Angaanga

21 E TAKA ke mai nei matou ia ratou, kua tuku atura matou, ano tika ua atura matou ki Koso, e ao akera ki Roda, e mei reira oki ki Patara:

2 Kite atura matou i tetai pai, te ano atura ki Phenia, aere atura matou ki rungao, e ano atura.

3 E kite atura matou ia Kupero, akarukeia atura e matou i te pae kaui, tere tika atura matou ki Suria, e tapae atura ki Turia: ei reira oki te apinga i taua pai ra e tariiaʼi ki vao.

4 Noo atura matou i reira e itu akera po, e aronga pipi oki tei kitea e matou i reira; ko tei tuatua mai ïa kia Paulo no te Vaerua i tuatuaʼi, auraka aia e aere ki Ierusalema.

5 E ope akera te reira puke rā ia matou, aere atura matou i to matou tere, e kua aere katoa maira ratou katoa ma te vaine e te tamariki ki vao i taua oire ra: kua tuku iora i to matou turi ki raro i taatai, pure iora matou.

6 Kua aroa iora matou matou uaorai, e oti akera, aere atura matou ki runga i te pai; oki maira ratou ki to ratou ngutuare.

7 E ope akera to matou akatere anga na tai, tapae atura matou ki Petolemai mei Turia atu: aroa atura matou i te au taeake, e noo atura ki o ratou ra e okotai akera rā.

8 E ao akera riro aturā Paulo ma, e tae atura matou ki Kaisarea: tomo atura matou ki roto i te are o Philipa apii evangelia, no nga tangata toko itu ra aia; noo atura matou ki ona.

9 Toko a ana puke tamaine paretenia, e peroveta vaine ratou.

10 No te mea e manganui to matou rā i reira, kua aere maira tetai peroveta, mei Iudea mai, ko Agabo te ingoa.

11 E tae maira aia kia matou, kua rave maira aia i te tatua o Paulo, kua ruru iora i tona uaorai rima ma te vaevae, kua tuatua maira, Te na ko maira te Vaerua Tapu, Mei teianei ta te ngati Iuda i Ierusalema ra e ruru i te tangata nona teianei tatua, e ka tuku oki iaia ki te rima o te etene ra.

12 E kia akarongo atura matou i taua tuatua ra, kua tāpu atura matou, e to reira katoa, iaia, eiaa aia e aere ki Ierusalema.

13 Kua tuatua mairā Paulo, Eaa kotou i tangi mai ei e i akaparukaua mai ei i toku ngakau? kua tika oki iaku kia ruruia au, auraka oki te reira anake ra, kia mate katoa atu i Ierusalema, i te ingoa o te Atu ra o Iesu.

14 E kare rava akera aia i tuku mai, kua akapaki iora matou na ko atura, Kia tupu to te Atu ra anoano.

15 E ope akera taua au rā ra, kua rave iora matou i to matou apainga, aere atura ki Ierusalema.

16 E ko e tokotai puke pipi oki no Kaisarea i te aere katoa anga atu e matou katoa, arataki atura ia matou ki o tetai tangata no Kupero, ko Nasona te ingoa, e pipi taito, ei ona matou noo ei.

17 E tae atura matou ki Ierusalema, kite maira te au taeake ia matou ma te rekareka.

18 E ao akera, aere katoa atura matou ko Paulo ma kia Iakobo ra; tei reira katoa te aronga orometua ravarai ra.

19 E oti akera tona aroa anga atu ia ratou ra, akakite marie atura aia i te au mea ravarai ta te Atua i rave ki o te au etene i tana apii anga.

20 E kia akarongo maira ratou i te reira, akameitaki atura i te Atu; e kua tuatua maira ratou kiaia, Kua kite koe, e to matou taeake, i te ngati Iuda akarongo nei e manganui te tausani: e te māro anake nei oki ratou i te ture:

21 E kua akakiteia mai koe ia ratou e, te apii ra koe i te ngati Iuda ravarai e noo ki o te etene ra e, e akaruke ia Mose, i te na ko anga atu oki e, auraka ratou e peritome i te tamariki, e auraka oki e akono i te au peu ra.

22 E teianei, eaa te ravenga? kare oki e kore te akaputuputu mai taua aronga katoa ra; ka kite oki ratou e, teia mai nei koe.

