Ezekiela

7 E KUA tae maira te tuatua a Iehova iaku nei, na ko maira,

2 Te na ko katoa maira, e te tamaiti a te tangata na, te Atu ra ko Iehova, ki te enua o Iseraela ra; E openga teia, e openga, kua tae maira ki runga i nga poo katoa e a o te enua nei.

3 Tei runga ia koe te openga i tenana, e e akatano atu au i taku riri ki runga ia koe, e e akava au ia koe i tei tau i toou ra au aerenga, e e akaoko atu au ia koe i taau katoa ra au tuatua viivii.

4 Kare oki taku mata e akaperepere ia koe, e kare oki au e aroa atu: e akaoko ra au ia koe i toou ra au aerenga, e taau ra au mea viivii i vai i rotopu ia koe ra: ka kite oki kotou e ko Iehova au.

5 Te na ko maira te Atu ra ko Iehova, E kino, e kino anake, i na, kua tae mai.

6 E openga teia kua tae maira, kua tae maira te openga: te moetapapa maira te reira ia koe; i na, kua tae maira.

7 Kua tae te utunga ki runga ia koe, e tei noo i te enua nei e: kua tae te tuatau, te rā tumatetenga tei vaitata mai, e kare te aruru akaou anga o te au maunga ra.

8 Teia au ka riringi atu i toku riri otooto ki runga ia koe ra, kare e roaia e e akaope i taku riri ki runga ia koe: e e akava au ia koe i tei tau i toou ra au aerenga, e akaoko atu au ia koe i taau katoa ra au mea viivii.

9 Kare oki toku mata e akaperepere, kare oki au e aroa atu: e akaoko atu au ia koe i tei tau i toou ra au aerenga, e taau ra au mea viivii i vai i rotopu ia koe ra; ka kite oki kotou e, ko au teia ko Iehova tei pāpā nei.

10 I na, ko taua rā nei, i na, kua tae: kua topa akenei taua popongi ra; kua puaia te rakau, kua kaoia te nengonengo.

11 Kua riro te tangi kore ei rakau kino: kare oki ratou ra, kare oki te tini o ratou, kare oki to ratou katoa ra, e toe: kare oki ratou e aueia.

12 Kua tae maira te tuatau, te vaitata maira te rā: auraka tei oko atu e rekareka, auraka tei riro tana ra e mii: te vai nei oki te riri otooto ki runga i tona tini katoa ra.

13 Kare oki tei oko ra e oki mai ki tana i oko ra, toe uaʼi ratou i roto i te aronga e ora ra: no te tangata tini katoa nei oki teianei orama, kare e oki mai; kare oki tetai e tika kia akaketaketa iaia uaorai i tona kino i te oro anga nei.

14 Kua akatangi ratou i te pu, kia teateamamao katoatoa; kare ra tetai i aere ki te tamaki: te vai ra oki toku riri otooto ki runga i tona tini ravarai.

15 Tei vao te koke, ko te maki-mate ra e te onge tei roto: tei vao i te kainga ra, ka mate ïa i te koke: e tei roto i te oire ra, ka pou ïa i te onge e te maki-mate.

16 Ko te aronga ra e ora ra, ko te ka ora ïa, e riro ïa i runga i te au maunga ra, mei te kupupa o te o ra, i te aue katoatoa anga i te ara, tanao, tanao.

17 E riro te au rima katoa i te ngavarivari, e te au turi katoa mei te vai ra te parukaua.

18 E tatua ratou ia ratou uaorai ki te kakau paoa, e e tapokiia ratou e te rikarika; e te akama tei runga i te au mata ravarai, e te mangore ki runga i to ratou au mimiti katoa.

19 E akaruke ratou i ta ratou ario ki roto i te arataa, e riro oki ta ratou auro mei te mea viivii ra: kare oki ratou e ora i ta ratou ario, e ta ratou auro, i te rā o to Iehova riri otooto ra: kare oki to ratou vaerua e mareka, e kare oki e ki to ratou kopu: ko te turori anga oki te reira no ta ratou ra ara.

20 Kareka te meitaki o tona mea akamanea, kua tuku aia i te reira ei mea tapunui: kua anga ra ratou i te au tiki o ta ratou au mea viivii, e ta ratou au mea rikarika i te reira: i akariro ei au i te reira ei mea viivii ia ratou.

21 E e oronga atu au i te reira ki te rima o te au tangata ke ei apinga noni, e ki te aronga kino o te enua nei ei ārunga; e ka viivii te reira ia ratou.

22 E ariu ke oki au i toku mata ia ratou, e ka viivii taku ngai ngaro ia ratou: na te aronga āru oki e tomo ki roto i te reira, ka akaviivii ei.

23 E anga koe i tetai pirianganaoa: kua ki oki te enua i te ara toto, kua ki oki te oire i te takingakino.

24 E apai mai oki au i tei kino o te aronga etene, e na ratou e noo ki to ratou au are: e akakore au i te nengonengo o te aronga ririnui ra; e e akaviiviiia to ratou au ngai tapu ra.

25 Te aere maira te mate; e ka kimi ratou i te au, e kare ua ra.

26 E tae mai te tumatetenga na rungao i te tumatetenga, e te rongo na rungao i te rongo; ei reira ratou e kimi ei i te orama ki te peroveta; e ngaro ra te ture i te taunga, e te ako i te aronga pakari ra.

27 Ka aue te ariki, e vaîia oki te tamaiti a te ariki ki te poitirere, e akaanataia oki te rima o te au tangata o te enua ra: e rave oki au ia ratou i tei tau i to ratou aerenga, e mei ta ratou au akava anga ra, ko taku ïa e akava atu ia; ka kite oki ratou e ko Iehova au.