei tau tikai ia matou ra, ko ta matou ïa i rave io nei.

11 E taua aerenga nona ki Ierusalema ra, i na Samaria aia i te aere, e i na Galilea.

12 E tei te tomo anga atu aia ki roto i tetai vila, kua aravei akera iaia tetai aronga lepera tino ngauru katoa, tu ua maira i te atea ke:

13 Kapiki ua maira te reo, na ko maira, E te Orometua, e Iesu e, e aroa mai koe ia matou.

14 E kia akara atura aia ia ratou, kua karanga atura, Ka aere, ka akakite ki te kau taunga ia kotou. E tei to ratou aere anga na te arataa, tamāia iora ratou.

15 E kia akara iora tetai o ratou iaia uaorai, kua ora, kua oki maira ma te kapiki ua te reo i te akakakā anga i te Atua:

16 Kua tipapa iora aia ki raro i te vaevaeo o Iesu, kua akameitaki maira iaia: no Samaria oki taua tangata ra.

17 Kua karanga aturā Iesu, na ko atura, Kare ainei tino ngauru katoa i akaoraia nei? teiea io nei ra e toko iva?

18 Kare rava tetai i oki mai e akakakā i te Atua, mari ra ko teianei tangata ke.

19 Kua karanga atura aia kiaia, Ka tu, ka aere i to tere: kua ora koe i to akarongo.

20 E i uiia mai aia e te au Pharisea, i te tupu anga o te basileia o te Atua; kua karanga atura aia kia ratou, na ko atura, Kare te basileia o te Atua e tupu akakite ua mai:

21 Kare oki ratou e tuatua e, I na teia, e i na tera! i na oki, te basileia o te Atua, tei roto ïa ia kotou nei.

22 Kua karanga atura aia ki tana au pipi, Ka tae mai te tuatau e anoano ei kotou kia kite i tetai i te au rā o te Tamaiti a te tangata nei, e kare rai kotou e kite.

23 Kia tuatua maira ratou kia kotou, I na teia, e i na tera; auraka kotou e aere atu, eiaa e aru ua atu.

24 Mei te uira oki e kanapanapa i tetai pae rangi, e kakā ua atura ki tetai pae rangi; ka pera katoa te Tamaiti a te tangata kia tae ki tona tuatau.

25 E na mua ra tona au mate e manganui e tikaʼi, e e kopaeia e teianei uki.

26 E mei tei te tuatau ia Noa ra, ka pera katoa kia tae ki te tuatau o te Tamaiti a te tangata nei.

27 Te kaikai ra ratou, te inu ra, te akaipoipo ra ratou, e te orongaia ra ratou kia akaipoipoia; e tae rava akera ki te rā i tomo ei a Noa ki roto i te araka ra; ko te diluvi maira, ope rava akera ratou i te mate.

28 E mei te tuatau ia Lota ra; te kaikai ra ratou, te inu ra, te oko atura, e te oko maira, te tanu ra, e te akatu ra i te are:

29 Kia tae ra ki te rā i akaruke atu ei a Lota ia Sodoma, kua topa maira te ai e te teio no runga i te rangi, ope atura ratou i te mate:

30 Ka pera katoa kia tae ki te rā e akakiteia mai ei te Tamaiti a te tangata.

31 Kia tae ki te reira rā, tei rungao i te are te tangata, e tei roto i te are tona apinga, auraka aia e eke ki raro e umuumu i taua apinga ra e apai ke: e tei te kainga aia, auraka e oki mai ki te ngutuare.

32 E akamaara i te vaine a Lota.

33 Ko tei umuumu atu i tona uaorai ora, ka ngere ïa i te ora: ko tei kopae ra i tona ora, e ora tona.

34 E akakite atu au kia kotou, Kia tae ki taua po ra, toko rua puke tangata i te roi okotai ra; e riro tetai e ora atu tetai.

35 Toko rua puke vaine i takaviri i te takavirianga sitona, e riro tetai e ora atu tetai.

36 Toko rua puke tangata i roto i te koro, e riro tetai e ora atu tetai.

37 Kua tuatua maira ratou kiaia, na ko maira, E te Atu, eiea? Kua karanga atura aia kia ratou, Ei te ngai kopapa ra, ei reira te au aeto e putuputu mai ei.