Angaanga
24 E PO rima akera, aere atura te taunga maata, ko Anania, e te aronga pakari katoa, e tetai tumu korero, ko Teretulo, ki raro, ko tei akakite atu ïa ki te tutara ia Paulo.
2 E tikiia atura aia, kua timata aturā Teretulo i te tapepe iaia, na ko atura, E au maata to matou ia koe, e e peu meitaki oki taau i rave i toou akono meitaki i teianei enua,
3 Te rekareka nei matou ma te akameitaki kare e ngai toe, kare oki i tivata, e Feliki teitei.
4 Auraka ana ra au e tamanata atu ia koe, teia taku tuatua kia koe, e akarongo iti ua mai ana koe ia matou, i te aroa meitaki noou ra.
5 Kua kite matou i teianei tangata, e tangata pekapeka, e te taoriori i te ngati Iuda ravarai e pini ua ake te enua katoatoa, e e arataki oki i te pupu o te tangata Nazareta:
6 E timata io nei aia i te akanoa i te iero: opu atura matou iaia, i maara oki matou e akava iaia i ta matou uaorai ture.
7 Kua aere maira ra te rangatira maata ko Lusia, kua opu nui ua maira iaia i roto i to matou rima,
8 Kua akaue atura i te aronga i tapepe iaia e aere mai kia koe nei; kia kite katoa oki koe uaorai kia akava ra, i te au mea ravarai ta matou i tapepe atu iaia nei.
9 Kua akatika katoa atura oki te ngati Iuda, na ko atura, Koia tika te reira.
10 E kia tungou mai te tutara kia Paulo e tuatua aia, kua na ko atura, I te au mataiti roa akenei oki ko koe rai te akava i teianei enua, kua kite au, i meitaki ei au i te akatika anga iaku uaorai nei:
11 Kia kitea uaia e koe e, okotai rava akenei ngauru anga te po e rua ara i aere ei au ki Ierusalema e akamori i te Atua.
12 Kare oki ratou i kite iaku i te taumāro anga ki tetai tangata i roto i te iero, e te taori anga i te tangata, kare oki i roto i te au sunago, kare katoa oki i te oire:
13 Kare oki e tika ia ratou kia tuku mai i te kite i te au mea ta ratou i tapepe mai iaku nei.
14 E aaki atura au kia koe i teia, ta ratou e tuatua nei e, e airesi, te akapera nei au i te akamori i te Atua o toku ai tupuna, ma te akarongo i te au tuatua ravarai i tataia i roto i te ture, e te au peroveta ra:
15 Te irinaki nei au ki te Atua, ko ta ratou katoa oki ïa e tiaki nei, e e tuakaouanga to tei mate, te aronga tuatua-tika e te aronga tuatua-tika kore.
16 I akamaroiroi ei oki au nei, kare i tukumoe, eiaa ei apa i taku akava-ngakau i te Atua, e te tangata nei.
17 Manganui akenei oku mataiti i topa i aere mai ei au e apai mai i te apinga i toku enua, e te atinga a te Atua.
18 I reira toku kitea anga e tokotai puke ngati Iuda no Asia i roto i te iero, kua tamāia, kare ra i maata te tangata, kare oki i koma.
19 E aere katoa mai ratou i ko nei e tikaʼi, i mua i toou aroaro nei ka tapepe mai ei iaku, peneiake e tuatua ta ratou iaku:
20 Auraka atu rai ïa, ka tuatua mai ratou nei i te kitea anga e ratou taku ara, iaku i tu i mua i te aroaro o te Sunederi,
21 E ko teia ua nei reo okotai taku i kapiki ua, ka tu uaʼi au i rotopu ia ratou ra e, No te tuakaouanga o tei mate nei i akavaiaʼi au e kotou i teianei rā.
22 E kia akarongo mairā Feliki i taua au tuatua ra, kua akaoti maira aia i ta ratou tuatua, na ko maira, Kia kite meitaki ake ana au i tenana tuatua, kia tae mai te rangatira maata ko Lusia ki raro nei, ei reira au e akarongo atu ei i ta kotou tuatua e ope rava ake.
23 Kua karanga atura aia ki tetai rangatira anere e tapapa meitaki ia Paulo, auraka e tapeka uaia, e kia aere mai tona au oa e akara iaia, e e matuapuru mai iaia, aua e akakoreia atu.
24 E topa akera etai puke rā, tae mairā Feliki e tana vaine ngati Iuda ko Derusila, unga atura aia i te karere e tiki ia Paulo, e akarongo atura iaia i te tuatua no te akarongo i te Mesia ra.
25 E te akatika maira aia i te tuatua no te tuatua-tika, e te akono meitaki, e te akavaanga a muri ake, rutetetete iorā Feliki, na ko atura, E aere ke atu ana ra koe, e ka tiki atu rai au ia koe i tona atu rā.
26 I manako oki aia e, e oronga mai a Paulo i te moni nana, kia tukuia atu aia e ia; i tiki putuputu atu ei aia kiaia e karangaranga rai raua.
27 E ope akera nga mataiti e rua, tupauia akerā Feliki ia Pokio Fesito; vaio aturā Feliki ia Paulo kia tapeka uaia ana, ei akarekareka anga atu i te ngati Iuda.