Isaia

34 E AKAVAITATA mai, e te pa enua e, ka akarongo mai: e akono mai, e te au tangata e: kia akarongo mai te enua, ma tona ki katoa ra; te ao, e tei tupu katoa i reira.

2 Te vai nei oki te riri o Iehova ki runga i te pa enua ravarai, e tona riri maata, tei runga ïa i to ratou ra nuku katoatoa ra: kua akatakaia ratou e ia no te mate, kua tukuia ratou kia taia.

3 E to ratou i taia ra e akaruke ua atuia ïa; e i to ratou au ivi ra e peke ei te aunga kino ki runga e e taʼe a vai ua te au maunga i to ratou toto.

4 E kore rai to te rangi ra nuku katoa ra; e pokaikaiia te rangi mei te tuatua i pokaikaiia ra: e to ratou au nuku katoa ra e topa, mei te rau vine i topa ra, e mei te rau para o te suke ra.

5 Ka kona taku koke i runga i te rangi: i na, e topa ki runga ia Edoma, ki runga i te aronga i akatakaia e au no te mate.

6 Kua ki te koke a a Iehova i te toto; kua inuinu i te tongaua; i te toto o te au punua mamoe e te au puaka-nio, i te matu o te pukuatu o te au mamoe toa ra: e atinga oki ta Iehova i Bozara, e e tainga maata oki i te enua ra i Edoma.

7 Okotai rai topa anga to ratou e te au puakatoro taetaevao katoa ra, te au puakatoro e te au puakatoro toa katoa ra; e kona to ratou enua i te toto ra, e e ngarungarua to ratou one i te matu.

8 E rā akaoko anga oki ta Iehova, e mataiti tutaki anga ei akatika ia Ziona.

9 E riro tona ra aronga kauvai ei tapou, e tona one-pueu ei teio, e e riro oki tona enua ei tapou mura.

10 Kare e tamateia i te po e te ao; e tika tona auai i te peke anga ki runga e tuatau ua atu: e vai tanea ua rai aia, i tera uki i tera uki: kare e aereia e te tangata e tuatau ua atu.

11 Ko te kate e te kephoda te ka noo i reira; e i reira rai noo ei te lulu e te orebi: e akatika aia i te tataura akatanea na runga iaia ra, e ka tuku oki te au toka aite o te puapinga kore i reira.

12 E te aronga nunui i ona ra, kare ïa kia karanga atu ratou ei tutara ki runga ia ratou; e te ui ariki i ona ra, e riro ïa i te kore roa.

13 E tupuia tona au are ariki i te rakau taratara ra; te mauku mangeo, e te tataramoa, i roto i tona ra au pinanga: e riro oki ei nooanga no te au taae, ei paepae no te au tamaine a te ione ra.

14 E aravei te au puaka taae o te ngangaere e te au kuri momoavao i reira; ka kapiki oki te puaka-nio toa uruuru ki tona tokorua i reira; ei reira katoa te lulu e to ei, e kitea iora tona akaangaroianga i reira.

15 Ei reira oki te ovi rere e koangaʼi, ka tuku ei i tona ua, ka akapanaʼi, e ka akaputuputu i te anau i raro ake i tona maru; e riro katoa te au aeto ra i te putuputu i reira, ka tataki rua ratou ravarai e pini ua ake.

16 E kimi ana kotou i te tuatua a Iehova, e tatau marie: kare rava tetai o teia e ngaro ke; e kare rava tetai ua e ngere i te toa: na tona vaa oki i tuatua mai, e na tona Vaerua uaorai ratou i akaputuputu.

17 Kua tuku akera aia i te kelero no ratou, e na tona rima oki i tataura i ta ratou tuanga: e riro ia ratou e tuatau ua atu, e noo rai ratou i reira i tera uki i tera uki.