23 E na ko koe i ta matou e karanga atu nei: toko a i o matou nei puke tangata, e tia ta ratou;

24 E kapiti katoa mai koe kia ratou, e kia tamā katoaia koe e ratou katoa, e kia aiteite katoa toou apinga e to ratou kia varu ratou i to ratou mimiti: kite akera te tangata ravarai e, e tuatua taeke ua tei tuatuaia mai koe ia ratou; e te tika katoa ra toou aerenga, e te akono katoa ra koe i te ture.

25 Kareka te au etene i akarongo ra, kua taka ïa tuatua ia tatou, e kua tata akenei oki tatou, eiaa ratou e akono i te reira au peu, auraka ra ratou e kai i tei apaiia atu i te idolo ra, e te toto, e te mea kukumi uaia ra, e eiaa oki e akaturi.

26 Kua kapiti akerā Paulo ki taua au tangata ra, e ao akera tamāia iora aia e ratou katoa, tomo atura ki roto i te iero ra, e akakite atu i te openga o te au rā tamā anga ra, kia apaiia te atinga na ratou ravarai.

27 Kare akera e ope tika taua nga rā e itu ra, kite akera te ngati Iuda no Asia ra iaia i roto i te iero, akakeu iora i te tangata ravarai, e kua opu atura to ratou rima iaia;

28 Kua kapiki atura, E te au tangata Iseraela nei, e rave katoa mai; ko te tangata teia i apii i te tangata katoa nei, kare e ngai toe, i te mea tau kore i te tangata nei, e te ture, e teianei ngai; e kua taoi katoa mai oki i te Eleni ki roto i te iero nei, e kua viivii teianei ngai tapu iaia.

29 (Kua akara ana oki ratou ia Terophimo i Ephesia ra i te kapiti anga kiaia ki roto i te oire ra, ko ta ratou ïa i manako e, kua taoiia e Paulo ki roto i te iero ra.)

30 Keu atura taua oire katoa ra, e kua oro maira te tangata tini ravarai; kua opu maira ia Paulo, kua kika atura iaia ki vao mai i te iero ra: e topiriia akera te au pa i reira.

31 E te rave ra oki ratou iaia e ta, kua tae atura te tuatua ki te rangatira maata o te pupu vaeau e, te keu ua nei Ierusalema katoatoa nei.

32 Kua arataki atura aia i te vaeau e te au rangatira anere, oro atura kia ratou: e kia akara maira ratou i te rangatira maata e te au vaeau, kare akera ratou i ta ia Paulo.

33 Kua aere atura te rangatira maata i vaitata, kua opu atura iaia, kua akaue atura i te tangata e tapeka iaia i nga pirianganaoa e rua; e kua ui atura kia ratou iaia, e tana ara.

34 Kua kapiki maira etai no roto i taua aronga ra, e tuatua ke ïa, e tuatua ke oki ta etai; e kare ua akera i kitea meitakiia i te vaa o te tangata, kua akaue atura aia e kave iaia ki roto i te punanga.

35 E tae atura aia ki te kakenga ki runga, kua maranga ua akera ki runga i te au vaeau ra, no te mea te kononinoni maira te tangata.

36 Te aru maira oki te tangata tini i muringao, i te kapiki anga mai e, E apai ke atu tena.

37 E vaitata akerā Paulo i te kaveia ki roto i taua punanga ra, kua karanga atura aia ki te rangatira maata, E tika ainei ia koe kia tuatua au? Kua tuatua maira aia, Kua kite koe i te tuatua Eleni?

38 Kare ainei koe i te tangata Aiphiti i kotikoti kupenga i muatangana, e ko tei arataki oki i te tangata ta tangata, e a katoa te tausani ki te medebara ra?

39 Kua karanga aturā Paulo, E ngati Iuda tikai au no Tareso i Kilikia ra, e kare au to te oire akaaka: teia taku tuatua kia koe, e akatika mai koe e tuatua ake ana au i te au tangata nei.

40 E tika maira iaia, kua kamokamo aturā Paulo i tona rima ki taua aronga tangata ra, tu uaʼi aia i te kakenga ki runga, e muteki takiri rava iora; kua karanga atura aia kia ratou i te tuatua Ebera, na ko atura.